«ۇلتتىق قور - بالالارعا»: باعدارلاما قالاي ىسكە اسىپ جاتىر

باعدارلامانىڭ ماقساتى مەن ارەكەت ەتۋ تەتىگى

جىلدىڭ جاعىمدى جاڭالىقتارىنىڭ ءبىرى «ۇلتتىق قور – بالالارعا» جوباسىنىڭ نەگىزگى ماقساتى – وسكەلەڭ ۇرپاقتى قولداۋ جانە ولارعا ۇلتتىق جيناق ەسەبىنەن تۇرعىن ءۇي جاعدايلارىن جاقسارتۋ نەمەسە ءبىلىم الۋعا مۇمكىندىك بەرۋ. 

جوبا اياسىندا بالالارعا باعدارلاماعا قاتىسقان ءاربىر جىلى ءۇشىن جىل سايىن ەسەپتى جىلدان كەيىنگى جىلدىڭ باسىندا ۇلتتىق قوردان ينۆەستيتسيالىق كىرىستى قوسا العاندا, نىسانالى تالاپتار تۇرىندەگى قاراجات ەسەپتەلىپ وتىرادى. بۇل بالا 18 جاسقا تولعانعا دەيىن جالعاسادى.

بالا 18 جاسقا تولعان جىلى نىسانالى جيناقتاردى تۇرعىن ءۇي جاعدايلارىن جاقسارتۋ نەمەسە ءبىلىم الۋ اقىسىن تولەۋ ماقساتىندا پايدالانۋ قۇقىعىنا يە بولادى. 

2024 جىلعى 1 قاڭتاردان باستاپ «ۇلتتىق قور – بالالارعا» باعدارلاماسىنىڭ قاتىسۋشىلارى رەتىندە قوسا العاندا 01.01.2006 ج. باستاپ 31.12.2023 ج. تۋعان قازاقستان رەسپۋبليكاسىنىڭ ازاماتتارى بولىپ ەسەپتەلەتىن بالالار تىركەلدى. كەلەسى جىلدارى تۋعان بالالار دا اۆتوماتتى تۇردە باعدارلامانىڭ قاتىسۋشىسى بولىپ بەكىتىلەدى.

العاشقى ناتيجەلەر

2024 جىلدىڭ 1 اقپانىندا قازاقستان ازاماتى بولىپ ەسەپتەلەتىن بارلىق بالا ءۇشىن بجزق-عا ۇلتتىق قوردان العاشقى قارجى اۋدارىلعان. سول كەزدە باعدارلاماعا قاتىسۋشىلار سانى 6 919 131 بولعان. ولاردىڭ ىشىندە بيىل 18 جاسقا تولاتىن 304 815 بالا بار ەدى. ولارعا قارجى بجزق-دا اشىلاتىن نىسانالى جيناقتاۋ شوتتارىنا (نجش) تۇسەدى. ايتا كەتەيىك, اقشانى تۇرعىن ۇيگە نەمەسە ءبىلىم الۋعا جۇمساۋعا بولادى.

باعدارلاما ىسكە قوسىلعاننان كەيىنگى 5 كۇن ىشىندە نىسانالى جيناق تولەمىن الۋعا 30-دان استام ءوتىنىم تۇسكەن ەكەن. ولار بويىنشا تولەم جاسالدى.

2023 جىل ءۇشىن اۋدارىلعان سوما 100 اقش دوللارى 52 تسەنتتى قۇراعان. جىل سايىن بۇل سوما ۇلتتىق قور ءوسىمى مەن ينۆەستيتسيالىق كىرىس ەسەبىنەن ۇلعايىپ وتىراتىنىن ايتا كەتۋ كەرەك.

ۇلتتىق قوردىڭ ينۆەستيتسيالىق كىرىسى جىلدىق ماندە - 1,39 ميلليارد اقش دوللارى. بۇل ۇلتتىق قوردىڭ 18 جىلداعى ورتاشا جىلدىق كىرىسى. قوردىڭ ينۆەستيتسيالىق كىرىسىنىڭ 50% مولشەرى – بۇل 2024 جىلى ەسەپتەلەتىن نىسانالى تالاپتار سوماسى, ياعني 695,5 ميلليون اقش دوللارى. 695,5 ملن اقش دوللارى / 6 919 131 بالا = ارقايسىسىنا 100,52 اقش دوللارىنان ۇلەستىرىلگەن.

