فوتو جي كومەگىمەن جاسالعان
EDF, Framatome مەن Orano كومپانيالارىنىڭ باسشىلىعىمەن وتكەن كەلىسسوزدەر بارىسىندا ءبىزدىڭ ەلدەگى اتوم-ەنەرگەتيكالىق جوبالاردى ىسكە اسىرۋعا فرانتسۋز كومپانيالارىنىڭ قاتىسۋ مۇمكىندىكتەرى, سونداي-اق ىنتىماقتاستىقتىڭ پەرسپەكتيۆالارى ەكونوميكالىق تيىمدىلىك پەن ۇزاق مەرزىمدى تۇراقتىلىق تۇرعىسىنان تالقىلاندى.
فرانتسيانىڭ يادرولىق رەتتەۋ ورگانى – ASNR باسشىلىعىمەن كەزدەسۋدە اتوم سالاسىن مەملەكەتتىك رەتتەۋ, يادرولىق ءارى رادياتسيالىق قاۋىپسىزدىكتى قامتاماسىز ەتۋ, سونداي-اق اەحا ۇسىنىمدارى مەن حالىقارالىق ستاندارتتارعا سايكەس تاجىريبە الماسۋ ماسەلەلەرى قارالدى. تاراپتار رەتتەۋشى ورگانداردىڭ ينستيتۋتسيونالدىق تاۋەلسىزدىگىنىڭ ماڭىزدىلىعىن اتاپ ءوتىپ, ساراپتامالىق ىنتىماقتاستىقتى دامىتۋعا دايىن ەكەندەرىن ءبىلدىردى.
كادرلىق الەۋەتتى دامىتۋ ماسەلەلەرىنە ەرەكشە نازار اۋدارىلدى. I2EN اتقارۋشى ديرەكتورىمەن وتكەن كەزدەسۋدە ەلىمىزدىڭ ازاماتتىق يادرولىق ەنەرگەتيكا سالاسىنا ارنالعان مامانداردى دايارلاۋ تاسىلدەرى تالقىلاندى. فرانتسۋز تاراپى كادرلىق الەۋەتتى دامىتۋعا باعىتتالعان قولداۋ باعدارلاماسىنىڭ الدىن الا تۇجىرىمداماسىن ۇسىنىپ, تاراپتار كادر دايارلاۋ جونىندەگى جول كارتاسىن بىرلەسىپ ازىرلەۋ تۋرالى ۋاعدالاستى.
بۇعان قوسا فرانتسيا رەسپۋبليكاسىنىڭ ەۋروپا جانە سىرتقى ىستەر مينيسترلىگى, سونداي-اق ەكونوميكا, قارجى, ونەركاسىپ, ەنەرگەتيكا مەن تسيفرلىق ەگەمەندىك مينيسترلىگى وكىلدەرىمەن كەزدەسۋلەر وتكىزىلىپ, ەكىجاقتى ەكونوميكالىق ءارى ينۆەستيتسيالىق ىنتىماقتاستىقتى كەڭەيتۋ مەن ونەركاسىپتىك كووپەراتسيا ماسەلەلەرى باستى تاقىرىپقا اينالدى.
پاريج قالاسىندا وتكەن كەزدەسۋلەر قازاقستان مەن فرانتسيانىڭ اتوم ەنەرگەتيكاسى سالاسىنداعى ستراتەگيالىق ارىپتەستىكتى تەرەڭدەتۋگە ءارى بىرلەسكەن جوبالاردى ىسكە اسىرۋعا ءوزارا مۇددەلىلىگىن راستادى.
