سالت پەن عۇرىپتى ايتامىز, قانشاما ءتىل, سول ارقىلى قانشاما حالىق پەن ۇلت جويىلىپ كەتىپ جاتىر. ولارمەن بىرگە مىڭداعان قۇندىلىق پەن ءتىل جەتكىسىز ەرەكشەلىك ءومىرىن توقتاتاتىنى وكىنىشتى. وتكەندە ارىپتەس اعام رەسەي اۋماعىنداعى كەرەك اتتى تۇركىلىك ۇلتتان ءتورت-اق ادام قالعانى تۋرالى ءتۇسىرىلىم كورىپ وتىرعانىن ايتتى. اراسىندا ەكەۋى عانا انا ءتىلىن بىلەدى ەكەن. مۇنداي اقپاراتتى ەستىگەندە شۇكىرشىلىك ەتەسىز. بىرنەشە عاسىردى قۇم استىنا قالدىرىپ, قازاق باردا جاساي بەرەتىن بەتاشار مىڭجىلدىق وركەنيەتتەرمەن توعىسىپ, ۇلت سانا-سەزىمى مەن تۇرمىسىنا جاڭاشا ورنىعىپ قانا قويماي, الەمدىك مۇرا ساناتىندا ويىپ تۇرىپ ورنىن العانى قۋانىشتىڭ زورى عوي.
جاڭا تۇسكەن كەلىننىڭ اي ديدارى مەن كۇن سيپاتىن كەلگەن جۇرتىنا تانىستىرۋ عانا ەمەس, باستاپقى سالەم مەن ءىلتيپاتتىڭ نىشانى دا بەتاشار. توركىنىنەن جات-جۇرتقا ۇزاپ, ونداعى جاڭا وتاۋدىڭ ءتۇتىنىن تۇتەتىپ, جاڭا ۇرپاق ءوربىتۋ نيەتىندەگى قادام الدىنداعى تەڭدەسسىز سالتتىڭ ارتىندا سالەم سالۋ بۇعىپ جاتىر. كەلىننىڭ ۇلكەنگە قۇرمەتى, كىشىگە ىزەتى عانا ەمەس, قايىن جۇرتىن تانىستىرۋى, سويتكەنىنە قاراعاندا, تۇسكەن اۋلەتكە قانشالىقتى قادىرلى ەكەنىن دە ايعاقتايتىن ايتۋلى جورالعى. بۇعان قوسا قانشاما جاقسى وي مەن ىزگى امالدىڭ تۇساۋى كەسىلەتىن ءسات. جاس كەلىننىڭ جارقىن جۇزىنە تۇتقان شىمىلدىقتىڭ ۇشىن ۇستاعان ءاربىر جاستىڭ نەمەسە ابىسىنداردىڭ اق تىلەۋى, بەتىن ىرىمداپ قاريا اناعا اشتىرۋى, قولتىقتاعان ابىسىندار جولىنىڭ جالعاستىعى – ءبارى-ءبارى ەلدىڭ ءوسىپ-ءونۋى مەن وركەن جايۋىنا جاسالعان جاقسى امالدار. وتباسى مەن اۋلەت قۇندىلىقتارىن بەكىتۋگە باستايتىن اسىل جورالعىلار وسىنداي قۋاتتى ويدان باس تارتىپ, كوكتەيتىنى بەلگىلى. «جاقسى ءسوز – جارىم ىرىس» دەگەندەي, ىزگى نيەتپەن باسقان قادامنىڭ ءوزى يگىلىكتەر ەرتپەي قويمايدى سوڭىنان. جۇزدەگەن, مەيلى مىڭداعان جىل وتسە دە, حالىق نيەتىن تۇتقان مۇنداي اسىل قۇندىلىقتار توزباسىنىڭ ءبىر ايعاعى – بۇگىنگى بەتاشار. حالىقتىق قۇندىلىقتارىمىز الەمدىك مۇرالار ءتىزىمىن تولىقتىرا بەرسىن.
