فوتو: استانا اكىمدىگى
«ەلوردامىزدى كوگالداندىرۋ جانە كوركەيتۋ جۇمىسىن اۋقىمدى جۇرگىزىپ جاتىرمىز. بيىل 170-تەن استام اۋلا مەن قوعامدىق ورىندى (ساياباقتار, گۇلزارلار, جەلەكجولدار) اباتتاندىرامىز. سونداي-اق, بيىل 1,1 ميلليوننان استام جاسىل جەلەك (كوشەتتەر, بۇتالار, اعاشتار) وتىرعىزامىز», دەپ جازدى قالا اكىمى.
جەڭىس قاسىمبەكتىڭ ايتۋىنشا, اباتتاندىرۋ جۇمىسى استانانىڭ بارلىق اۋدانىن قامتيدى.
«قالانىڭ ماڭىزدى جوبالارىنىڭ ءبىرى – كىشى تالدىكولدەگى ەكوپارك. اباتتاندىرۋ جۇمىسى كەزەڭ-كەزەڭىمەن جۇرگىزىلەدى. قازىرگى ۋاقىتتا اۋماقتا دايىندىق جانە ينجەنەرلىك جۇمىس باستالدى. جوبا اياسىندا سۋ قويماسىنىڭ جەكەلەگەن ۋچاسكەلەرىن تازارتۋ, ءتۇبىن تەرەڭدەتۋ جۇمىسى, اۋماقتى دايىنداۋ جانە بولاشاق ەكوپاركتىڭ بازالىق ينفراقۇرىلىمىن قالىپتاستىرۋ جۇمىسى ءجۇرىپ جاتىر», دەدى جەڭىس قاسىمبەك.
بيىل مىناداي ءىس-شارالار جوسپارلانىپ وتىر:
- سۇزگى جۇيەسى بار تەحنيكالىق بولمەلەردىڭ قۇرىلىسى;
- اكۆاتوريادا سۋ دەڭگەيىن ساقتاۋ ءۇشىن ۇڭعىمالاردى ىسكە قوسۋ;
- العاشقى سەرۋەندەۋ باعىتتارىن قۇرۋ;
- اۋماقتى اۋقىمدى كوگالداندىرۋدى باستاۋ.
«وسى كۇزدە اعاشتار مەن جاسىل جەلەكتەر وتىرعىزۋدىڭ ءبىرىنشى كەزەڭى باستالادى. جۇمىس تابيعي ورتانى جانە قولدانىستاعى لاندشافتى بارىنشا ساقتاي وتىرىپ جۇرگىزىلەتىن بولادى», دەدى قالا اكىمى.
كەلەسى جىلى جوسپارلانىپ وتىرعان ءىس-شارالار:
- سەرۋەندەۋ باعىتتارى مەن ەكولوگيالىق جاياۋ جولداردى اياقتاۋ;
- ۋاقىتتى تىنىشتىقتا وتكىزۋگە ارنالعان ورىندار اشۋ;
- اۋقىمدى كوگالداندىرۋ;
- اۋماقتىڭ تابيعي ەكوجۇيەسىن قورعاۋ جانە ساقتاۋ بويىنشا شەشىمدەردى جۇزەگە اسىرۋ.
«جوبانىڭ نەگىزگى مىندەتى – قالا ىرگەسىندە تابيعاتقا جانە بيوالۋانتۇرلىلىككە زيان كەلتىرمەي, ۋاقىتتى ءتيىمدى وتكىزۋگە ارنالعان تابيعي كەڭىستىك قۇرۋ», دەپ جازدى جەڭىس قاسىمبەك.
ايتا كەتەيىك, بيىل استانادا 173-كە جۋىق قوعامدىق جانە اۋلا كەڭىستىگىن اباتتاندىرۋ, سونداي-اق 1,1 ميلليوننان استام جاسىل جەلەك (كوشەتتەر, بۇتالار, گۇلدەر مەن اعاشتار) وتىرعىزۋ جوسپارلانىپ وتىر.
