كەڭەس وكىمەتى ورناعاننان كەيىن بولشەۆيكتەر قازاقتىڭ جانە وزگە دە بۇراتانا ۇلت وكىلدەرىنىڭ تەگىنە «وۆ», «وۆا» سىندى وتارشىلدىق قارعىباۋىن تاعىپ بەرگەنى ءمالىم. ازاتتىق جايىنداعى اڭگىمە قۇر ارمان-قيال ەمەس, شىندىققا اينالا باستاعان تۇستا تەگىمىزدەگى ءبىزدىڭ ۇلتقا ءتان ەمەس جۇرناقتان ارىلۋ تۋرالى ماسەلە دە ءجيى كوتەرىلە باستاعان ەدى. سول كەزدە «سوتسياليستىك قازاقستان» دەپ اتالعان ءبىزدىڭ باسىلىم بەتىندە دە بۇل جايىندا كوپتەگەن ماتەريال جارىق كوردى. تەك ءسوز جۇزىندە ماسەلە كوتەرمەي, قازاق جۋرناليستيكاسىنىڭ ابىزى شەرحان مۇرتازا باستاعان گازەت ۇجىمىنىڭ «وۆ», «وۆا» جۇرناعىنان ءبىر كۇندە ارىلىپ, كوپكە ۇلگى كورسەتكەنىن بىرەۋ بىلسە, بىرەۋ بىلمەيدى. ناقتىراق ايتقاندا, 1991 جىلى 15 مامىر كۇنى باس رەداكتوردان باستاپ بۇكىل قىزمەتكەر ءوز تەكتەرىن «وۆ»-سىز جازا باستاعان ەدى. كەيىن وسى ءۇردىس وزگە دە بۇقارالىق اقپارات قۇرالدارىنا تارالىپ, باسپاسوزگە قازاقى اتى-جونمەن شىعۋ يگى داستۇرگە اينالدى. ايتا كەتەيىك, سول وقيعادان تۋرا ءبىر ايدان كەيىن, ياعني 1991 جىلدىڭ 18 ماۋسىمىندا گازەتىمىزدىڭ اتاۋى «ەگەمەندى قازاقستان» بولىپ اۋىستى.
باسىلىمنىڭ سول جىلعى 28 قاراشاداعى سانىندا جۋرناليست قاراشاش امزەقىزىنىڭ «وۆ», «وۆا»-دان قاشان قۇتىلامىز؟» اتتى ماقالاسى جاريالانعان. «ارامىزدا ءارتۇرلى پىكىر تۋعىزىپ, بىرەۋ قابىلداپ, بىرەۋ قابىلداي الماي جۇرگەن وزەكجاردى اڭگىمەنىڭ ءبىرى – فاميليامىزعا جامىلعان «وۆ», «وۆا»-دان قالاي قۇتىلۋ كەرەكتىگى گازەتىمىزدە مۇنان بۇرىن دا تالاي رەت جازىلعان ەدى» دەگەن اۆتور گازەت وقىرمانىنىڭ وسى ماسەلەگە قاتىستى جولداعان حاتىنان ءۇزىندى كەلتىرەدى. «گازەتتەرىڭىزدى جۇرت سۇيسىنە وقيدى. جاڭالىقتىڭ جارشىسى بولدىڭىزدار. ەل-جۇرتتىڭ ويىندا جۇرگەندى وسى گازەتتەن وقيمىز. كوزى اشىق, كوكىرەگى وياۋ قاۋىم بۇگىنگى اياقالىستارىنان اينىماسا ەكەن دەگەن تىلەكتە. اسىرەسە فاميليامىزعا جامالعان «وۆ», «وۆا»-دان قۇتىلۋدى وزدەرىڭىزدەن باستاپ, باسقالارعا ۇلگى بولدىڭىزدار», دەپ جازادى اقتوبە وبلىسىنىڭ تۇرعىنى امانكوز سەيىلوۆ.
حاتتىڭ سوڭىندا ول «وۆ» جۇرناعىن الىپ تاستاۋدى كوپشىلىك جاپپاي قولداعانىمەن, قۇجات اۋىستىرعاندا كەزدەسەتىن قيىندىقتار شاش-ەتەكتەن ەكەنىن ايتىپ قىنجىلادى. ويتكەنى ءبىر ادامنىڭ باسىندا قانشا قۇجات بار, سونىڭ ءبارىن اۋىستىرۋعا تۋرا كەلەتىنىن, كوپ ادام وسى ماشاقاتتان قاشىپ, بۇرىنعى تەگىمەن قالا بەرگەندى ءجون كورەتىنىن ايتىپتى.
