فوتو: اقوردا
«ەكى ەل اراسىندا بۇرىننان تىعىز ءارى دوستىق قارىم-قاتىناس ورناعان. ساۋدا-ساتتىق تابىستى دامىپ جاتىر. قوس حالىقتىڭ ءبىر بىرىنە قۇرمەتى زور. ءىرى حالىقارالىق قۇرىلىمدار شەڭبەرىندە بىرلەسە ارەكەت ەتىپ كەلەمىز. بۇل – وتە ماڭىزدى. ەلشىلىكتەرىمىز بەلسەندى جۇمىس ىستەپ تۇر. ورايلى ءساتتى پايدالانا وتىرىپ, وزىڭىزبەن بىرگە چەح كاسىپكەرلەرىنەن قۇرالعان ۇلكەن دەلەگاتسيا الىپ كەلگەنىڭىز ءۇشىن العىس ايتامىن. كەشە استانادا بيزنەس-فورۋم ءوتتى. ونىڭ ناتيجەسى ەلدەرىمىزگە پايدالى بولادى دەپ ويلايمىن. ءوز تاراپىمنان سان قىرلى ىنتىماقتاستىعىمىزدى ودان ءارى دامىتۋعا بار كۇشىمدى سالامىن», دەدى پرەزيدەنت.
پرەزيدەنت اقوردادا چەح رەسپۋبليكاسىنىڭ پرەمەر-ءمينيسترىن قارسى الدى
اندرەي بابيش قوناقجايلىق تانىتقانى ءۇشىن قاسىم-جومارت توقاەۆقا ريزاشىلىعىن ءبىلدىرىپ, ەلىمىزدىڭ ءتۇرلى سالادا جەتكەن جەتىستىكتەرىنە جوعارى باعا بەردى.
«قازاقستان – ورتالىق ازياداعى اسا ماڭىزدى مەملەكەت. سوندىقتان وسىناۋ عاجاپ ەلگە ساپارمەن كەلۋ – مەن ءۇشىن زور مارتەبە. جاقىندا جاڭا كونستيتۋتسيا قابىلدادىڭىزدار. قۇتتى بولسىن! سىزدەردىڭ بۇل باعىتتاعى تاجىريبەلەرىڭىز بىزگە دە پايدالى بولادى دەپ ەسەپتەيمىن. قازاقستانعا كەلۋ كوپتەن بەرگى ارمانىم ەدى. ويتكەنى مەن ۋنيۆەرسيتەتتى اياقتاعاننان كەيىن, ياعني, 1978 جىلى شىمكەنت جانە جامبىل (تاراز) قالالارىمەن ءوزارا بايلانىس ورناتقان دەپارتامەنتتە جۇمىس ىستەدىم. قازاقستان – ەنەرگەتيكا سالاسىندا اسا ۇلكەن ورنى بار ەل, الەمدەگى ۋران وندىرەتىن ءىرى مەملەكەتتەردىڭ قاتارىنا كىرەدى. بۇگىندە اتوم ەلەكتر ستانتسيالارىنىڭ ماڭىزى ارتا ءتۇستى. سول سەبەپتى وسى سالادا كەلىسىمگە كەلگەنىمىزگە قۋانىشتىمىن. قازاقستاننىڭ جاساندى ينتەللەكت باعىتىنداعى جەتىستىكتەرى تاڭقالارلىق. ەكى ەلگە ورتاق دۇنيە كوپ. چەحيا مەن قازاقستان ۇكىمەتتەرى ءوزارا ىنتىماقتاستىقتى ودان ءارى ىلگەرىلەتۋ ءۇشىن ايانباي ەڭبەك ەتەدى دەپ ويلايمىن», دەدى ول.
