مەملەكەت باسشىسى قاسىم-جومارت توقاەۆ: «كىتاپحانا – مەملەكەتتىڭ, ۇلتتىڭ نەگىزگى جادى. ەلىمىز ءۇشىن قۇندى تاريحي دەرەكتەر مەن ماتەريالداردىڭ دەنى كىتاپحانادا ساقتالادى. سوندىقتان كىتاپحانا ءىسىن دامىتۋعا بەيجاي قاراۋعا بولمايدى», دەپ اتاپ وتكەندەي, «فوليانت» باسپاسى دا كىتاپ وقيتىن ۇلت قالىپتاستىرۋ جولىندا كوپتەگەن ءىس-شارالار ۇيىمداستىرىپ, وسى سالادا بەلسەندى ەڭبەك ەتىپ كەلە جاتقانىن وقىرمان قاۋىم جاقسى بىلەدى. اتالعان ءىس-شارا بارىسىندا يسپانيا كورولدىگىنىڭ قازاقستانداعى ەلشىسى لۋيس فرانسيسكو مارتينەس «فوليانت» باسپاسىنىڭ ديرەكتورى نۇرلان سارسەنبى ۇلى يسابەكوۆكە يسپانيا كورولدىگىنىڭ كاتوليكتىك يزابەللا وردەنىن تابىس ەتتى. كاتوليكتىك يزابەللا وردەنى – عىلىم, مادەنيەت جانە ءبىلىم سالاسىنداعى حالىقارالىق دەڭگەيدە ەلەۋلى جەتىستىكتەرگە قول جەتكىزگەن تۇلعالارعا بەرىلەتىن جوعارى ماراپاتتىڭ ءبىرى. بۇل ماراپات – نۇرلان يسابەكوۆتىڭ باسپا سالاسىنا سىڭىرگەن ەڭبەگىنىڭ حالىقارالىق دەڭگەيدە باعالانۋى جانە قازاقستان مەن يسپانيا اراسىنداعى مادەني جانە ادەبي بايلانىستاردى نىعايتۋعا قوسقان ۇلەسىنىڭ ناتيجەسى. ءىس-شارانى جازۋشى, قازاقستاننىڭ ەڭبەك سىڭىرگەن قايراتكەرى, كورنەكتى جازۋشى الىبەك اسقاروۆ جۇرگىزدى. مەملەكەتتىك سىيلىقتىڭ لاۋرەاتى, جازۋشى تولەن ابدىك: «وسىعان دەيىن «فوليانت» باسپاسى شەتەلدىك كلاسسيكالىق شىعارمالاردى اۋدارىپ, باسپادان شىعارىپ, وقىرمانىن ءتانتى ەتتى. ەندى بۇل باسپا قازاق ادەبيەتىنىڭ كەرەمەت شىعارمالارىن شەتەلگە تانىستىرسا دەگەن ويدامىز» دەگەن تىلەگىن ءبىلدىردى.
30 جىلعا جۋىق تاريحى بار «فوليانت» – ەلىمىزدەگى كوپسالالى جەتەكشى باسپالاردىڭ ءبىرى. باسپانىڭ نەگىزگى ماقساتى – قازاق وقىرماندارىن الەمدىك دەڭگەيدەگى ادەبيەتپەن جانە وتاندىق ۇزدىك شىعارمالارمەن تانىستىرۋ. ال نەگىزگى باعىتتارى ايقىن اتالعان باسپا قازاق جانە ورىس تىلدەرىندە بالالار ادەبيەتى مەن كوركەم شىعارمالار شىعارۋ; الەم ادەبيەتىنىڭ ۇزدىك تۋىندىلارىن قازاق تىلىنە اۋدارۋ; وقۋ ورىندارىنا ارنالعان وقۋلىقتاردى باسىپ شىعارۋ; الەمدىك كلاسسيكا, زاماناۋي پروزا, تاريحي روماندار جانە نون-فيكشن جانرىنداعى كىتاپتاردى ۇسىنۋ بويىنشا ءونىمدى جۇمىس ىستەپ كەلەدى. سونىمەن بىرگە جىل سايىنعى «Astana Eurasian Book Fair» ەۋرازيالىق حالىقارالىق كىتاپ كورمە-جارمەڭكەسىنىڭ ۇيىمداستىرۋشىسى. بۇل – كىتاپ وقۋ مادەنيەتىن دامىتۋ مەن باسپا يندۋسترياسىن قولداۋعا باعىتتالعان ەلىمىزدەگى ەڭ اۋقىمدى كىتاپ جارمەڭكەسى.
