ء«فيلمنىڭ بيۋدجەتى شاعىن عانا بولدى. اكتەرلەر كينوعا تەگىن تۇسۋگە كەلىستى دەسەك تە بولادى. اۆتورلىق كينوعا قولداۋ كورسەتكەنى ءۇشىن ولارعا ءوز العىسىمدى بىلدىرەمىن», دەدى ءفيلمنىڭ رەجيسسەرى ءشاريپا ورازباەۆا.
فيلمدە باياندالعان وقيعا ءشاريپانىڭ جاقىن قۇربىسىنىڭ ومىرىنە نەگىزدەلگەن. بۇل تەك كينو عانا ەمەس, رۋحتىڭ شىنايى دراماسى. فيلمدە جالعىز قالىپ, ينتەرناتتا وسكەن قىزدىڭ قيىندىققا تولى ءومىرى كورسەتىلەدى.
«قۇربىم تاعدىردىڭ ءتۇرلى سىناقتارىن باستان كەشكەن. وسىدان سوڭ ول كۇردەلى پسيحولوگيالىق قيىندىقتارعا تاپ بولدى. قازىر ول ۇنەمى ءوزىن قۇبىجىق رەتىندە ەلەستەتەدى. ءفيلمنىڭ سوڭىندا ءدال وسى ءساتتى كورسەتۋگە تىرىستىم. سەبەبى ءبىز ءوزىمىزدى قۇبىجىققا اينالدىرامىز», دەيدى ورازباەۆا.
الايدا «تۇل» جەكە ادامنىڭ ءومىرى عانا ەمەس, تۇتاس قازاقستاندى سيپاتتايتىن تۋىندى. قاڭتار وقيعاسىنىڭ كادرلارى ءفيلمدى ەرەكشە اتموسفەراعا بولەدى. وسىلايشا رەجيسسەر ءوز ازاماتتىق ۇستانىمىن كورسەتە الدى.
«قاڭتار وقيعاسى بارلىعىمىز ءۇشىن اۋىر جانە قايعىلى تاقىرىپ. فيلمدە ونى كورسەتۋ ارقىلى بىزگە نەنىڭ ماڭىزدى ەكەنىن ايتقىم كەلدى», دەيدى وتاندىق رەجيسسەر.
ءفيلمنىڭ اتاۋى «تۇل». بۇل تەرەڭ ماعىنالى ءسوز. سونداي-اق كارتينانىڭ ىشكى ءمانىن اشا الادى. ءشاريپا ورازباەۆانىڭ ايتۋىنشا, قازاق تىلىندە بۇل ءسوز تەك «جەتىم» دەگەندى عانا ەمەس, سونىمەن بىرگە ادامنىڭ قوعامنان تولىق وقشاۋلانعانىن, ونىڭ اۋىرتپالىعىن ەشكىم تۇسىنە المايتىندىعىن بىلدىرەدى.
«تۇل» ءفيلمى تەك جەتىم قىز تۋرالى ەمەس. بۇل ادامنىڭ ىشكى جان دۇنيەسىندەگى ارپالىس. مەن وسى سەزىمدى بەرۋگە تىرىستىم», دەيدى رەجيسسەر.
XVII حالىقارالىق «ەۋرازيا» كينوفەستيۆالىندە ءفيلمنىڭ تۇساۋكەسەرى ءوتتى. زالدا ينە شانشار ورىن تابىلماي, تۋىندى كورەرمەندەردىڭ ىستىق ىقىلاسىنا يە بولدى. جينالعان قاۋىم كورسەتىلىمنەن كەيىن رەجيسسەر مەن اكتەرلەردەن وزدەرىن مازالاعان سۇراقتاردىڭ جاۋابىن الدى.
«تۇل» ءفيلمى رەسۋرستاردىڭ ازدىعىنا قاراماستان ساپالى كينو تۇسىرۋگە بولاتىنىن دالەلدەدى. ول كورەرمەندەردىڭ جان دۇنيەسىن بايىتىپ, ويىن تەربەپ, سەزىمىن قوزعايدى.
ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – قر مادەنيەت جانە اقپارات مينيسترلىگى. كينوفەستيۆالدى تىكەلەي ۇيىمداستىرۋ الماتى قالاسى اكىمدىگىنىڭ قولداۋىمەن شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا جۇكتەلگەن.
ايتا كەتەيىك, ءىس-شاراعا KAZ Minerals كەن ءوندىرۋ كومپانياسى, Sarens Kazakhstan, Eurasian Resources Group (ERG), Salem Entertainment, Kinopark Theatres كينوتەاترلار جەلىسى, Astana Motors, «قازاقتەلەكوم» اق جانە A-Event KZ دەمەۋشىلىك ەتتى.
