سونداعى ورىس دياسپوراسىمەن كەزدەسۋدە ول كىسى: «قاي ەل, قاي جەردە جۇرسەڭىزدەر دە مەن سىزدەردى وتانداستارىم دەپ بىلەمىن. قانداي جاعداي بولسا دا ءبىر-ءبىرىمىزدىڭ قانداس, تۋىس ادامدار ەكەندىگىمىزدى ۇمىتپاڭىزدار», – دەپ ەميگراتسياداعى جاقىندارى مەن رەسەيدەگى 1918–1920 جىلدارداعى ازامات سوعىسىنان امالسىز شەتەلگە كەتكەن بۇرىنعى اقسۇيەكتەر ۇرپاقتارىنىڭ «رۋحىن» كوتەرە ءسوز سويلەگەن عوي. ال ودان بەرتىندە, بۇرىنعى وداقتاس رەسپۋبليكالار تاۋەلسىزدىك العان تۇستا وڭتۇستىك كورەيانىڭ ءبىزدىڭ ەلىمىزدە تۇراتىن قانداستارىن سەۋلگە شاقىرىپ, باۋىرمالدىق كورسەتكەنىن ەشكىم ءالى ۇمىتا قويعان جوق. سودان كەيىن مۇنداي جيىنداردىڭ يزرايل, گەرمانيادا وتكەنى ءمالىم. وسى ءۇردىستى قىتاي ۇكىمەتى قالت جىبەرسىن بە؟ دانەكەرلىك كىلتى دەپ تابىلىپ, سونىڭ نەگىزىندە دۇنيەجۇزىنىڭ 21 ەلىنەن شاقىرىلعان «وتانداستاردىڭ» قاتارىندا استانادان قىتايتانۋشى عالىم دۇكەن ءماسىمحان ۇلى مەن توپ-مەنەدجەر ءبىز دە بار بولىپ شىقتىق.
...قىتاي ەلىن شاقىرىلعان قوناقتارعا تانىستىرىپ-كورسەتۋ شىڭجاڭ ورتالىعى ۇرىمشىدەن 180 شاقىرىم قاشىقتىقتاعى تۇرفان وڭىرىنەن باستالدى. العاشقى توقتاعان جەرىمىز اتالعان ايماق باس قالاسىنىڭ شەتىندەگى 400 گەكتارلىق ءجۇزىم القابى بولدى. گيد مىندەتىن اتقارعان تالدىرماش دەنەلى ۇيعىر قىزى زينناتتىڭ ايتۋىنشا, مۇندا اتالعان جەمىستىڭ 180-گە جۋىق ءتۇرى وسەدى ەكەن. ءبىزدى ەرەكشە تاڭعالدىرعانى باۋ-باقشانى كاسىپكە اينالدىرعان جەرگىلىكتى تۇرعىنداردىڭ ولاردى ءوسىرىپ, كۇتىپ-باپتاپ, جيناپ الىپ, مەملەكەتكە وتكىزۋدەگى قاتاڭ تۇردە جولعا قويىلعان جۇيەلى ءتارتىپ پەن رەتتىلىك ۇلگىسى دەر ەدىك. سونىڭ ناتيجەسىندە مۇندا ءجۇزىمنىڭ وزىنەن باستاپ وزەگىنە دەيىن قاجەتكە جاراتىلاتىن بولىپ شىقتى. بۇل دەگەنىمىز, ماسەلەن, ءتيىستى كومبينات تسەحتارىنان ودان شىرىن, ءشاربات, شاراپ وندىرىلسە, جەمىستەرىنەن قالعان ءدان-دانەكتەر كەلەسى ءبىر كونۆەيەردەگى شەمىشكە سىعىندارىنا قوسىلىپ حالۋاعا اينالادى دەگەن ءسوز. تۇران جۇزىمدەرىنىڭ ودان كەيىنگى تۇتىنىس كوزى ولاردىڭ ءتۇرلى سۇرىبىنان كەپتىرىلگەن مەيىز كىشمىشتەردىڭ ءۇرىمشى ناۋبايحانالارىنداعى كۇلشەلەرگە قوسىلىپ پىسىرىلەتىن دامدەۋىشكە پايدالانۋى مەن قۇلجا, قاشعار بازارلارىنىڭ سورەلەرىن تولتىرىپ, سونداعى ەل سۇرانىسىن قاناعاتتاندىرۋى دەيدى گيد. ۇشىنشىدەن, مۇنداعى جۇزىمدىكتەردىڭ جەمىسى كۇزدە تولىق جينالىپ الىنعاننان كەيىن ولاردىڭ سىنعان نەمەسە كەرەكسىز دەپ كەسىلگەن بۇتاقتارى سول قىشلاقتارداعى ءۇي جىلىتاتىن كاڭ وشاقتارى مەن نان جاباتىن تاندىرعا تاپتىرماس وتىن, ال القاپتاعى اتكوپىر جاپىراقتار مال فەرمالارىنداعى قۇراما جەمگە قوسىلاتىن ينگريدەنتكە پايدالانىلادى ەكەن.
