بانك تە, كومپانيا دا – ءبارى وسىندا
وتباسى بانكپەن بىرگە 17 قۇرىلىس كومپانيانىڭ ساتۋ ءبولىمى كەلىپ حالىققا تۇرعىن ءۇي الۋ جونىندە كەڭەس بەردى. جالپى ايگىلى كونتسەرت زالىنىڭ حولى ءماز-مەيرام. ءبىر جاعىندا سالىمشىلار قۇرىلىس كومپانيالارىنىڭ, بانكتەردىڭ وكىلدەرىمەن سويلەسىپ جاتسا, ەكىنشى جاعىندا بانك كەلۋشىلەردىڭ كوڭىلىن كوتەرۋ ءۇشىن شاعىن كونتسەرتتىك باعدارلاما دا ۇيىمداستىرعان. ءبىر قاراعاندا تويداعى كوڭىل-كۇي سەكىلدى. بىراق سول «تويعا» كەلگەن حالىق جاي جۇرمەي, باسپانا ماسەلەسىن رەتتەپ ءجۇر.
«جاي كۇندە مۇنداي مۇمكىندىك بولا بەرمەيدى عوي. ءۇي العىسى كەلىپ جۇرگەن ادام ءبىراز قۇرىلىس كومپانيانىڭ ەسىگىن قاعاتىنى انىق. دوستارىمنان وسى جەرگە بانكتىڭ ادامدارى, قۇرىلىس كومپانياسىنىڭ وكىلدەرى كەلەتىنىن ەستىدىم. بىردەن كەلدىم. بىلايعى كۇندە بانكتە ۇزاق كەزەكتە تۇراسىڭ نەمەسە قۇرىلىس كومپانيالارىنىڭ ساتۋ بولىمدەرىن ىزدەپ جۇرەسىڭ. ال مۇندا ءبارى ءبىر جەردە», دەيدى استانا قالاسىنىڭ تۇرعىنى اسلان كەنجەبەكوۆ.
اسلان سەكىلدى «يپوتەكا DAY» ءىس-شاراسىنا كەلگەندەردىڭ قاتارى كوپ. سونىڭ ءبىرى – التى بالانىڭ اناسى شىناراي داۋلەتبەكوۆا «ناۋرىز» باعدارلاماسى بويىنشا باسپانا العان.
«2020 جىلى كوپبالالى انا رەتىندە كەزەككە تۇردىم. قۇدايعا شۇكىر, ءۇي الىپ, قۋانىپ جاتىرمىز. ءوزىم اسپازشىمىن. ەڭبەكتەنسەڭ, باسپاناعا يە بولاسىڭ. تەك سەنۋ كەرەك», دەدى ول.
ءىس-شاراعا كەلگەندەردىڭ ءبىرى بانككە, ءبىرى قۇرىلىس كومپانياسىنا بارىپ, ماسەلەلەرىن شەشىپ ءجۇر. استانا قالاسىنىڭ تۇرعىنى شولپان نازاروۆا دا «ناۋرىز» باعدارلاماسىمەن باسپانالى بولعان. جاقىندا سۋ جاڭا ۇيىنە كوشىپ بارماق.
«2019 جىلى مەن وتباسى بانكتە دەپوزيت اشتىم. «وتاۋ» جانە «ناۋرىز» باعدارلاماسى بىرىكتىرىلگەن ەكەن. وپ جينالىپ, دەپوزيتكە 18 اي تولدى. دەكرەتتەگى انا رەتىندە «وتباسى بانك» ماعان يپوتەكانى ماقۇلدادى. ءبىز ءوزىمىزدىڭ زەينەتاقى جيناعىمىزدى دا پايدالاندىق. اكەم زەينەتاقى جيناعىنىڭ ءبىر بولىگىن ماعان اۋداردى. سولايشا, باستاپقى اقشانى جيناپ الدىق. تۇرعىن ءۇي كەشەنىن تاڭداپ, باسپانا ساتىپ الدىق. جىلدار بويى ەتكەن ەڭبەكتىڭ جەمىسى وسى! ءوز ءۇيىڭ بولعانعا نە جەتسىن!؟» دەدى شولپان.
مۇندا «وتباسى بانكتىڭ» بارلىق ءونىمى بويىنشا اقپارات بەرىلىپ جاتىر
ءىس-شارا استانا تۇرعىندارى مەن قالا قوناقتارى ءۇشىن وتكىزىلدى. ءىس-شارادا كونتسەرتتىك باعدارلاما دا قاراستىرىلعان, جىلجىمايتىن م ۇلىك سالاسىنداعى تاۋەلسىز ساراپشىلار ءسوز سويلەپ, قۇرىلىس سالۋشىلاردان وبەكتىلەر مەن پاتەرلەرگە جەڭىلدىكتەر تۋرالى اقپاراتتارى جان-جاقتى بەرىلدى. سونداي-اق, ءىس-شارادا «ناۋرىز» باعدارلاماسى بويىنشا قونىستانۋشىلارعا باسپانا كىلتتەرى تابىستالدى.
