«ۇلتتىق قور – بالالارعا» باعدارلاماسى اياسىندا, پرەزيدەنتتىڭ باستاماسىمەن, سوڭعى 3 جىلدا 7 ملن جاس قازاقستاندىقتىڭ شوتىنا 2,5 ملرد دوللاردان استام قاراجات اۋدارىلدى. سونىمەن قاتار, 2030 جىلعا دەيىنگى «قازاقستان بالالارى» ءبىرتۇتاس باعدارلاماسى بەكىتىلدى. بۇل باعدارلامادا بالالاردىڭ قۇقىقتارى مەن ءال-اۋقاتىن قورعاۋعا باعىتتالعان بارلىق شارالار بىرىكتىرىلگەن.
«مەملەكەت باسشىسى بەلگىلەگەن باسىم باعىتتاردىڭ ءبىرى – مەكتەپ ينفراقۇرىلىمىنداعى ماسەلەلەردى جويۋ بولدى. سوڭعى 7 جىلدا 1300-دەن استام جاڭا مەكتەپ سالىنىپ, قاۋىپتى جانە ءۇش اۋىسىمدى نىساندار سانى ازايتىلدى, ماتەريالدىق-تەحنيكالىق بازا جاڭارتىلدى. تەك پرەزيدەنت باستاماسىمەن ىسكە قوسىلعان «كەلەشەك مەكتەپتەرى» ۇلتتىق جوباسى اياسىندا 2023–2025 جىلدارى ەل بويىنشا حالىقارالىق ستاندارتتارعا ساي 217 مەكتەپ سالىندى», دەدى ۇكىمەت باسشىسى ولجاس بەكتەنوۆ.
24.kz ارناسىنىڭ جازۋىنشا, جاپپاي سپورتتى دامىتۋ جانە الەۋمەتتىك ينفراقۇرىلىمدى جەتىلدىرۋ مەملەكەتتىك ساياساتتىڭ نەگىزگى باسىمدىقتارىنىڭ ءبىرى بولىپ قالا بەرەدى. ايماقتاردا سپورت جانە مەديتسينالىق نىساندار بەلسەندى سالىنىپ جاتىر. دەنساۋلىق ساقتاۋ سالاسىندا قايتارىلعان قاراجات ەسەبىنەن 180-دەن استام نىسان سالىنىپ, 230-دان استام سۋ جابدىقتارى رەكونسترۋكتسيالانعان.
قارجى مەكتەپتەر, سپورت نىساندارى, كوممۋنالدىق ينفراقۇرىلىم جانە باسقا دا الەۋمەتتىك ماڭىزدى جوبالاردى دامىتۋعا باعىتتالادى.
