ماگيستراتۋراعا قۇجات قابىلدايدى

عىلىم جانە جوعارى ءبىلىم مي­نيس­ترلىگىنىڭ حابارلاۋىنشا, 9 جەل­توق­ساندا ماگيستراتۋراعا ءبىلىم گرانت­تارىن تاعايىنداۋ كونكۋرسىنا قاتىسۋ ءۇشىن قۇجات قابىلداۋ باستالادى. قا­بىلداۋ 13 جەلتوقسانعا دەيىن (قوسا ال­عان­دا) جوعارى وقۋ ورىندارىنىڭ قا­بىل­داۋ كوميسسيالارى, سونىڭ ىشىن­دە ۆيرتۋالدى قابىلداۋ كوميسسيالارى ارقىلى جۇزەگە اسىرىلادى. ياعني تا­لاپ­كەرلەر قۇجاتتارىن ءداستۇرلى جانە ونلاين فورماتتا تاپسىرا الادى.

ماگيستراتۋراعا ءتۇسۋ ءۇشىن عى­لى­مي-پەداگوگيكالىق باعىت بويىنشا كەمىندە 75 بالل, بەيىندىك باعىت بويىن­شا از دەگەندە 30 بالل جيناۋ قاجەت. ماگيستراتۋرادا وقۋ­عا ارنالعان ءبىلىم گرانتتارى كە­شەندى تەستىلەۋ ناتيجەلەرى بويىن­شا كونكۋرستىق نەگىزدە تاعايىن­دالادى. كونكۋرسقا قاتىسۋ ءۇشىن كەلەسى قۇجاتتاردى تاپسىرۋ قاجەت: جەكە كۋالىكتىڭ كوشىرمەسى, جوعارى ءبىلىمى تۋرالى قۇجات (ديپلوم جانە قوسىمشاسى); كت سەرتيفيكاتى جانە شەت ءتىلىن مەڭگەرگەنىن راستاي­تىن حالىقارالىق سەرتيفيكات­تار (بار بولعان جاعدايدا). 075/ۋ نىسانىنداعى مەديتسينالىق انىق­تامانى جوعارى وقۋ ورنىنا تۇسكەندە تاپسىرادى. قۇجاتتاردى تاپسىرۋ كەزىندە وقۋعا ءتۇسۋشى ءبىلىم باعدارلامالارىنىڭ ءبىر توبىن جانە ءۇش جوعارى وقۋ ورنىن كورسەتۋگە قۇقىلى.

ماگيستراتۋراعا تۇسۋشىلەر وسى جولى 4 مىڭ مەملەكەتتىك ءبى­لىم گران­تىنا ۇمىتكەر بولا الا­دى. ماگيس­ترا­تۋراعا ءبىلىم گران­تى يەگەر­لەرىنىڭ ءتىزى­مى 25 جەلتوق­سانعا دەيىن عىلىم جانە جوعارى ءبىلىم مينيسترلىگى مەن ۇلتتىق تەستى­­لەۋ ور­تالىعىنىڭ رەسمي سايتىندا, الەۋمەتتىك جەلىلەردەگى پاراقشا­لارىندا جاريالانادى. ال بولاشاق ما­گيسترانتتاردىڭ وقۋعا قا­بىلدا­نۋى 26 جەلتوقسان مەن 2025 جىل­دىڭ 10 قاڭتارى ارالىعىندا جۇر­گىزىلەدى.

ۇلتتىق تەستىلەۋ ورتالىعىنىڭ دەرەگىنە سۇيەنسەك, جازداعى ماگيس­ترا­تۋراعا تاپسىرعانداردىڭ ورتاشا كورسەتكىشى عىلىمي-پەداگوگيكالىق باعىتتا 71 بالل, بەيىندىك باعىت بو­يىنشا 24 بالل بولدى. ەڭ جوعارىسى 135 بالدى قۇرادى. سول كەزدەگى تەستىلەۋ قورىتىندىسىندا 38 قاتىسۋشىنىڭ ناتيجەسى جويىلدى. ونىڭ ىشىندە 25 تەستىلەنۋشى سمارتفون, شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى. كەشەندى تەستىلەۋ كەزىندە ەرە­جەلەردى بۇزعانى ءۇشىن اۋديتوريا­دان 12 ادام شىعارىلىپ, ولاردىڭ ناتيجەلەرى جويىلدى. سونداي-اق تەستىلەۋ بەينەجازبالارىن قايتا تەكسەرۋ ناتيجەسىندە 1 ادامنىڭ بالى جويىلدى. بوگدە تۇلعا انىقتالعان جوق. رەسپۋبليكالىق اپەللياتسيالىق كوميسسياعا 5,5 مىڭ ءوتىنىش, ونىڭ ىشىندە مازمۇنى بويىنشا 5,1 مىڭ, تەحنيكالىق سەبەپتەرگە بايلانىس­تى 344 ءوتىنىش ءتۇستى. اپەللياتسيالىق كوميسسيانىڭ شەشىمىمەن 54 بىرەگەي تەست تاپسىرماسى قاناعاتتاندىرىلدى: مازمۇنى بويىنشا – 44, تەحنيكالىق سەبەپتەرگە بايلانىستى – 10 تاپسىرما. وسى جولى تاپسىرعان تالاپكەرلەر دە قورىتىندىسىمەن كەلىسپەگەن جاعدايدا اپەللياتسياعا بىردەن ءوتىنىم بەرە الادى.