اباي, وسكەمەن, ءۇشارال جانە اياگوز گارنيزوندارىنداعى قۇرامالار مەن بولىمدەردە باس شتابتىڭ ءموبيلدى توپتارى جاڭا وقۋ باعدارلامالارى مەن جالپىاسكەري پاندەر بويىنشا جاڭارتىلعان نورماتيۆتەردى ەسكەرە وتىرىپ, جاۋىنگەرلىك دايىندىقتى ۇيىمداستىرۋ ءتارتىبىن زەردەلەدى.
جاۋىنگەرلىك دايىندىق دەپارتامەنتى مەن سەرجانتتار قۇرامىمەن جۇمىس باسقارماسىنىڭ وكىلدەرى اسكەري نىسانداردىڭ, وقۋ كورپۋستارىنىڭ, اتىس الاڭدارى مەن پوليگونداردىڭ جاي-كۇيىن تەكسەردى. زىمىران-ارتيللەريالىق قارۋ-جاراق قويمالارىن تەكسەرۋ بارىسىندا ولار كۇزەت رەجيمىن, قاۋىپسىزدىك شارالارىنىڭ ۇيىمداستىرىلۋىن, ورتكە جانە ديۆەرسياعا قارسى قورعانىس جۇيەسىن زەردەلەدى. اسكەرلەر قىزمەتىن ۇيىمداستىرۋ, قىزمەت وتكەرۋ ورىندارىنىڭ تەحنيكالىق جابدىقتالۋى جانە نىسانداردى كۇزەت قۇرالدارىمەن قامتاماسىز ەتۋ ماسەلەلەرىنە ەرەكشە نازار اۋدارىلدى.
ۆەدومستۆوارالىق توپ جاس ساربازداردى بەيىمدەۋ مەن وقىتۋ جۇمىستارىن جان-جاقتى قاراستىردى. سالالىق ماماندار كازارما قورىنىڭ جاعدايىن, مەديتسينالىق قامتاماسىز ەتۋ دەڭگەيىن جانە مونشا-كىر جۋ قىزمەتىنىڭ ۇيىمداستىرىلۋىن تەكسەردى. سونىمەن قاتار وقۋ-جاتتىعۋ نىساندارىنىڭ جابدىقتالۋى مەن جۇمىس ىستەۋ ماسەلەلەرى جەكە قارالدى. جەكە قۇرامنىڭ مورالدىق-پسيحولوگيالىق احۋالىن تالداۋ ماقساتىندا جاس ساربازدار اراسىندا ءانونيمدى ساۋالناما جۇرگىزىلدى.
ساۋالناما قورىتىندىسى بويىنشا گەنەرال-لەيتەنانت قانىش ابۋباكىروۆ كومانديرلەردىڭ جەكە قۇراممەن جۇرگىزەتىن دەربەس جۇمىسىنىڭ ءرولىن كۇشەيتۋ, پروبلەمالىق ماسەلەلەردى دەر كەزىندە انىقتاپ, شەشۋ جونىندە بىرقاتار تاپسىرما بەردى.
باس شتاب باستىعى اسكەري تەحنيكالارعا ماۋسىمدىق قىزمەت كورسەتۋدى ساپالى جۇرگىزۋدىڭ ماڭىزدىلىعىنا نازار اۋدارىپ, تەحنيكالاردى جازعى پايدالانۋ رەجيمىنە كوشىرۋ كەزىندە ۇزدىك ناتيجە كورسەتكەن ساربازدارعا العىسىن ءبىلدىردى.
ساپار اياسىندا ورتالىق اپپارات وكىلدەرى گارنيزونداردىڭ اسكەري قىزمەتشىلەرىمەن كەزدەسۋلەر وتكىزدى. سونداي-اق اسكەري بولىمدەردىڭ لاۋازىمدى تۇلعالارىنا ادىستەمەلىك ساباقتار ۇيىمداستىرىلىپ, «بەس قارۋ» باعدارلامالىق مودۋلىندە جاۋىنگەرلىك جانە دەنە دايارلىعى بويىنشا ەسەپتىلىك جۇرگىزۋ ءتارتىبى, قىزمەتتىك قۇجاتتامانى راسىمدەۋ تالاپتارى ءتۇسىندىرىلدى.
جۇمىس ساپارىنىڭ قورىتىندىسى بويىنشا گەنەرال-لەيتەنانت قانىش ابۋباكىروۆ جاڭارتىلعان وقۋ باعدارلامالارىن ەنگىزۋ, تسيفرلاندىرۋ جۇيەلەرىن دامىتۋ, وقۋ-ماتەريالدىق بازانى جەتىلدىرۋ, قارۋ-جاراقتىڭ, اسكەري تەحنيكانىڭ جانە ينفراقۇرىلىم نىساندارىنىڭ ءتيىستى تەحنيكالىق جاي-كۇيىن قامتاماسىز ەتۋ جونىندە بىرقاتار تاپسىرمالار بەردى. سونىمەن قاتار قاۋىپسىزدىك شارالارىن كۇشەيتۋ, قىزمەت جاعدايلارىن جاقسارتۋ جانە جەكە قۇرامدى جان-جاقتى قامتاماسىز ەتۋ ساپاسىن ارتتىرۋ مىندەتتەرى قويىلدى.
