- بىلتىر قىس كەش ءتۇسىپ, جەلتوقسان ايىنىڭ اياعىندا عانا شاڭعى تەبۋ ماۋسىمىن باستاپ ەدىك. بيىل قار ەرتە جاۋىپ, اۋا رايى قاراشانىڭ وزىندە قىسقى سپورتقا قولايلى بولىپ وتىر. بۇگىنگى ءىس-شارامىز رەسمي شاڭعى ماۋسىمىنىڭ اشىلۋى دەپ ايتا المايمىن. ماۋسىم 18 جەلتوقساندا باستالادى. ايتسە دە, بۇگىنگى سپورتتىق ءىس-شارامىزعا 200-دەي قاتىسۋشى جينالدى. جامان ەمەس. جازدا جۇگىرۋ تانىمالدىلىققا يە بولسا, قىستا شاڭعى تەبۋ تۇرعىندار تاراپىنان سۇرانىسقا يە. سپورتتى سەرىك ەتىپ, دەمالىستى جاقسى كوڭىل كۇيمەن وتكىزىڭىزدەر, - دەدى جارىستىڭ باس تورەشىسى داۋلەت حامزين.
ءىس-شاراعا نيەت بىلدىرگەننىڭ ءبارى قاتىسىپ, ءار قاتىسۋشى ءوزىنىڭ شاڭعىسىن الا كەلدى. ال ءبىرىنشى مارتە قىزىعۋشىلىقپەن كەلگەندەر 2 000 تەڭگەگە جالعا الىپ, وسى سپورتتاعى العاشقى قادامدارىن جاسادى.
ايتا كەتەيىك, ورتالىق ساياباقتا جۇمىس كۇندەرى كەشكى 19:00 مەن 21:00 ارالىعىندا شاڭعىنى جالعا الىپ, ءوز بەتىڭىزشە ۇيرەنسەڭىز بولادى. ال جاتتىقتىرۋشىنىڭ كومەگى قاجەت دەسەڭىز, بالالار ءۇشىن 35 مىڭ تەڭگە, ەرەسەكتەر ءۇشىن ايىنا 40 مىڭ تەڭگە بولاتىن سەكتسيا دا قاراستىرىلعان.
ەندى الداعى ۋاقىتتا ءار اپتا سايىن دەمالىس كۇندەرى ورتالىق ساياباقتا سالاۋاتتى ءومىر سالتىن ۇستاناتىن ادامدار مەن تازا اۋادا بەلسەندى دەمالۋدى ۇناتاتىندار اراسىندا شاڭعى سپورتىنان جارىستار ۇيىمداستىرىلاتىن بولادى.
