ارتۋر لاستاەۆ جاڭا كونستيتۋتسيا جوباسى اشىق جاريالانعانعا دەيىن ۇزاق جانە قاجىرلى جۇمىس جۇرگىزىلگەنىن اتاپ ءوتتى.
«بىرنەشە اي بويى بەلسەندى تالقىلاۋ. جۇمىس توبىندا دا, ءبىزدىڭ كوميسسيا وتىرىستارىندا دا. سەكتسيالاردا دا قىزۋ پىكىرتالاستار بولدى, ناقتى دالەلدەر كەلتىرىلىپ, ديسپۋتتار ءوتتى. بىراق ماقساتىمىز ورتاق بولدى – مەملەكەتىمىزدى ودان ءارى دامىتۋدىڭ تەڭگەرىمدى ستراتەگيالىق قۇجاتىن دايىنداۋ», دەدى ول.
ادام قۇقىقتارى جونىندەگى ۋاكىل وتىرىستاردىڭ ونلاين فورماتتا كورسەتىلگەنىن, وسىلايشا, قازاقستاندىق مەملەكەتتىلىكتىڭ ەڭ جوعارى نەگىزى جابىق ەمەس, كابينەت ىشىندە ەمەس, بارىنشا اشىق تۇردە ازىرلەنىن اتاپ ءوتتى.
«كوميسسيا سالماقتى جانە جان-جاقتى سارالانعان جوبانى دايىنداۋ ءۇشىن قانشا ۋاقىت قاجەت بولسا, سونشا ۋاقىت جۇمسادى دەپ سانايمىن», دەدى ارتۋر لاستاەۆ.
ونىڭ ايتۋىنشا, قازىر قازاقستان قوعامى جاۋاپتى كەزەڭگە اياق باسىپ جاتىر: الداعى ۋاقىتتا ەل ءومىرىن ايقىندايتىن قۇجات تالقىلانۋدا.
«ەڭ باستىسى – بۇل كەزەڭدە ورىنسىز قىزبالىققا ۇرىنباۋ, جالعان جانە بۇرمالانعان اقپارات تاراتپاۋ كەرەك. دالەلدى ديالوگتى جالعاستىرىپ, تاريحي ۇدەرىستەگى ءوز جاۋاپكەرشىلىگىمىزدى سەزىنۋىمىز قاجەت», دەدى ادام قۇقىقتارى جونىندەگى ۋاكىل.
ارتۋر لاستاەۆ اتا زاڭ جوباسىندا ادامنىڭ بارلىق قۇقىقتارى مەن بوستاندىقتارى ساقتالعانىن, ال كەيبىر ماسەلەلەردە – كۇشەيتىلگەنىن اتاپ ءوتتى.
«پرەامبۋلادا ەلىمىزدىڭ تاريحىندا العاش رەت ازاماتتاردىڭ قۇقىقتارى مەن بوستاندىقتارىن مۇلتىكسىز ساقتاۋ قاعيداتى جاريالاندى. ەندى بۇل مەملەكەت قىزمەتىنىڭ قاعيداتتارىنىڭ بىرىنە اينالادى. ونى ەنگىزۋ بارلىق نەگىزگى قوعامدىق ينستيتۋتتاردىڭ دنق-سىنا ادام قۇقىقتارىنىڭ باسىمدىعىن ەنگىزەدى. مەملەكەت پەن ونىڭ ازاماتتارىنىڭ قۇندىلىق باعدارلارىن بەلگىلەيدى», دەدى ول.
ارتۋر لاستاەۆتىڭ پىكىرىنشە, ادام قۇقىقتارىنا ارنالعان ءبولىمنىڭ اتاۋىن وزگەرتۋدىڭ ءوزى ولاردىڭ باستىلىعىن انىقتايدى. بۇل رەتتە ءبولىم ءۇش ساناتقا – قۇقىقتار, بوستاندىقتار مەن مىندەتتەرگە نەگىزدەلەدى.
