فوتو: اشىق دەرەككوز
سينوپتيكتەردىڭ مالىمەتىنشە, ماۋسىم ايىندا ەلدىڭ باسىم بولىگىندە كۇن ادەتتەگىدەن جىلى بولادى. ال شىعىس وڭىرلەردە جانە سولتۇستىك-باتىستىڭ شەتكى ايماقتارىندا تەمپەراتۋرا قالىپتى دەڭگەيدە ساقتالادى. كۇندىز اۋا تەمپەراتۋراسى +30...+38 گرادۋستان +15...+20 گرادۋسقا دەيىن قۇبىلىپ تۇرادى. وڭتۇستىكتە كەي كۇندەرى اپتاپ ىستىق +45 گرادۋسقا دەيىن جەتەدى.
سونىمەن قاتار ىستىق كۇندەردى سالقىن اۋا رايى الماستىرىپ, نوسەر جاڭبىر, نايزاعاي, بۇرشاق جانە ەكپىندى جەل بولجانعان. ەلدىڭ سولتۇستىگى مەن شىعىسىندا, سونداي-اق وڭتۇستىك-شىعىستاعى تاۋلى ايماقتاردا 10 ماۋسىمعا دەيىن تۇنگى جانە تاڭعى ۋاقىتتا ۇسىك ءجۇرۋى مۇمكىن.
سينوپتيكتەردىڭ مالىمەتىنشە, شىلدە ايى بىرقالىپتى ىستىق بولادى. تەمپەراتۋرا ەلدىڭ باسىم بولىگىندە +18...+24 گرادۋس, وڭتۇستىكتە +25...+30 گرادۋس, ال وڭتۇستىك-شىعىس پەن شىعىستىڭ تاۋلى وڭىرلەرىندە +9...+17 گرادۋس شاماسىندا بولادى.
تامىز ايىندا قازاقستاننىڭ باسىم بولىگىندە ىستىق اۋا رايى كۇتىلەدى. تەمپەراتۋرا كليماتتىق نورمادان 1-2 گرادۋسقا جوعارى بولادى.
«قازگيدرومەت» ماماندارى جاز مەزگىلىندەگى جاۋىن-شاشىن كولەمى جالپى العاندا قالىپتى دەڭگەيدە دەپ بولجاپ وتىر. الايدا جاۋىن مولشەرى ماۋسىمدا – وڭتۇستىك-باتىستا, سولتۇستىك پەن ورتالىقتىڭ كەي اۋداندارىندا, شىلدەدە – باتىس, وڭتۇستىك-باتىس, وڭتۇستىك جانە وڭتۇستىك-شىعىستا, تامىزدا – وڭتۇستىك-باتىس, ورتالىق جانە وڭتۇستىك پەن شىعىستىڭ كەي ايماقتارىندا قالىپتى مولشەردەن از بولۋى مۇمكىن.
سينوپتيكتەر ماۋسىمدىق بولجامنىڭ الدىن الا كەڭەس سيپاتىندا جاسالاتىنىن, ياعني ناقتى ەمەس ەكەنىن ەسكە سالدى. كەيىن ول ايلىق, ونكۇندىك, اپتالىق جانە تاۋلىكتىك ناقتى بولجامدارمەن تولىقتىرىلىپ وتىرادى.
ايتا كەتەيىك, الداعى دەمالىس كۇندەرى ەلىمىزدىڭ باسىم بولىگىندە اپتاپ ىستىق بولادى.