بۇلاردان باسقا.., ءيا, جوعارىداعىلاردان وزگە ءوزىمىز بايقاپ-باعامداعان ءبىر جاقسى نارسەنى سۇيسىنە ايتپاسقا بولمايدى. ول تۇرفانداعى ۇلان-عايىر جۇزىمدىك القابىنىڭ شارۋاشىلىق ماقساتىنداعى باۋ-باقشا تەلىمدەرى عانا ەمەس, كوپشىلىك ارالاپ كورىپ, سەرۋەندەيتىن كوكجاسىل وازيسكە يە دەمالىس ورنى دەڭگەيىنە دەيىن جەتكەن ەرەكشەلىگى دەر ەدىك. ءيا, سولاي. مۇنداعى پلانتاتسيالار كادىمگى پارك سەكىلدى. القاپتىڭ جيەك جولىمەن كەلە جاتساڭىز, توبەڭىزدە كوك ءجۇزىن جاپقان ءجۇزىم جاپىراقتارىن كورەسىز. ول مىنا جەردۇنيەنى قۋىرىپ تۇرعان اپتاپ كۇن كوزىن قالقالاپ, جۇرگىنشىلەردى ىستىققا ۇرىندىرمايدى. ال سول سوقپاقتار سورابىنىڭ جان-جاعى – سالقىن سامالدىڭ سوعۋىنا جاعداي جاساعان ۇلكەندى-كىشىلى سۋبۇرقاقتار. سولاردىڭ سانسىز ۇساق تامشىلارىنان كەلەتىن كوزگە كورىنەر-كورىنبەس نازىك ىلعالدى توزاڭ تىنىسىڭىزدى كەڭىتىپ, بويىڭىزدى سەرگىتەدى. سۋبتروپيكالىق كليماتقا ۇقساس دەپ ايتارلىق وسىنداي جانعا جايلى ءجۇزىم باعىنىڭ ىشىندە ءجۇرىپ, ونداعى ورنالاسقان دۇكەندەر مەن مولتەك ساۋدا نۇكتەلەرىن, سونداي-اق اسحانالار مەن بالالارعا ارنالعان اتتراكتسيونداردى كورگەنىمىزدە: «مىنە, تابىلعان اقىل! ءىستى, تىرلىك كوزىن تابۋ دەپ وسىنى ايت!» – دەدىك ىشىمىزدەن. ويتكەنى كىشىگىرىم مۇيىستەردەگى حاۋىزدار اراسىندا ورنالاسقان دامحانالارداعى تۋريستەرگە كورسەتىلىپ جاتقان تولاسسىز قىزمەت پەن دۇڭگىرشەكتەردەن قۇرالعان جايما بازار سورەلەرىندەگى كەپتىرىلگەن نەمەسە ساباعىنان جاڭا عانا ءۇزىلىپ الىنعان جۇزىمدەردى ساياحاتشىلارعا ۇسىنىپ, ساۋدا-ساتتىقتى بارىنشا قىزدىرىپ جاتقان قالا تۇرعىندارىنىڭ ءابجىل قيمىلى قازىرگى زامانعى نارىق تالابىمەن كەرەمەت ۇندەستىك تاۋىپ تۇر. وسىلاردى بايقاپ, ويعا تۇيگەنىمىز: تۇرفاندىقتاردىڭ بۇل جەردە ءسوز جوق, ەكى جەپ بيگە شىعىپ تۇرعانى انىق. ولاي دەيتىنىمىز, بىرىنشىدەن پلانتاتسياعا ءجۇزىم ءوسىرىپ, ونىڭ جەمىسىنەن جاپىراعىنا دەيىن پايدا تابادى. ەكىنشىدەن ءسوز ەتىپ وتىرىپ سول القاپتى باققا, باق بولعاندا دا دەمالىس ورنى – پارك دەڭگەيىنە كوتەرىپ, ءار بۇرىشىن تۋريستەرگە قىزمەت كورسەتەتىن تابىس كوزىنە اينالدىرادى.
