فوتو: قر وقۋ-اعارتۋ مينيسترلىگى
وليمپيادانىڭ قورىتىندى كەزەڭىنە ەلىمىزدىڭ بارلىق وڭىرلەرىنەن 547 وقۋشى قاتىسىپ, ناتيجەسىندە 240 وقۋشى جۇلدەلى ورىندارعا يە بولدى.
وليمپيادا جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتار بويىنشا وتكىزىلدى.
بايقاۋدىڭ نەگىزگى ماقساتى – وقۋشىلاردىڭ پاندىك وليمپيادالارعا قىزىعۋشىلىعىن ارتتىرۋ, عىلىمي ءبىلىمدى ناسيحاتتاۋ, دارىندى بالالاردى انىقتاۋ جانە ولاردىڭ زياتكەرلىك الەۋەتىن دامىتۋ. سونىمەن قاتار, حالىقارالىق وليمپيادالارعا قاتىساتىن وقۋشىلاردى ىرىكتەۋ مەن دايارلاۋ, ەلىمىزدە ءبىلىم بەرۋ بەدەلىن ارتتىرۋ كوزدەلگەن.
ءتورت كۇنگە سوزىلعان ءبىلىم دوداسىنىڭ قورىتىندىسى بويىنشا جەڭىمپازدار مەن جۇلدەگەرلەر I, II جانە III دارەجەلى ديپلومدارمەن, سونداي-اق التىن, كۇمىس جانە قولا مەدالدارمەن ماراپاتتالدى. ناتيجەسىندە 45 وقۋشى I ورىن, 76 وقۋشى II ورىن, 119 وقۋشى III ورىن يەگەرى اتاندى.
كوماندالىق ەسەپ بويىنشا ەكى باعىتتا دا ۇزدىك كوماندالار انىقتالدى.
قوعامدىق-گۋمانيتارلىق باعىتتا بويىنشا گران-پري «NIS» دببۇ كومانداسىنا بۇيىردى. I ورىن – الماتى قالاسى كومانداسىنا, II ورىن – تۇركىستان جانە جەتىسۋ وبلىستارى كوماندالارىنا, III ورىن – شىمكەنت قالاسى, پاۆلودار, ماڭعىستاۋ جانە اقمولا وبلىستارى كوماندالارىنا بەرىلدى.
جاراتىلىستانۋ-ماتەماتيكالىق باعىتتا گران-پري اتىراۋ وبلىسى كومانداسىنا تابىستالدى. I ورىن «NIS» دببۇ جانە الماتى قالاسىنداعى كەاق «رفمم» كوماندالارىنا بەرىلدى. II ورىن – پاۆلودار جانە ماڭعىستاۋ وبلىستارى كوماندالارىنا, III ورىن – استانا قالاسى جانە اقتوبە وبلىسى كوماندالارىنا بۇيىردى.
وليمپيادا قورىتىندىسى ەلىمىزدەگى دارىندى وقۋشىلاردى قولداۋ جۇيەسىنىڭ تيىمدىلىگىن جانە وڭىرلەر اراسىنداعى ءبىلىم ساپاسىنىڭ جوعارى دەڭگەيىن كورسەتتى.
ايتا كەتەيىك, استانادا گەوگرافيادان ۇلتتىق وليمپيادا جەڭىمپازدارى انىقتالدى.