«ياعني قاراپايىم تىلمەن ايتقاندا: «مەن ىستەي الامىن», «مەن تاڭدايمىن», «مەن مىندەتتىمىن». ولار جەكە جانە قوعامدىق مۇددەلەر اراسىنداعى تەپە-تەڭدىكتى قامتاماسىز ەتەتىن رۇقسات ەتىلگەن, ەركىن جانە ءتيىستى مىنەز-ق ۇلىق شەگىن انىقتايدى», دەدى ادام قۇقىقتارى جونىندەگى ۋاكىل.
جەكە باس بوستاندىعىنا قاتىستى نورمالارعا تۇسىنىكتەمە بەرە وتىرىپ, ول جاڭا كونستيتۋتسياعا سايكەس قاماۋدا ۇستاۋعا شاعىمدانۋ قۇقىعىن ساقتاي وتىرىپ, سوت شەشىمى بويىنشا عانا جول بەرىلەتىنىن اتاپ ءوتتى. بۇل رەتتە قۇقىق سۋبەكتىسىنە, ءوزىنىڭ قۇقىقتارى مەن بوستاندىقتارىن زاڭدى تاسىلدەرمەن, سونىڭ ىشىندە قاجەتتى قورعانىسپەن قورعاۋ قۇقىعى جاڭا رەداكتسيادا ساقتالعان.
سونىمەن قاتار جاڭا كونستيتۋتسيانىڭ جوباسىندا جەكە ومىرگە جانە دەربەس دەرەكتەرگە قول سۇعىلماۋشىلىققا تىكەلەي كەپىلدىك بەرىلەدى, بۇل قارقىندى تسيفرلاندىرۋ جاعدايىندا ۇلكەن ماڭىزعا يە.
ارتۋر لاستاەۆ سونداي-اق ار-وجدان مەن قوزعالىس بوستاندىعىنا, ەڭبەككە, تۇرعىن ۇيگە, مەنشىككە جانە دەنساۋلىقتى قورعاۋعا قۇقىق ۇنەمى قورعالالاتىنىن اتاپ ءوتتى.
ادام قۇقىقتارى جونىندەگى ۋاكىل مەملەكەتتىڭ زايىرلى سيپاتىن ساقتاۋدى تولىق قولدادى.
ونىڭ ايتۋىنشا, قازاقستان ءبىر ءدىندى ەكىنشىسىنەن جوعارى قويمايدى, اتەيستەرگە دە, دىندارلارعا دا قىسىم كورسەتۋگە جول بەرمەيدى, ار-وجداننىڭ تولىق ەركىندىگىن قامتاماسىز ەتەدى.
«زايىرلى سيپات ەلدىڭ ينستيتۋتسيونالدىق تەپە-تەڭدىگىن نىعايتادى جانە تەولوگيالىق ىلىمدەر بويىنشا ايەلدەر مەن بالالار قۇقىقتارىنىڭ بۇزىلماۋىن قامتاماسىز ەتەدى. بۇل اسىرەسە قالىڭدىقتى الىپ قاشۋمەن كۇرەسۋ جانە ولاردى ءدىني راسىمدەر بويىنشا نەكەگە ماجبۇرلەۋ تۇرعىسىنان قاراعاندا اسا وزەكتى. سوندىقتان ءبىز كونستيتۋتسيادا ەسكىشىلدىك سارقىنشاقتارىن جوياتىن جاڭا نورمانى تولىعىمەن قولدايمىز. نەكەنى تەك مەملەكەت تىركەۋى كەرەك. نەكەدەگى ەرلەر مەن ايەلدەر تەڭ قۇقىقتى», دەدى ارتۋر لاستاەۆ.
قورىتىندىلاي كەلە, ول كوميسسيا حالىقارالىق ستاندارتتاردى, قازاقستاننىڭ ەرەكشەلىكتەرىن جانە ودان ءارى مەملەكەتتىك قۇرىلىستىڭ پروگرەسسيۆتى يدەيالارىن ەسكەرەتىن ساپالى جانە جان-جاقتى سارالانعان قۇجات دايىنداعانىن ايتتى.