وسىدان كەيىنگى تۇرفانداعى ءبىزدىڭ بارىپ كورگەن كورنەكتى ورىن ول مۇنداعى جەراستى سۋ كوزدەرى تۋننەلى بولدى. كارىز دەپ اتالاتىن ونىڭ ەستە جوق ەسكى زامانداعى ومىرگە كەلۋ تاريحى, ديقانداردىڭ سودان بەرگى ۋاقىتتا ونى باۋ-باقشاعا قالاي پايدالانىپ كەلگەن تاسىلدەرى ءتۇرلى ەنتسيكلوپەديالار مەن انىقتامالىقتاردا جەتكىلىكتى جازىلعان. بۇعان قوسا ونىڭ يرريگاتسيالىق سان ءتۇرلى سىزبالارعا تولى سۋرەتتەرى قازىر ينتەرنەتتە ءورىپ ءجۇر. سوندىقتان ءبىز ولاردى قايتا تاپسىرلەپ جاتپاي, وقىرماندارعا جولباسشى قىزىمىز زيننات نە ايتتى جانە ءوزىمىز كوزىمىزبەن نە كوردىك, سونى عانا باياندايىق.
اسىقپاي زەر سالا قاراپ, بايقادىق. كارىز دەگەنىمىز جەر استىنداعى قولدان قازىلعان ۇلكەن ارىقتار ەكەن. وعان قاجەتتى سۋ تۇرفاننان 60 شاقىرىمداي ءور جاقتاعى تيان-شان تاۋلارىنىڭ قارلى جوتالارىنان ەرىپ جەرگە سىڭگەن ىلعال كوزدەرىنەن الىناتىن بولىپ شىقتى. ول ءۇشىن وسىدان ونشاقتى عاسىر بۇرىن الىپ تاۋ توسكەيى مەن ونىڭ ەتەگىندەگى كەڭ جازىقتىڭ اراسىن ءار 20 شاقىرىم قاشىقتىق قالدىرا وتىرىپ, جەر استىنان ءۇش كولدەنەڭ توسپا تۋننەل قازىلىپتى. ونىڭ ءمانى: تيان-شان سىلەمدەرىندەگى تاس پەن قۇمعا سىڭگەن قار, جاڭبىر سۋلارى جەر استىمەن ەڭىستەگى العاشقى كولدەنەڭ توسپاعا كەلىپ, ونى تولتىرادى ەكەن. ودان سوڭ ەرنەۋىنەن اسىپ-توگىلگەن سۋ سول جەر استىنىڭ ءار جەرىنەن تومەنگە قاراي تىك تارتىلعان شاعىن-شاعىن توعاندار ارقىلى كەلەسى 20 شاقىرىمداعى كولدەنەڭ تۋننەلگە جينالادى دا ودان ول جوعارىدا ايتىلعان تاسىلمەن ءۇشىنشى 20 شاقىرىمدىق قاشىقتىقتاعى توسپاعا بارىپ تىرەلەدى. اقىرى تاۋ توسكەيىندەگى بىرىنەن كەيىن ءبىرى ورنالاسقان وسى ءۇش كولدەنەڭ تۋننەلدەن جينالعان «زاپاس» سۋ قورى تۇرفانعا قاراي الدەنەشە جەردەن تىكە تارتىلعان كارىزدەر مەن ەتەكتەگى شاھار مەن ونىڭ اينالاسىنداعى ەلدى مەكەن باۋ-باقشالارعا قاجەت سۋدى