مينيسترلىك اقپاراتىنا سۇيەنسەك, اۋىل مەكتەپتەرىنىڭ وقۋشىلارى اراسىندا جاراتىلىستانۋ-ماتەماتيكا باعىتىنداعى رەسپۋبليكالىق وليمپيادا وسىمەن ەكىنشى رەت وتكىزىلىپ وتىر. جاقىندا سول II رەسپۋبليكالىق وليمپيادانىڭ ناتيجەسى شىعارىلدى. قورىتىندى كەزەڭگە 486 وقۋشى قاتىسىپ, ونىڭ ىشىندە 221 وقۋشى جەڭىمپاز اتاندى. بۇل بالالار – ەلىمىزدىڭ ەڭ شالعاي ايماقتارىنان كەلگەن ءبىلىم الۋشىلار.
ماراپاتتاۋ راسىمىنە قاتىسىپ, جۇلدەگەرلەردى جەڭىسىمەن قۇتتىقتاعان ورتا ءبىلىم بەرۋ كوميتەتىنىڭ توراعاسى قانىبەك بەكبولاتوۆ وليمپيادانىڭ ءبىرىنشى كەزەڭىنەن وتكەن قاتىسۋشىلاردىڭ قاتارى كوبەيىپ كەلە جاتقانىن جەتكىزدى.
«وقۋ-اعارتۋ مينيسترلىگى اۋىل مەكتەپتەرىنىڭ تالانتتى جانە بىلىمگە قۇشتار وقۋشىلارىن انىقتاۋ ماقساتىندا رەسپۋبليكالىق وليمپيادانى ەكىنشى جىل قاتارىنان وتكىزىپ وتىر. ەگەر بىلتىر وليمپيادانىڭ ءبىرىنشى كەزەڭىنە 78 مىڭ وقۋشى قاتىسسا, بيىل ولاردىڭ سانى 113 مىڭنان استى. بۇل اۋىل وقۋشىلارىنىڭ زياتكەرلىك جارىستارعا دەگەن قىزىعۋشىلىعىنىڭ ارتىپ كەلە جاتقانىن, رەسپۋبليكالىق وليمپيادانىڭ مارتەبەسى جوعارى ەكەنىن كورسەتەدى. بارشاڭىزدى جەتىستىكتەرىڭىزبەن قۇتتىقتايمىن جانە ءبىلىم جولىندا جاڭا تابىس تىلەيمىن!» دەدى كوميتەت توراعاسى.
پاۆلودار وبلىسىنان كەلگەن يمران قۇسايىنوۆ پەن قىزىلوردا وبلىسىنان باق سىناعان تورە بالتاباەۆ «وليمپيادانىڭ ەڭ جاس قاتىسۋشىسى» اتالىمى بويىنشا ديپلومدارمەن ماراپاتتالدى. دارىندىلار دوداسىنىڭ ەڭ جاس قاتىسۋشىسى تورە بالتاباەۆ جارىس تۋرالى ءوز ويىن: «مەن 6-سىنىپتا وقيمىن, بىراق وليمپياداعا 9-سىنىپتىڭ باعدارلاماسىمەن قاتىسامىن. ءبىزدىڭ ەلدە ءبىلىم الىپ, عىلىممەن اينالىسۋعا مۇمكىندىك كوپ. مەملەكەتىمىز تالانتتى بالالاردى قولداۋعا ەرەكشە كوڭىل بولەدى. ءبىز ءۇشىن وليمپيادالار, بايقاۋلار ۇيىمداستىرىلادى, ال ۇزدىكتەر حالىقارالىق جارىستارعا جىبەرىلەدى. مەن دە وليمپيادالىق رەزەرۆتىڭ ءبىر بولىگى بولۋدى, ءبىلىمىمدى ودان ءارى جەتىلدىرىپ, ءبىر كۇنى ەلىم ءۇشىن التىن مەدال ۇتىپ الۋدى ارماندايمىن», دەپ جەتكىزدى.
«ۇزدىك وليمپيادالىق كوماندا» اتالىمى بويىنشا I دارەجەلى ديپلومداردى قىزىلوردا, تۇركىستان جانە ماڭعىستاۋ وبلىستارىنىڭ قۇراما كوماندالارى يەلەندى. جەڭىمپازدارعا ەلىمىزدىڭ جەتەكشى جوعارى وقۋ ورىندارىنىڭ 8 رەكتورلىق گرانتى تابىستالدى, تارقاتىپ ايتقاندا, 6 گرانت – SDU-دان, 2 گرانت – قوجا احمەت ياساۋي اتىنداعى حالىقارالىق ۋنيۆەرسيتەتىنەن كەلگەن قاتىسۋشىلارعا تاعايىندالدى. سونداي-اق ماتەماتيكا, فيزيكا جانە ينفورماتيكا پاندەرىنەن I دارەجەلى ديپلوم يەگەرلەرى – 9–10-سىنىپ وقۋشىلارىنا الماتى قالاسىنداعى رەسپۋبليكالىق فيزيكا-ماتەماتيكا مەكتەبىندە 2025–2026 وقۋ جىلىندا ءبىلىم الۋعا گرانت بەرىلدى.
مينيسترلىكتىڭ دەرەگىنە قاراعاندا, اۋىل مەكتەپتەرىنىڭ وقۋشىلارىنا ارنالعان رەسپۋبليكالىق وليمپيادادا بارلىعى 221 مەدال ساراپقا سالىندى, مۇنىڭ 117-ءسى – قولا, 62-ءسى – كۇمىس جانە 42-ءسى – التىن مەدال. اتالعان ءبىلىم بايگەسى 13 ءپان بويىنشا وتەدى, جاراتىلىستانۋ-ماتەماتيكا جانە قوعامدىق-گۋمانيتارلىق باعىتتاردى قامتيدى, ءۇش كەزەڭنەن تۇرادى. مەكتەپ كەزەڭىنە 99 264 وقۋشى قاتىسىپ, ولاردىڭ 53 593-ءى اۋداندىق كەزەڭگە ءوتتى. وبلىستىق كەزەڭدە 12 000 وقۋشى باق سىنادى, ال فينالعا 1000-عا جۋىق وقۋشى شىقتى. سونىڭ ىشىندە 486 وقۋشى جاراتىلىستانۋ-ماتەماتيكا باعىتىنداعى وليمپياداعا قاتىستى, ال 450 وقۋشى قوعامدىق-گۋمانيتارلىق باعىت بويىنشا وليمپياداعا قاتىسادى. قوعامدىق-گۋمانيتارلىق باعىت بويىنشا وليمپيادا 10–14 جەلتوقسان ارالىعىندا استانادا وتەدى.
ايتا كەتەيىك, وليمپيادانىڭ قورىتىندى كەزەڭىنە قاتىسقان بارلىق وقۋشى «دارىن» رەسپۋبليكالىق سىرتتاي مەكتەبىنە قابىلدانادى. ال I دارەجەلى ديپلوم يەگەرلەرى 2025 جىلعى ناۋرىز ايىندا وتەتىن جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ سوڭعى كەزەڭىنە قاتىسادى.
