فوتو: مادەنيەت جانە اقپارات مينيسترلىگى
مادەنيەت جانە اقپارات مينيسترلىگى قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى, اكتەر, رەجيسسەر بالتاباي سەيىتمامىت ۇلىنىڭ ومىردەن وزۋىنا بايلانىستى وتباسى مەن جاقىن تۋىستارىنا, تۋعان حالقىنا قايعىرا كوڭىل ايتتى.
بالتاباي سەيىتمامىت ۇلى – سانالى عۇمىرىن قازاق ساحنا ونەرىنە ارناعان سيرەك بولمىستى تۇلعا ەدى. ول عابيت مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر اكادەميالىق تەاترى مەن مۇحتار اۋەزوۆ اتىنداعى قازاق ۇلتتىق دراما تەاترىنىڭ التىن قورىنا اينالعان بەينەلەر گالەرەياسىن قالىپتاستىرىپ, كلاسسيكالىق جانە زاماناۋي دراماتۋرگيانى تەرەڭ فيلوسوفيالىق ويمەن, بيىك اكتەرلىك مادەنيەتپەن سومداي ءبىلدى.
«ۇلتتىق مادەنيەتتىڭ دامۋىنا سۇبەلى ۇلەس قوسقان بالتاباي سەيىتمامىت ۇلىنىڭ جارقىن بەينەسى, شىعارماشىلىق مۇراسى مەن عيبراتتى عۇمىر جولى حالقىمىزدىڭ جادىندا ماڭگى ساقتالادى دەپ سەنەمىز. مارقۇمنىڭ جانى ءجانناتتا, يمانى سالامات, توپىراعى تورقا بولسىن», دەپ جازىلعان حابارلامادا.