ءبىز «وتباسى بانك» باسقارما توراعاسىنىڭ ورىنباسارى جانسۇلتان ماتايدى سوزگە تارتتىق. ونىڭ سوزىنشە, جالپى «وتباسى بانك» تۇرعىن ءۇي جۇيەسىن جۇرگىزىپ جاتقان بىرەگەي بانكتىڭ ءبىرى. بۇل جۇيەنىڭ ارتىقشىلىعى – ءاربىر ازاماتتىڭ تابىسىنا قاراي وتىرىپ, وزىنە سايكەس, مەملەكەتتىك قولداۋ شارالارى, بولماسا وزىنە قاجەتتى ءۇي بەرەتىن جۇيە. 2024 جىلدىڭ 11 ايىندا بانك 63 مىڭ شاماسىندا نەسيە بەرگەن. ونىڭ 32 مىڭى العاشقى نارىقتاعى ۇيلەر. ياعني ەلگە بانك بەرگەن نەسيەلەردىڭ 50 پايىزى العاشقى نارىق ارقىلى.
«سالىمشىلارعا بۇكىل قالانى ارالاپ, قۇرىلىس كومپانيالارىنا بارۋدىڭ قاجەتى جوق. بارلىعى وسى جەردە ورنالاسقان. قۇرىلىس كومپانيالارى تاراپىنان قانداي ۇسىنىس بار؟ كەلەسى جىلى قانداي جاڭادان ۇيلەر سالادى؟ سونىڭ ءبارىن ايتىپ بەرىپ جاتىر. وعان قوسا وسى جەردە ءبىزدىڭ سالىمشىلار ءوزىنىڭ تولەم قابىلەتتىلىگىن جاعدايىن انىقتاپ, باسپانانى قانداي جولمەن الۋعا بولاتىنىن ناقتى بىلە الادى. «وتباسى بانكتىڭ» بارلىق ونىمدەرى بويىنشا كەڭەس الىپ جاتىر», دەدى ول.
باعدارلامالار جايلى
«وتباسى بانكتەگى» 2024 جىلدىڭ جاڭالىعى – «ناۋرىز» باعدارلاماسى. الدىندا «وتاۋ» باعدارلاماسى شىققان. ول «وتباسى بانكتىڭ» ءوز جەكە قاراجاتىنا باستالعان باعدارلاما بولسا, «ناۋرىز» مەملەكەتتىڭ قولداۋىمەن باستالعان باعدارلاما. «ناۋرىز» باعدارلاماسى كەلەسى جىلى دا جالعاسىن تابادى. جالپى مەملەكەتتىڭ قولداۋ شارالارىنىڭ ارقاسىندا 2-5 پايىزبەن نەسيەگە كەزەكتە تۇرعان ازاماتتار جەتەرلىك. ال «ناۋرىزدا» باستى تالاپ – اتىندا ءۇيى جوق قازاقستاننىڭ كەز كەلگەن ازاماتى قاتىسا الادى. سوندىقتان بۇل – وتە ىڭعايلى, ءتيىمدى باعدارلاما.
سونىمەن قاتار, بىلتىر پيلوتتىق جوبا رەتىندە باستالعان, ايەلدەرگە ارنالعان «ۇماي» باعدارلاماسى دا كەلەسى جىلى جالعاسادى. «جاسىل يپوتەكا» باعدارلاماسى دا ءۇزىلىپ قالمايدى. سەبەبى بۇل –ازيالىق دامۋ بانكىمەن بىرلەسە جۇرگىزىلەتىن جوبا.
«سالىمشىلار ەگەر كەلەشەكتە ء«ۇيلى بولام» دەسە, ءبىزدىڭ قىزمەتتەرگە جۇگىنۋى كەرەك. ءبىزدىڭ قىزمەتتەردى الۋ وتە وڭاي. كوپ قىزمەتتەردى ونلاين فورماتقا شىعارعانبىز. ياعني, ەڭ باستى كەرەگى – كەلىپ تەگىن دەپوزيت اشۋ. جيناققا مەملەكەت تاراپىنان كومەك بولادى. بانكتەن 2% سىياقى قوسىلادى. سول ارقىلى ازاماتتار باسپاناسىنا قول جەتكىزە الادى», دەدى جانسۇلتان ماتاي.
«يپوتەكا DAY» باسقا وڭىرلەردە دە وتكىزىلەدى
«وتباسى بانك» باسقارما توراعاسىنىڭ ورىنباسارى نۇرلان اقشانوۆتىڭ سوزىنشە, «يپوتەكا DAY» – جىل سايىن وتكىزەتىن ءىس-شارا. استانادا عانا ەمەس, «وتباسى بانك» بارلىق وڭىردە ۇيىمداستىرىلادى.
ء«بىز قۇرىلىس سالاسىنداعى سەرىكتەستەرىمىزدى شاقىرامىز. ولارمەن سويلەسكەن كليەنتتەرگە ءبىز بىردەن بانكتىڭ شارتتارى, «ناۋرىز», «ۇماي», «جاسىل يپوتەكا» سەكىلدى باعدارلامالارىمىز تۋرالى كەڭەس بەرەمىز. جىلىنا ەكى-ءۇش رەت وتكىزىلەدى. بيىل ءتىپتى قازاقستاندا قالا-قالا بويىنشا مارافون سياقتى ۇيىمداستىرىلدى. سول سەبەپتى سالىمشىلارعا ءبىزدىڭ ينستاگرام پاراقشامىزدى قاراپ وتىرۋعا كەڭەس بەرەمىز.