باعدارلاماعا قاتىسۋ دەرەگىن قالاي تەكسەرۋگە بولادى؟  

بجزق بالالار تۋرالى بارلىق مالىمەتتى «جەكە تۇلعالار» مەملەكەتتىك دەرەكقورىنان (جتمدق) الىپ وتىرادى. بالانىڭ باعدارلاماعا قاتىسۋ دەرەگى جانە وعان ەسەپتەلگەن نىسانالى تالاپتار تۋرالى اقپاراتتى كامەلەتكە تولماعان بالانىڭ اتا اناسى نەمەسە باسقا زاڭدى وكىلدەرى ارنايى قۇرىلعان kids.enpf.kz سايتىنان بالانىڭ جسن بويىنشا تەكسەرە الادى. سونداي-اق ءاربىر بالاعا جاسالعان ەسەپتەۋلەر تۋرالى مالىمەت egov.kz پورتالىنداعى «جەكە كابينەتتە» قولجەتىمدى.

كامەلەتكە تولعان ازامات نىسانالى جيناقتارىن enpf.kz سايتىنداعى «جەكە كابينەتىندە», بجزق ۇيالى قوسىمشاسىندا نەمەسە egov.kz پورتالىندا ءوز بەتىنشە دە تەكسەرە الادى. 

«ۇلتتىق قور - بالالارعا» باعدارلاماسى ىسكە قوسىلعان ءبىرىنشى كۇنى - 2024 جىلدىڭ 1 اقپانىندا kids.enpf.kz سايتىنا 2,7 ميلليوننان اسا ادام كىردى. جسن بويىنشا شامامەن 5,5 ملن سۇرانىس وڭدەلدى.

2024 جىلعى 1 ساۋىردەگى جاعداي بويىنشا بجزق جالپى سوماسى 199 323,1 اقش دوللارىنا 1992 ءوتىنىشتى ورىندادى. ونىڭ ىشىندە تۇرعىن ءۇي جاعدايلارىن جاقسارتۋ ماقساتىندا - 78 798,04 $ سوماسىنا 788 ءوتىنىش, ءبىلىم بەرۋ اقىسىن تولەۋ ءۇشىن - 120 525,06 $ سوماسىنا 1204 ءوتىنىش ورىندالدى.

بجزق دەرەكتەرىنە سايكەس, 1 شىلدەگە قاراي تۇرعىن ءۇي جاعدايىن جاقسارتۋعا جانە ءبىلىم بەرۋ اقىسىن تولەۋگە 16,6 مىڭ ءوتىنىم بەرىلدى, ونىڭ ىشىندە 13 مىڭعا جۋىعى جالپى سوماسى $1,3 ميلليونعا ورىندالدى. بالالارعا كەلەسى قاراجات ەسەپتەۋ 2025 جىلدىڭ اقپان ايىندا جوسپارلانىپ وتىر.

قورىتىندىلاي كەلە, «ۇلتتىق قور - بالالارعا» باعدارلاماسى 2024 جىلدىڭ ەڭ ماڭىزدى الەۋمەتتىك جوبالارىنىڭ ءبىرى ەكەنىن اڭعارامىز. اتالمىش جوباعا مەملەكەت باسشىسى قاسىم-جومارت توقاەۆ باستاماشى بولعان. پرەزيدەنت جوبانىڭ ماڭىزى تۋرالى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا دا ايتىپ وتكەن.

ء«اربىر وتباسى ەلىمىز پايدالانىپ جاتقان ۇلتتىق بايلىقتىڭ يگىلىگىن كورۋى كەرەك. سوندىقتان, مەن جاريالاعان بالالار جىلىنىڭ اياسىندا «ۇلتتىق قور – بالالارعا» اتتى مۇلدە جاڭا باعدارلامانى جۇزەگە اسىرۋ وتە ماڭىزدى دەپ سانايمىن. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالاتىن بولادى. بۇل قاراجات وسكەلەڭ ۇرپاقتىڭ ۇلكەن ومىرگە قادام باسۋىنا مۇمكىندىك بەرەدى. قور, شىن مانىندە, ۇلتتىق مارتەبەگە يە بولىپ, حالقىمىزدىڭ يگىلىگىنە قىزمەت ەتەدى», دەگەن ەدى پرەزيدەنت.

وسىلايشا, اتالعان يگى باستاما ارقىلى ەل بولاشاعى - بالالاردىڭ ساپالى ءبىلىم الۋىنا جانە باسپانامەن قامتاماسىز ەتىلۋىنە جاعداي جاسالىپ وتىر.