بەلگىلى مولشەرمەن جىبەرىپ وتىراتىن بولعان. وسى ارادا: «ەجەلگى زامانداعى يرريگاتسيا ماماندارى اتالعان ايماققا قاجەت سۋ كوزىن نەگە جەرۇستى كانالىمەن جەتكىزۋدى ويلاماعان؟» دەگەن سۇراقتىڭ تۋارى انىق. وعان: «بىرىنشىدەن, ءسوز ەتىلىپ وتىرعان ءوڭىر – اتام زاماننان بەرى جۇرگەن جاندى اپتاپ ىستىعىمەن اتتاتپايتىن ءشولدى جەر. تيان-شاننان باستاۋ الاتىن سۋ اشىق جەرۇستى كانالىمەن اقسا, ونىڭ تەك جارتىسى بۋعا اينالىپ, ەڭبەك ەش كەتەر ەدى, – دەپ جاۋاپ بەرۋگە بولادى.. – ال ەكىنشىدەن, تۇرفان ويپاتىنداعى تومەنگى جەر قىرتىسىندا ىلعالدى وزىنە تارتىپ الاتىن قارا توپىراق پەن ساز بالشىق جوق. مۇنداعى تەكتونيكالىق قاباتتار قۇم مەن تاس جانە قىزىل كەرىشتەن قۇرالعان. وسىعان بايلانىستى جەر استىنداعى كارىزدەردىڭ تابانى قاتتى جىنىستارمەن قاتىپ قالعاندىقتان, ولارمەن اققان سۋ ەشقايدا سىڭبەيدى. ءسويتىپ, ءراسۋا بولماي, ەگىستىككە سول مەن كولەمىندە بارادى». وسىلايشا, بەيجىڭ مەن مىسىرعا دەيىنگى ارالىقتى قامتىعان ۇلى جىبەك جولى ومىرگە كەلگەن ءVىى–ىح عاسىرلاردا باستالىپ, ءحىى–حىV عاسىرلاردا اياقتالعان تۇرفانداعى بۇل جەراستى كارىزدەرىن جەرگىلىكتى حالىق ۇقىپتىلىقپەن پايدالانىپ كەلگەن عوي. سوندىقتان دا ونىڭ ءار كەزدەرى كەڭىتىپ, قوسىپ سالعان ۇلكەندى-كىشىلى تارام-تارام ارىقتارىنىڭ جالپى ۇزىندىعى 1000 شاقىرىمعا جۋىقتايدى ەكەن. «بۇل عاجايىپ يرريگاتسيالىق قۇرىلىمعا ديقاندار ءالى دە تاۋەلدى, – دەيدى زيننات. – بىراق ءححى عاسىرداعى جۇردەك ۋاقىت ەكپىنى مەن وڭىردەگى ەگىن شارۋاشىلىعىمەن اينالىساتىن, ادامدار سانىنىڭ كوبەيىپ, جەر تەلىمدەرىنىڭ جەدەل يگەرىلۋىنە وراي ءسوز ەتىلىپ وتىرعان كارىز رەسۋرسىنا قازىر ارتەزيان قۇدىعىنا قاتىستى عىلىمي-تەحنيكالىق ينجەنەرلىك وزىق تەحنولوگيا كومەككە كەلگەن. تۇرفان باۋ-باقشا وسىرۋشىلەرى بۇگىنگى تاڭدا كونە مەن جاڭا وسى ەكى ءتاسىلدى قاتار پايدالانۋدا».
