فوتو: تجم
پرەمەر-ءمينيستردىڭ ورىنباسارى قانات بوزىمباەۆ اقتاۋ ماڭىنداعى ۇشاق اپاتى ورنىنداعى ۇكىمەتتىك كوميسسيانىڭ جۇمىسى تۋرالى ەسەپ بەردى.
بوزىمباەۆتىڭ ايتۋىنشا, قۇتقارۋ قىزمەتى ىزدەۋ جۇمىستارىن اياقتاعان. ۇشاق اپاتى سالدارىنان 29 ادام اۋرۋحاناعا جاتقىزىلسا, 38 ادام قازا تاپقان. پاتسيەنتتەر ءتۇرلى جاراقاتتارمەن اۋرۋحاناعا جەتكىزىلگەن. جاعداي تۇراقتانعاننان كەيىن ولار پروفيلدەر بويىنشا اۋرۋحاناعا جاتقىزىلىپ, تولىق كولەمدە ەم الىپ جاتىر. سونداي-اق سانيتارلىق اۆياتسيا جەلىسى ارقىلى استانادان ۇلتتىق شۇعىل مەديتسينا ورتالىعى مەن جەتەكشى رەسپۋبليكالىق ورتالىقتاردىڭ جوعارى بىلىكتى ماماندارى بارعان. ەل ماماندارىنان بولەك رف تجم ارنايى كەڭەسى مەن ازەربايجان رەسپۋبليكاسىنىڭ سانيتارلىق اۆياتسيا بريگاداسى دا كەلىپ جەتكەن.
زارداپ شەككەندەر مەن قازا تاپقانداردىڭ تۋىستارى كەلگەندە, ولارعا وبلىس اكىمدىگى ترانسفەرت, ورنالاستىرۋ جانە تاماقتانۋ بويىنشا قاجەتتى كومەك كورسەتپەك. پسيحولوگتار توبى دا جۇمىس ىستەپ جاتىر.
ءوز كەزەگىندە كولىك مينيسترلىگى ازەربايجان رەسپۋبليكاسى ۇكىمەتىمەن بىرلەسىپ جۇمىس ىستەيدى. ەرتەڭ برازيليانىڭ اۆياتسيالىق بيلىگى مەن Embraer كومپانياسى كەلەتىنى دە ايتىلدى. تۇپقاراعان اۋدانىندا جەرگىلىكتى تەحنوگەندىك سيپاتتاعى توتەنشە جاعداي رەجيمى جاريالاندى.
پرەزيدەنت قاسىم-جومارت توقاەۆتىڭ تاپسىرماسى بويىنشا زارداپ شەككەندەرگە تولىق كولەمدە مەديتسينالىق كومەك كورسەتىلىپ, قازا تاپقانداردىڭ تۋىستارى مەن جاقىندارىنا قاجەتتى قولداۋ شارالارى ۇسىنىلىپ جاتىر. قازىر جەدەل جەلى جۇمىس ىستەپ تۇر, وعان مىڭنان استام قوڭىراۋ تۇسكەن.
ء«بىرىنشى كەزەكتە قازا تاپقانداردىڭ تۋىستارى مەن جاقىندارىنا كوڭىل ايتامىن. قازاقستان ۇكىمەتى مەن ۋاكىلەتتى ورگاندار زارداپ شەككەندەرگە جانە قايتىس بولعانداردىڭ تۋىستارىنا بارلىق قاجەتتى كومەكتى كورسەتىپ جاتىر», دەدى ولجاس بەكتەنوۆ.
پرەمەر-مينيستر اۆياتسيالىق قاۋىپسىزدىكتى كۇشەيتۋ جونىندە بىرقاتار تاپسىرما بەردى.