تاۋەلسىزدىك الماي تۇرىپ باستالعان وسىناۋ «وتارسىزدانۋ» ءۇردىسى ءالى كۇنگە جالعاسىن تاۋىپ كەلەدى. بىراق تولىقتاي «قازاق» بولدىق دەپ ايتۋعا دا ءالى ەرتە. كەيىنگى كەزدە دۇنيەگە كەلىپ جاتقان بالالارىنا تەگىن بەرگەندە «وۆ»-تى قوسپاۋ, سونداي-اق ەرەسەك ادامدار اراسىندا دا سانالى تۇردە وتارشىلدىق قارعىباۋىنان ارىلىپ جاتقاندار كوپ. بۇل, ارينە, قۋانتارلىق جايت. دەگەنمەن «ادامدار اتىم مەن تەگىمدى شاتاستىرادى», «بۇكىل قۇجاتىڭدى دا اۋىستىرۋ كەرەك», «شەتەلگە شىققاندا قيىندىق بولادى» دەگەن جەلەۋمەن ءالى كۇنگە فاميلياعا «وۆ» جۇرناعىن تەلۋدى زاڭدىلىق سەكىلدى كورەتىن زامانداستارىمىز دا از ەمەس. بۇرىن اتا-بابامىز «پالەنشە ۇلى» دەپ جازۋشى ەدى, ال بۇگىنگىلەر « ۇلى» بولۋدان ءالى دە قورقاقتايدى.
شىن مانىندە بۇل ايتىلىپ وتىرعان سەبەپتەردىڭ ءبارى – نەگىزسىز. قازىرگى تاڭدا قۇجاتتاعى اتى-ءجونىڭدى قازاقشالاۋ, «وۆ», «وۆا», «ين» سەكىلدى جۇرناقتاردى الىپ تاستاۋ, ءتىپتى تەگىڭدى اۋىستىرۋ – حالىققا قىزمەت كورسەتۋ ورتالىعىندا ء«بىر تەرەزە» ارقىلى شەشىلەتىن ماسەلە. بۇرىنعىداي سان ەسىكتى قاعىپ شاپقىلامايسىڭ. ارينە, تەگىڭدى اۋىستىرامىن دەسەڭ, الدىمەن احاج-عا بارىپ, تۋ تۋرالى كۋالىگىڭدى اۋىستىرۋ كەرەك. بۇل دا – قازىرگى كۇنى قيىن شارۋا ەمەس. ءارى دەگەندە جارتى ساعات كولەمىندە شەشىلەدى, سوسىن ءبىر اپتا ىشىندە جاڭا قۇجاتتى الىپ كەتۋگە عانا باراسىڭ.
جاڭا قۇجاتتى العاندا قولىڭىزعا «تەگىن, اتىن, اكەسىنىڭ اتىن وزگەرتۋ تۋرالى كۋالىكتى» قوسا بەرەدى. حقو ماماندارىنىڭ ايتۋىنشا, باسقا ەشقانداي قۇجاتتى (ديپلوم, نەكە كۋالىگى, بالالاردىڭ تۋ تۋرالى كۋالىكتەرى, اتتەستات, ت.ب.) اۋىستىرۋدىڭ قاجەتى جوق. سۇراعان جەرگە اتى-ءجونى اۋىسقانى تۋرالى كۋالىكتى كورسەتسە جەتكىلىكتى. ال بۇل قۇجاتتىڭ ءبارى قازىر ەGov سايتى مەن kaspi قوسىمشاسىندا قولجەتىمدى ەكەنىن, ونى وزىڭمەن تاسىپ ءجۇرۋ قاجەت ەمەس ەكەنىن ەسكەرسەك, «وۆ»-سىز دالادا قالامىن دەپ الاڭداۋدىڭ ەشبىر ءجونى جوق.
سوندىقتان « ۇلى» بولۋدان قورىقپايىق. تاۋەلسىز ەل ۇلاندارىنىڭ اتى-جونىنەن دە ازاتتىقتىڭ ايبارى كورىنىپ تۇرعانى جاقسى ەمەس پە؟