...تۇسكە دەيىن جوعارىدا ايتىلعان ءجۇزىم باعى مەن جەراستى كارىزدەرىن ابدەن ارالاپ كورىپ بولعان ءبىز سول كۇننىڭ ەكىنشى بولىگىندە دە تالاي قىزىققا كۋا بولدىق. سولاردىڭ ىشىنەن تۇرفاننىڭ تىلسىم سىرعا تولى ەكى ەجەلگى ەسكەرتكىشىن ەرەكشە اتاپ ايتا كەتۋدى ءجون كورىپ وتىرمىز. ولار – سۇلەيمەن مۇناراسى مەن ولكەتانۋ مۇراجايىنداعى كوپ ەشكىم كورىپ-بىلمەگەن عاجايىپ ەكسپونات. حVII عاسىردا سالىنعان, بيىكتىگى 50 مەتر مۇناراعا كەلسەك, جەرگىلىكتى حالىقتى جوڭعار شاپقىنشىلىعىنان قورعاۋ ءۇشىن تۇرفانعا قول سوزعان تسين پاتشالىعىنىڭ اسكەرىن سول كەزدەگى ەل باسشىسى ەمەن قوجا جاقسى قارسى الادى. بۇعان ريزا بولعان قىتاي بيلەۋشىلەرى ونىڭ سول وڭ كوزقاراسىنا وراي مۇناراسى بيىك ۇلكەن مەشىت سالىپ بەرۋگە ۇيعارىم جاسايدى. قۇرىلىسىن بەيجىڭ شەبەرلەرى جۇرگىزىپ, ال ساۋلەت سىزباسىن تۇرفان اكىمشىلىگىنىڭ ماماندارى جاساپ, قاداعالاعان كەشەن جۇمىسى ۇزاققا سوزىلادى. اقىرى ول ەمەن قوجا ومىردەن ءوتىپ, بيلىك ونىڭ ۇلى سۇلەيمەن بەك قولىنا كوشكەن تۇستا بىتەدى دە مۇنارا سونىڭ ەسىمىمەن اتالادى. قىزىل قىش كىرپىشتەن ءورىلىپ, 1777 جىلى جۇرتقا ەسىگىن ايقارا اشقان بۇل ءدىني ورىن زامان مەن ۋاقىتتىڭ نەبىر الماعايىپ كەزدەرىنە توتەپ بەرىپ, بۇگىنگى كۇنگە ەش جەرى ب ۇلىنبەي امان جەتكەنى قۋانىشتى, ارينە. ارالاپ كورىپ كەلەمىز: مەشىت تە, ونداعى مەدرەسە دە قالىپتى جاعدايدا جۇمىس ىستەۋدە. عيماراتتىڭ قاي بۇرىشىنا بارساڭىز دا قوڭىر سالقىن, جانعا جايلى تەمپەراتۋرا ۇستالىنىپ تۇر. مۇنىڭ سەبەبى, كەشەن قابىرعالارىنداعى كەراميكالىق تورلى تەرەزەلەر مەن ويىقتار اۋانىڭ نە ىستىق, نە سۋىق ەمەس قالىپتى جاعدايىن قامتاماسىز ەتەدى ەكەن. ءسويتىپ, بولمەلەردىڭ جىلىلىعىن تەڭشەيدى. ال توردەگى ساعاتقا ۇقساس قوس بەلگى بولسا, بەسىن مەن نامازشام مەرزىمدەرىن ءدال انىقتايدى. مەشىتتىڭ كورنەكتى جەرلەرىندە شاعاتاي تىلىندە جازىلعان كونە جازۋلار كورىنەدى. بۇل قۇدىرەتى كۇشتى اللاعا ءوزى جاراتقان پەندەلەرىنىڭ راحمەتىن جولداعان سوزدەرىنىڭ يماندىلىق بەلگىسى سەكىلدى بولىپ كورىندى بىزگە. ءيا, ول ماتىندەر سول زامانداعى مۇحاممەد پايعامبار ۇمبەتتەرىنىڭ داۋسىن بۇگىنگى ۇرپاققا ءۇنسىز جەتكىزىپ تۇرعان تىلسىم كۇش سياقتى.
ەندى شاھاردىڭ جوعارىدا ءوزىمىز ەسكە سالعان ولكەتانۋ مۇراجايىنداعى ەرەكشە ەكسپوناتقا كەلەر بولساق, ول جويداسىز الىپ جانۋاردىڭ قاڭقاسى دەر ەدىك. وسىدان كوپ جىل بۇرىن ۇرىمشىدەن تۇرفانعا تەمىرجول سالىنۋعا دايىندىق جۇرگىزىلىپ جاتقان عوي. سوندا ماماندار كولدەنەڭىنەن كەرىلىپ تۇرعان جوتانى كەسىپ ءوتۋ ءۇشىن ونى ديناميتپەن جارىپ قوپارعاندا, جارىلىس دۇمپۋىنەن سۇيەكتەرى شاشىلىپ قالعان ەكى ۇلكەن اڭنىڭ قاڭقاسىن كورەدى. بۇعان پالەونتولوگتەر شاقىرىلىپ, ولار ىسكە كىرىسكەندە, بىرەۋىنىڭ دەنە مۇشەلەرى كۇل بوپ ۋاتىلىپ, قۇراستىرۋعا مۇلدە جارامسىز بولىپ شىعادى. ال ەكىنشىسىن ماماندار كوپ ەڭبەكتەنىپ وتىرىپ قالپىنا كەلتىرىپتى. مىنە, سول قاڭقاعا قاراپ تۇرىپ تاڭعالدىق. جانۋاردىڭ بويىنىڭ بيىكتىگى 6, دەنەسىنىڭ ۇزىندىعى 9 مەتر ەكەن. جىلىك سۇيەكتەرى 150–165 سانتيمەتر ارالىعىندا. ال سالماعى – 10 توننا. وسىدان 2500 جىل بۇرىن شاماسىندا ءومىر سۇرگەن ماق ۇلىقتىڭ تۇرقىن كورىپ, ءوزىمىز قازىر قىدىرىپ جۇرگەن مىنا تۇرفان ويپاتىندا ءبىر كەزدەردە وقۋلىقتارداعى ەڭ ۇلكەن حايۋاناتتار الەمىنىڭ وكىلى رەتىندە ايتىلاتىن دينوزاۆرلار دا ءومىر سۇرگەن ەكەن-اۋ دەپ ويلادىق.
