بايقاۋدا قارۋلى كۇشتەردىڭ 118 ۇزدىك سەرجانتى باق سىنادى. ولار – ءوز اسكەري بولىمدەرىندە, اسكەر تۇرلەرى مەن تەكتەرىندە ىرىكتەۋ جارىستارىنان توپ جارىپ, اقتىق كەزەڭگە قاتىسۋعا جولداما العاندار.
اسىلبەك وسى كونكۋرستا جەڭىسكە جەتۋ ءۇشىن كوپ ەڭبەكتەندى. الدىن الا جاتتىعۋلار جاساپ, سايىس بارىسىندا تاباندىلىق پەن قايسار مىنەز كورسەتتى. وسىلايشا, ول ءوزىنىڭ اسكەري بولىمىندە, سودان سوڭ «وڭتۇستىك» وڭىرلىك قولباسشىلىعىندا ۇزدىك ەكەنىن دالەلدەدى. وتان قورعايتىن جاۋىنگەر قاي كەزدە دە مىقتىلىعىن كورسەتىپ ءجۇرۋ كەرەك.
ىرىكتەۋ جارىستارىندا اسىلبەك ەرەكشە دەنە جاتتىعۋلارىمەن كوپشىلىكتى ءتانتى ەتىپ قويماي, سونىمەن قاتار اسكەري تاريح سالاسىندا دا تەرەڭ ءبىلىمى بار ەكەنىن بايقاتتى. ونىڭ ەڭبەكقورلىق قاسيەتى مەن ءوز ىسىنە دەگەن ادالدىعى جارىستا جەڭىسكە جەتۋىنە سەبەپشى بولدى. دەگەنمەن سايىستىڭ سوڭعى كەزەڭدەرى بارلىق قاتىسۋشىعا بىردەي وتە قيىنعا سوققانىن مويىنداۋ كەرەك.
جارىس بارىسىندا سەرجانت اسىلبەك قاراباي «ايبىن» اسكەري-سپورت كەشەنىندە بىرقاتار جاۋىنگەرلىك, سپورتتىق سىناقتاردان ءوتتى. بۇل كەشەندە اسكەريلەر 100 مەتر, 3 شاقىرىم قاشىقتىققا جۇگىردى, كەرمەدە تارتىلىپ, قويان-قولتىق ۇرىستان جەكپە-جەككە شىقتى. اتالعان سىناقتار تەك فيزيكالىق كۇشتى عانا ەمەس, ەپتىلىكتى, توزىمدىلىك پەن سترەستىك جاعدايلاردا تەز شەشىم قابىلداي ءبىلۋدى قاجەت ەتەتىنى بەلگىلى.
جامبىل وبلىسىندا ورنالاسقان «ايشا ءبيبى» پوليگونىندا اسىلبەك «قايسار» اسكەري-كاسىپتىك كەشەنىندە سايىستى. وندا ول قيىلىسقان جەرلەر بويىنشا ۇزاق قاشىقتىققا جۇگىرۋدەن جارىستى. مۇندا دا سارباز ءوزىنىڭ قارۋمەن وق اتۋ, گراناتا لاقتىرۋ شەبەرلىگىن كورسەتتى, ءوزىنىڭ جوعارى كاسىبيلىگىن تاعى ءبىر مارتە دالەلدەپ, مەرگەندەر ۆزۆودىنىڭ سەرجانتى لاۋازىمىنا لايىقتى ەكەنىنە كۇمان قالدىرمادى. سونداي-اق سەرجانتتار «كەرۋەن شەرۋى» دەپ اتالاتىن تاعى ءبىر سىناقتان ءوتتى. بۇل ەر ازاماتتاردىڭ ناعىز توزىمدىلىگىن ساراپقا سالعان جارىس بولدى. سول بايقاۋدا ۇمىتكەرلەر 10 شاقىرىم قاشىقتىقتى سالماعى 15 كيلولىق سومكەنى ارقالانىپ ەڭسەردى.
ال «سەرى» ادەبي-كوركەمونەر بايقاۋىندا اسىلبەك پەن ونىڭ قارسىلاستارى اسكەري دايىندىق ماشىقتارىنان بولەك ءارتۇرلى ونەرى مەن تالانتتارىن ورتاعا سالدى. بۇل بايقاۋدا قاتىسۋشىلار وزدەرىنىڭ شىعارماشىلىق قابىلەتى بويىنشا ءوزارا باق سىناستى.
سونىمەن, اسىلبەك قارابايدىڭ «ۇزدىك ۆزۆود سەرجانتى» اتالىمىن جەڭىپ الۋى – ونىڭ جەكە ماراپاتى عانا ەمەس, اسكەري ءبولىم مەن «وڭتۇستىك» وڭىرلىك قولباسشىلىعىنىڭ دا ۇلكەن جەتىستىگى. ءسوز جوق, ارىپتەسىنىڭ بيىك تۇعىردان كورىنۋى ونىڭ قىزمەتتەستەرىنە ءۇمىت پەن جىگەر سىيلادى. قازىرگى تىلمەن ايتقاندا, قاراپايىم سەرجانتتىڭ جارىستاعى جەڭىسى قاسىنداعى ارىپتەستەرىنە تەك العا ۇمتىلۋعا كەرەمەت موتيۆاتسيا بەردى.
«اسىلبەك قاراباي – ءوز كاسىبىنە ناعىز ادال جان, تالاپتى دا ەڭبەكقور ادام. مۇمكىن وسى قاسيەتتەرىنىڭ ارقاسىندا بولار, ول بايقاۋداعى سىناقتاردان سۇرىنبەي ءوتىپ, ۇلكەن ماقساتىنا قول جەتكىزدى, جەڭىمپازدىڭ ەندىگى جەتىستىگىن باسقا ارىپتەستەرى دە جالعاستىرار دەگەن ۇمىتتەمىز», دەدى اسكەري ءبولىم باسشىلىعى.
شىمكەنت
