فوتو: اشىق دەرەككوز
ەلدە 2011 جىلعا دەيىن بالاباقشا اشۋ ءۇشىن مەملەكەتتەن ارنايى رۇقسات الۋ مىندەتتى بولعان. كەيىن مەكتەپكە دەيىنگى ورىن تاپشىلىعىن ازايتۋ ماقساتىندا ليتسەنزيالاۋ الىنىپ تاستالدى. سونىڭ ناتيجەسىندە جەكەمەنشىك بالاباقشالار سانى كۇرت كوبەيىپ, اتا-انالاردىڭ تاڭداۋ مۇمكىندىگى ارتتى.
الايدا ۋاقىت وتە كەلە سالادا قاۋىپسىزدىك, كادر دايارلىعى مەن ءبىلىم ساپاسىنا قاتىستى ماسەلەلەر تۋىنداعان. مامانداردىڭ ايتۋىنشا, بالاباقشالار سانى ستاندارتتاردان جىلدام وسكەن.
24.kz مالىمەتىنشە, قازىر ەل بويىنشا 12 مىڭنان استام مەكتەپكە دەيىنگى ۇيىم جۇمىس ىستەيدى. ونىڭ ىشىندە شامامەن 5 مىڭى مەملەكەتتىك, ال 6 مىڭعا جۋىعى جەكەمەنشىك بالاباقشا.
وقۋ-اعارتۋ مينيسترلىگىنە قاراستى ءبىلىم ساپاسىن قامتاماسىز ەتۋ كوميتەتىنىڭ باس ساراپشىسى قۇرالاي ابەۋوۆانىڭ ايتۋىنشا, جاڭا جۇيە ەڭ الدىمەن ساپاسىز قىزمەت كورسەتەتىن ۇيىمداردى نارىقتان ىعىستىرۋعا باعىتتالعان.
«ليتسەنزيا الۋ ءۇشىن ۇيىم الدىن الا تەكسەرۋدەن ءوتىپ, ماتەريالدىق-تەحنيكالىق بازاسىنىڭ, عيماراتىنىڭ جانە بىلىكتى تاربيەشىلەر مەن پەداگوگتەردىڭ بار ەكەنىن دالەلدەۋى كەرەك», دەدى ول.
ساراپشىلاردىڭ مالىمەتىنشە, ەلدەگى بالاباقشالاردىڭ 96% مەملەكەتتىك تاپسىرىس الادى. بىراق كاسىپكەرلەر مەملەكەتتىك تاپسىرىس كولەمى ناقتى شىعىنداردى تولىق جاپپايتىنىن ايتادى. قاراجاتتىڭ باسىم بولىگى مىندەتتى تالاپتاردى ورىنداۋعا جۇمسالىپ, ءبىلىم بەرۋ باعدارلامالارىن جاڭارتۋعا نەمەسە ينفراقۇرىلىمدى جاقسارتۋعا مۇمكىندىك از قالادى.
جەكەمەنشىك بالاباقشا مەن مەكتەپ قۇرىلتايشىسى, «ادىلەت» رەسپۋبليكالىق مەكتەپكە دەيىنگى جانە ورتا ءبىلىم بەرۋ قاۋىمداستىعىنىڭ ءتورايىمى دينارا قۇدايقۇلوۆا ساپالى قىزمەت كورسەتەتىن ورتالىقتار مەملەكەت قولداۋىنسىز دا جۇمىس ىستەي الاتىنىن ايتتى.
«العاشقى جىلدارى قيىن بولدى. بىراق اتا-انا ءاردايىم ساپانى تاڭدايدى. قازىر ليتسەنزياسى بار مەكتەپ قۇرامىندا بولعاندىقتان, ءبىزدىڭ بالاباقشا دا تەكسەرۋدەن وتەدى. ال مەملەكەتتىك تاپسىرىس المايتىن كەيبىر ۇيىمدار باقىلاۋدان تىس قالىپ جاتادى», دەدى ول.
سونىمەن قاتار كاسىپكەرلەر جاڭا تالاپتاردىڭ اۋىرتپالىعى ارتۋى مۇمكىن ەكەنىن دە جاسىرمايدى. «اتامەكەن» ۇلتتىق كاسىپكەرلەر پالاتاسى جانىنداعى ايەلدەر كاسىپكەرلىگىن دامىتۋ كوميتەتىنىڭ ءتورايىمى لەيلا كۇلەنوۆانىڭ ايتۋىنشا, ليتسەنزيا الۋ تالاپتارى مەملەكەتتىك تاپسىرىس الۋ شارتتارىنا وتە ۇقساس.
«بالاباقشا بارلىق نورماتيۆكە تولىق ساي بولۋى كەرەك. بۇل – ادىستەمەلىك قۇرالدار, دامىتۋشى جابدىقتار جانە قاجەتتى پەداگوگيكالىق قۇرام دەگەن ءسوز. قازىر مۇنداي تالاپتارعا بارلىق ۇيىم بىردەي سايكەس كەلە بەرمەيدى», دەدى ول.
ۇلتتىق پالاتا وكىلدەرى ليتسەنزيالاۋ جۇيەسى كەيبىر جەكەمەنشىك بالاباقشالاردىڭ كولەڭكەلى نارىققا كەتۋىنە اسەر ەتۋى مۇمكىن ەكەنىن دە جوققا شىعارمايدى. ويتكەنى تالاپتاردى ورىنداي الماعان ۇيىمدار زاڭسىز جۇمىس ىستەۋگە تىرىسۋى ىقتيمال.
جاڭا ءتارتىپ كەلەسى جىلدان باستاپ كۇشىنە ەنەدى. ونىڭ مەكتەپكە دەيىنگى ءبىلىم بەرۋ سالاسىنا قالاي اسەر ەتەتىنى ۋاقىت وتە بەلگىلى بولادى.
