فوتو: وبلىس اكىمىنىڭ ءباسپاسوز قىزمەتى
ءوڭىر باسشىسى كوپشىلىكتى كەلە جاتقان جاڭا جىل مەرەكەسىمەن جانە عيماراتتىڭ اشىلۋىمەن قۇتتىقتادى.
«ەل پرەزيدەنتى جولداۋىندا بالالاردىڭ سپورتپەن اينالىسۋىنا جاعداي جاساۋ قاجەت ەكەنىن ايتتى. وسى باعىتتا وبلىستا سپورت ينفراقۇرىلىمىن جاقسارتۋعا كوڭىل ءبولىنىپ جاتىر. وڭىردە 3500-دەن استام سپورت نىسانى بار. بيىل 11 ايدا وبلىستا 10 ءىرى سپورت كەشەنى پايدالانۋعا بەرىلدى. تۇركىستان قالاسى وبلىس ورتالىعى بولعالى بەرى شاھاردا «تۇركىستان-ارەنا» ستاديونى, «Olympic Center» سپورت كەشەنى, «تەننيس ورتالىعى», «مۇز سارايى» عيماراتتارى پايدالانۋعا بەرىلىپ, سپورتشىلارىمىز تىڭعىلىقتى جاتتىعىپ جاتىر. قازىرگى تاڭدا ەسكەك ەسۋ كانالى مەن حالىقارالىق تالاپقا ساي اتشاباردىڭ قۇرىلىسى جۇرگىزىلىپ جاتىر. بۇنىڭ ءبارى – سپورت سالاسىنا جاسالعان قامقورلىق ءارى ۇلكەن قولداۋ. ال بۇگىن قازاق حالقىنىڭ داڭقتى پەرزەنتى, تۇركىستاننان شىققان وليمپيادا چەمپيونى بەكزات ساتتارحانوۆ اتىنداعى سپورت كەشەنى ەل يگىلىگىنە بەرىلىپ وتىر. وڭىردە چەمپيوننىڭ اتىن ۇلىقتاۋ باعىتىندا جۇيەلى جۇمىستار اتقارىلىپ كەلەدى. بۇگىن اشىلعالى تۇرعان سپورت كەشەنىن دە ەل پەرزەنتىنە لايىقتى قۇرمەت دەپ بىلەمىز. ءبىز سپورتتى دامىتۋ باعىتىنداعى جۇمىستى جالعاستىرا بەرەمىز», دەدى دارحان ساتىبالدى.
بەكزاتتىڭ اناسى سىرلىكۇل ساتتارحانوۆا يگى ىسكە مۇرىندىق بولعان ازاماتتارعا العىسىن ايتىپ, ايماقتا «چەمپيوننىڭ ءىزباسارلارى كوبەيە بەرسىن» دەگەن تىلەگىن جەتكىزدى.
«سامۇرىق-قازىنا» اق كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ تا كوپشىلىكتى قۇتتىقتاپ, جاڭا عيمارات چەمپيونداردى دايارلاۋعا ۇلەسىن قوساتىنىن اتاپ ءوتتى.
تۇركىستان وبلىسى اكىمىنىڭ ءباسپاسوز قىزمەتىنىڭ ءمالىم ەتۋىنشە عيماراتتىڭ قۇرىلىسىنا وبلىس اكىمدىگى تاراپىنان 2,7 ملرد تەڭگە باعىتتالعان. «سامۇرىق-قازىنا» اق كومپانيالار توبى اتىنان «Samruk-Kazyna Trust» قايىرىمدىلىق قورىنان تەحنولوگيالىق قۇرال-جابدىقپەن قامتاماسىز ەتۋگە, ىشكى ارلەۋگە, ينجەنەرلىك ينفراقۇرىلىممەن قامتاماسىز ەتۋگە 500 ملن تەڭگە بولىنگەن. عيماراتتىڭ اۋدانى – 7248 شارشى مەتر, جالپى جەر اۋدانى – 1,8 گەكتار.
سپورت كەشەنىندە بوكس, قازاق كۇرەسى, گرەك-ريم, ەركىن كۇرەس, ايەلدەر كۇرەسى, تاەكۆوندو, كاراتە, ۇستەل تەننيسى جانە ويىن سپورت تۇرلەرىن دامىتۋعا مۇمكىندىك بار. 300-دەن استام جانكۇيەر سىياتىن كورەرمەن زالى, جاتتىعۋ زالدارىمەن قامتىلعان. رەسپۋبليكالىق جانە حالىقارالىق جارىستاردى وتكىزۋگە بولادى.
ايتا كەتسەك, تۇركىستان وبلىسىندا سپورت قارقىندى دامىپ كەلەدى. وڭىردە 29 وليمپيادالىق, 34 ۇلتتىق جانە وليمپيادالىق ەمەس سپورت تۇرلەرى دامىپ جاتىر. بيىل وبلىس سپورتشىلارى الەم چەمپيوناتتارىنان 106 مەدال, ازيا چەمپيوناتتارىنان 214 مەدال جەڭىپ الدى. دۇنيەجۇزىلىك كوشپەلىلەر ويىندارىندا 16 التىن, 10 كۇمىس, 5 قولا مەدال ولجالادى.