«ناۋرىز» باعدارلاماسى بىزدە بيىل باستالدى. ول ءۇشىن باستاپقى جارنا – 20 پايىز. پايىزدىق ءوسىم 9 پايىز (جتسم 9,3%-دان 11,8% دەيىن) , ەگەر كاتەگورياڭىز جاقسى بولسا, 7 پايىزبەن (جتسم 7,3%-دان 8,9% دەيىن) قارىز بەرىلەدى. وسى باعدارلامامەن ءبىرىنشى نارىقتا الماتى, استانا جانە شىمكەنتتەن, وبلىس ورتالىقتارىنان ءۇي الا الاسىز. ەگەر اۋىل جاقتان, مونوقالالاردان الام دەسەڭىز, وندا ەكىنشى نارىقتان الۋعا بولادى. ول ءۇشىن ءسىزدىڭ جانە وتباسىنداعى تۋعان-تۋىستارىڭىزدىڭ اتىندا بەس جىل بويى ەشقانداي باسپانا بولماۋى كەرەك», دەدى ول.
ۇلتتىق دامۋ ينستيتۋتى
ەسكە سالا كەتەيىك, وتكەن ايدا «وتباسى بانككە» ۇلتتىق دامۋ ينستيتۋتى مارتەبەسى بەرىلگەن ەدى. ياعني, تىڭ وزگەرىس بويىنشا باسپانا كەزەگىنە قويۋ, كەزەكتىڭ ساقتالۋىن قاداعالاۋ, كەزەكتەگىلەرگە تۇرعىن ءۇي ۇيلەستىرۋ جۇمىستارى «وتباسى بانك» پەن سونىڭ جانىنان قۇرىلاتىن تۇرعىن ۇيمەن قامتۋ ورتالىعىنا بەرىلەدى. قۇجاتتى وتكەن ايدا ءماجىلىس سەنات ۇسىنعان وزگەرىستەرمەن بىرگە قابىلداپ, پرەزيدەنتكە جولداعان بولاتىن. كوپ وتپەي قۇجاتقا مەملەكەت باسشىسى قول قويدى.
جاڭا زاڭ شەڭبەرىندە جەرگىلىكتى اكىمدىكتەر جەڭىلدەتىلگەن الەۋمەتتىك تۇرعىن ءۇي قۇرىلىسىن جالعاستىرادى. ال وتباسى بانك جاڭا تۇرعىن ۇيلەردى كەزەكتە تۇرعان ازاماتتار اراسىندا ءبولىپ, رەتتەيدى. وتباسى بانك ۇلتتىق دامۋ ينستيتۋتى بولا وتىرىپ, ۇلتتىق بانك جانە قارجى نارىعىن رەتتەۋ جانە دامىتۋ اگەنتتىگىنىڭ رەتتەۋىمەن, ەكىنشى دەڭگەيلى بانكتەر, سونداي-اق قازاقستاننىڭ دەپوزيتتەرگە كەپىلدىك بەرۋ قورى جۇيەسىندە جۇمىسىن جالعاستىرادى. «وتباسى بانكتىڭ» قىزمەتى قازىرگى تاڭدا 8 مەملەكەتتىك ورگاننىڭ جيناقتالعان دەرەكتەر بازاسىمەن ينتەگراتسيالانعان. كەلەشەكتە مۇنداي ينتەگراتسيا ۇلعايا بەرمەك.
رەسمي دەرەكتەرگە قاراعاندا, قازاقستاندا قازىرگى تاڭدا 650 مىڭنان استام ازامات باسپانا كەزەگىنە تىركەلگەن. ولاردىڭ ءبارىن تۇگەندەۋ جۇمىستارىن الداعى ۋاقىتتا اكىمدىكتەر جۇرگىزۋى كەرەك. ونەركاسىپ جانە قۇرىلىس مينيسترلىگى باسپانا كەزەگىندەگى ازاماتتاردىڭ مالىمەتتەرىن قايتا وڭدەۋ كەرەك دەپ ەسەپتەيدى. انىقتالعان اقپاراتتاردىڭ ءبارى دە اكىمدىكتەرگە شەشىم قابىلداۋ ءۇشىن ۇسىنىلعان. «وتباسى بانك» ۇلتتىق دامۋ ينستيتۋتى بولعان سوڭ, كەزەكتە تۇرعانداردىڭ قازىرگى, قالىپتاسقان بىرىڭعاي رەسپۋبليكالىق بازاسىن جۇرگىزەتىن جانە «تۇرعىن ۇيمەن قامتاماسىز ەتۋ ورتالىعى» جاڭا ەلەكتروندىق بازاسىمەن باسپاناعا مۇقتاج ازاماتتاردىڭ بارىنەن ءوتىنىم قابىلدايدى.
