ءىرى بانكتەردىڭ كەلگەنى ءتيىمدى

قازاقستان قارجىگەرلەرى قاۋىمداستىعى (ققق) كەڭەسىنىڭ ءتورايىمى ەلەنا باحمۋتوۆا وتاندىق قارجى نارىعىندا جاڭا شەتەلدىك ويىنشىلاردىڭ پايدا بولۋى وتاندىق بيزنەستى قارجىلاندىرۋدىڭ قوسىمشا مۇمكىندىكتەرىن اشادى دەپ ەسەپتەيدى.

«جاڭا بانكتەردىڭ كەلۋى قارجى نارىعىنداعى باسەكەلەس­تىكتى كۇشەيتەدى. بۇل بانكتەردى جاڭا, نەعۇرلىم ىڭعايلى جانە ءتيىمدى قارجىلىق شەشىمدەر­دى, ونىمدەردى, قىزمەتتەر مەن سەرۆيستەردى ازىرلەۋگە ينۆەس­تيتسيا سالۋعا ىنتالاندىرادى. قارجىلىق قىزمەتتەردى تۇ­تىنۋشىلار, جەكە جانە زاڭ­دى تۇلعالار باسەكەلەستىكتى كۇشەي­تۋدەن تەك پايدا كورەدى. سەبەبى ولار وزدەرى ءۇشىن ەڭ ءتيىمدى ۇسىنىستاردى تاڭداۋ مۇمكىندىگىنە يە بولادى», دەيدى قاۋىمداستىق باسشىسى.

ەكونوميست مارات ابدۋراح­مانوۆتىڭ پىكىرىنشە, ءىرى بانك­تەرگە ءۇشىن ءبىزدىڭ نارىق تار. دامىعان نارىقتاردان بىرنەشە شاعىن قارجى ۇيىمى عانا كەلۋگە ىقىلاس تانىتىپ وتىرعان كورىنەدى.

«ولاردىڭ ەلدە بولۋىنىڭ ىشكى نارىققا اسەرى از. جالپى, ءدال قازىر ەلگە اتى بار بانك­تەر كەلسە دە نەسيە ساياساتىنا اسەر ەتە المايدى, تەك قىز­مەت كورسەتۋ سەگمەنتىندە عانا وزگەرىستەر ەنگىزۋى مۇمكىن. قارجى نارىعىن رەتتەۋ جانە دامىتۋ اگەنتتىگى مەن ۇلتتىق بانك شەتەلدىك بانكتەردى ەلگە تارتۋ ماقساتىندا بارىنشا كومپروميستىك شەشىمدەرگە بارىپ وتىر. وسىعان دەيىنگى تالاپتار جەڭىلدەدى, كەيبىرى الىپ تاستالدى. شەتەلدىك بانكتەردى ەلگە تارتۋ وڭاي ەمەس ەكەنىن وسى­دان بىلۋگە بولادى», دەيدى م.ابدۋراحمانوۆ.

وسىعان دەيىن ەلگە سىرتتان كەلگەن بانك ءبىزدىڭ قارجى ينستيتۋتتارىن جۇتىپ قويادى دەگەن پىكىر باسىم بولاتىن. ساراپشى بۇل كوزقاراس قازىر ەسكىرگەنىن ايتادى.

«بىزدە الەۋەتى ىشكى نارىقتان اسىپ كەتكەن بانكتەر جەتەدى. ولاردىڭ ءبىرازى قىرعىز بەن وزبەك نارىعىندا ءوزىنىڭ ەنشىلەس كومپانياسىن اشىپ جاتىر. دەمەك, ءوز بانكتەرىمىز قارجى سەگمەنتىنىڭ بەتالىسىن باسقا باعىتقا اۋىستىرىپ جىبەرۋگە جول بەرمەيدى. تەك الپاۋىت بانكتەر ءبىزدىڭ نارىقتاعى بانكتەردى ىعىستىرىپ شىعارا الادى. بىراق وندايلار قازىر بىزگە كەلۋگە اسىعىپ وتىرعان جوق. بىزگە ۇساق بانكتەر ەمەس, ءىرى بانكتەردىڭ كەلگەنى ءتيىمدى. تەك سولار عانا وسى سەگمەنتتە اشىق باسەكەلەستىكتى قالىپتاستىرار ەدى», دەيدى ەكونوميست.

ۇكىمەت پەن ۇلتتىق بانك­تىڭ شەتەلدىك ينۆەستورلاردى ەلگە تارتۋ ماقساتىمەن ينۆەستي­تسيالىق كليماتتى ساۋىقتىرۋعا قاتىستى قابىلداعان شەشىمدەرى بانكتەرىمىز ءۇشىن ءتيىمدى دەيدى سالا ماماندارى. ساراپشىلار باسەكە تەك بانكتەر اراسىندا ەمەس, وندا جۇمىس ىستەيتىن بىلىكتى قىزمەتكەرلەر اراسىندا دا جۇرسە قۇبا-قۇپ دەگەن پىكىردە.