...شاھاردان شىعىپ, ۇرىمشىگە قايتاردا گيد: «ساياحاتىمىزدى وسىدان 37 شاقىرىم جەردەگى كونە قالاشىق ورنىن كورسەتۋمەن اياقتايمىز. ول استانا دەپ اتالادى», دەگەنى... بۇل سوزگە ارينە اۆتوبۋستاعى اۋستراليا, كانادادان كەلگەندەر نازار اۋدارعان جوق. ال ءبىز... قازاقستاننان شاقىرىلعان دۇكەن ەكەۋىمىز بەن قىرعىزستاننىڭ قاراقول قالاسىنانمىن دەپ تانىسقان دۇنگەن جىگىتى ماعازى ءبارىمىز ەلەڭ ەتە تۇستىك. اتالعان جەرگە كەلسەك, ەستە جوق ەسكى زامانداعى قۇم باسقان ەجەلگى قالا ورنى ەكەن. مۇنداعى قۇرىلىسقا كىرپىش نە تاس پايدالانىلماعان. سىرعاۋىل ما, جوق الدە باس-اياعى بايلانعان قامىس بۋمالارى ما, سولاردان ەكى ورتاسى اشىق جىڭىشكە ۇستىن جاسالىپ, سول بوس قالعان جەر توپىراقپەن تولتىرىلعان سوڭ ونى ۇستىنەن سالماقتى زاتپەن تۇيگىشتەپ ۇرا وتىرىپ تاپتاپ, ءۇي نەمەسە دۋال قابىرعالارىن تۇرعىزعان. ءىىى–V عاسىرلار ارالىعىندا پايدا بولىپ, سودان سوڭ يەن قالعان بۇل قالاشىقتان ارحەولوگتەر كوپ ەشتەڭە تاپپاعان. تەك ونىڭ ىرگەسىندەگى نەكروپولدەن ەرەسەك ادامدار مەن ءسابي بالالار بولەك-بولەك توپتالىپ جەرلەنگەن سۇيەكتەردى كەزدەستىرگەن. بۇگىنگى زامان ادامدارىنا بەلگىلىسى: بۇل قادىم عاسىردا پايدا بولىپ, كەيىن قۇم باسقان قالاشىقتىڭ قيراندى ورنى. سوسىن نارراتيۆتەر ارقىلى جازباعا تۇسكەن ونىڭ استانا دەگەن تۇركىلىك اتاۋى. جانە وسى ەجەلگى مەكەن ىرگەسىندەگى قۇپياسىن ىشىنە بۇككەن تىلسىم نەكروپول. ينتەرنەتتە: «الەمدە استانا اتاۋىنا يە ەكى جەر بار. ول قازاقستانداعى ەلوردا جانە قحر-دىڭ تۇرفان ويپاتىنداعى كونە قالاشىق ورنى», دەلىنگەن دە قويعان. باسقا جاۋاپ جوق. ءسوز سوڭىندا ايتارىمىز: ءبىز عىلىم ادامى ەمەسپىز. سوندىقتان نە كوردىك سونى ەلگە ايتۋ, جۇرتتى قۇلاعدار ەتۋ. ال وسى اقپاراتقا دەن قويىپ, ونى ىزدەنىس يدەياسىنا اينالدىرامىن دەيتىن ەنتۋزياست جاستار بولسا, قانەكي؟..
جانبولات اۋپباەۆ,
جۋرناليست
استانا
