سۋرەت: ru.freepik.com
«اقپاراتتىق تەحنولوگيالاردىڭ دامۋىمەن بىرگە الاياقتار دا ءوز ارەكەتتەرىن جەتىلدىرىپ, ولاردىڭ قولداناتىن ادىستەرى كۇردەلەنىپ بارادى. ەڭ كەڭ تارالعان ادىستەرى – ءوزىن بانكتەر مەن كوممۋنالدىق قىزمەتتەردىڭ قىزمەتكەرى رەتىندە تانىستىرىپ, ازاماتتاردىڭ ەسەپشوتتارىنداعى قارجىنى جىمقىرادى. سونداي-اق قاۋىپتى سىلتەمەلەر جىبەرەدى. وكىنىشتىسى, الدانىپ قالىپ جاتقاندار از ەمەس», دەيدى ن.ارىستانبەك.
كيبەرالاياقتىقپەن كۇرەسۋدىڭ ءتيىمدى جولى – الدىن الۋ ءىس-شارالارىن جۇرگىزۋ. ال الداپ سوققان الاياقتى تابۋ – وتە قيىن. سوندىقتان وڭىردە اقپاراتتىق-پروفيلاكتيكالىق ءىس-شارالارعا باسىمدىق بەرىلىپ وتىر. ىشكى ىستەر مينيسترلىگىنىڭ 2023–2025 جىلدارعا ارنالعان كيبەر قىلمىسپەن كۇرەسۋ باعدارلاماسىنا سايكەس وبلىستا جىل سايىن جەدەل پروفيلاكتيكالىق ءىس-شارالار وتكىزىلەدى. بيىل 12–14 قاراشا ارالىعىندا بۇكىل ەل اۋماعىندا «انتي-فرود» جەدەل پروفيلاكتيكالىق ءىس-شاراسى وتكىزىلدى.
سونىمەن قاتار وڭىردە «ستوپ-الاياق» ءىس-شاراسى جۇزەگە اسىرىلىپ جاتىر. پوليتسيا قىزمەتكەرلەرى تۇرعىن ۇيلەردى ارالاپ, ينتەرنەتتەگى الاياقتىقتىڭ تۇرلەرى تۋرالى ەسكەرتۋلەر جاساپ, حالىقتىڭ قارجىلىق جانە قۇقىقتىق ساۋاتىن ارتتىرۋعا باعىتتالعان اقپارات تاراتۋمەن شۇعىلدانىپ ءجۇر. سونداي-اق وبلىس پەن وسكەمەن قالاسى اكىمدىكتەرىمەن بىرلەسىپ, اقپاراتتاندىرۋ بويىنشا مەديا-جوسپار ازىرلەندى.
بۇگىندە قىلمىستاردى ءتيىمدى تەرگەۋ ءۇشىن شىعىس قازاقستان وبلىسى پوليتسيا دەپارتامەنتى جانىنان كيبەر قىلمىستاردى اشۋمەن اينالىساتىن ارنايى «كيبەرپول» ءبولىمى قۇرىلعان.
شىعىس قازاقستان وبلىسى
