فوتو: اشىق دەرەككوز
بۇل – قازاقستاننىڭ حالىقارالىق سپورت ارەناسىنداعى بەدەلى مەن ءىرى جارىستاردى جوعارى دەڭگەيدە ۇيىمداستىرۋ الەۋەتىن ايقىندايتىن ماڭىزدى شەشىم.
وليمپيادا باعدارلاماسىنا ەنگەن كۇرەس تۇرلەرىنەن الەم چەمپيوناتىن ەلىمىزدە وتكىزۋ تۋرالى شەشىمدى حالىقارالىق بىرىككەن كۇرەس الەمى (UWW) ۇيىمى قابىلدادى. UWW وكىلدەرى قازاقستانعا بىرنەشە مارتە ارنايى كەلىپ, ەلدەگى سپورت ينفراقۇرىلىمىنىڭ حالىقارالىق تالاپتارعا سايكەستىگىن, ءىرى سپورتتىق ءىس-شارالاردى ۇيىمداستىرۋ تاجىريبەسىن جانە دايىندىق دەڭگەيىن جان-جاقتى باعالادى. ناتيجەسىندە ۇيىم قازاقستاننىڭ الەمدىك دەڭگەيدەگى جارىستى جوعارى دەڭگەيدە وتكىزۋ مۇمكىندىگىنە كوز جەتكىزىپ, الەم چەمپيوناتىن قابىلداۋ قۇقىعىن ەلىمىزگە سەنىپ تاپسىردى.
ازيا چەمپيوناتىنا قازاقستان قۇراماسىن ريزابەك ايتمۇحان باستاپ بارادى
سونداي-اق بىلتىر بىرىككەن كۇرەس الەمى حالىقارالىق فەدەراتسياسىنىڭ پرەزيدەنتى نەناد لالوۆيچ قازاقستانعا رەسمي ساپارمەن كەلىپ, ەلورداداعى سپورت نىساندارىن ارالاعان ەدى. ساپار بارىسىندا ول استاناداعى سپورت كەشەندەرىنىڭ حالىقارالىق دەڭگەيدەگى ءىرى جارىستاردى وتكىزۋگە تولىق الەۋەتى بار ەكەنىن اتاپ وتكەن-ءدى.
جالپى كۇرەس تۇرلەرىنەن الەم چەمپيوناتىن وتكىزۋ – وتاندىق سپورت سالاسى ءۇشىن ۇلكەن جەتىستىك. بۇل ايتۋلى دودا قازاقستانداعى كۇرەس سپورتىن ودان ءارى دامىتۋعا, جاس بۋىننىڭ سپورتقا قىزىعۋشىلىعىن ارتتىرۋعا جانە حالىقارالىق دەڭگەيدەگى تاجىريبەنى كەڭەيتۋگە جاڭا سەرپىن بەرەدى.
ەركىن كۇرەس شەبەرلەرى بىشكەكتە قوس قولانى قاناعات تۇتتى
سونىمەن قاتار الەم چەمپيوناتى قازاقستاننىڭ سپورت سالاسىنداعى الەۋەتىن جاھاندىق دەڭگەيدە تانىتۋعا, حالىقارالىق ىنتىماقتاستىقتى نىعايتۋعا جانە ەلىمىزدىڭ جاعىمدى ءيميدجىن كۇشەيتۋگە ىقپال ەتەدى.
الەمدىك دەڭگەيدەگى بەدەلدى دودا 24 قازان مەن 1 قاراشا ارالىعىندا ۇيىمداستىرىلادى. جاھاننىڭ ۇزدىك پالۋاندارى باس قوساتىن بايراقتى باسەكە ەلورداداعى «بارىس ارەنا» سپورت كەشەنىندە وتەدى.
ايتا كەتەيىك, ازيا چەمپيوناتىنا قازاقستان قۇراماسىن ريزابەك ايتمۇحان باستاپ بارادى.
