اتالعان سايىس ءۇشىنشى جىل قاتارىنان ۇيىمداستىرىلىپ وتىر. جەلىدەگى جارىسقا مەكتەپ مۇعالىمدەرى, كوللەدج جانە جوعارى وقۋ ورىندارىنىڭ وقىتۋشىلارى قاتىسا الادى. ولار 3 جەلتوقسانعا دەيىن ءوز پاندەرىنە سايكەس كەلەتىن قىسقا تانىمدىق بەينەجازبانى پلاتفورمادا جاريالاۋى قاجەت. بەينەجازبانىڭ ۇزاقتىعى كەمىندە 30 سەكۋند بولۋى ءتيىس.
وقۋ-اعارتۋ مينيسترلىگىنىڭ ءباسپاسوز حاتشىسى مەرەكە امانگەلدىقىزىنىڭ ايتۋىنشا, مۇعالىم وقۋشىعا ءبىلىم بەرۋ ءۇشىن اۋەلى ونىڭ قىزىعۋشىلىعىن وياتۋى ماڭىزدى.
«TikTok-پەن بىرلەسكەن بۇل جوبا پەداگوگتەردى شىعارماشىلىق تاسىلدەر ىزدەۋگە شابىتتاندىرىپ, ءبىلىم الۋدى قىزىقتى ەتىپ كورسەتەدى دەپ ۇمىتتەنەمىز. ۆيزۋالدى جانە ينتەراكتيۆتى فورماتتار ۇستازدارعا اقپاراتتى قولجەتىمدى ءارى تارتىمدى ەتىپ جەتكىزۋگە كومەكتەسەدى», دەدى ول.
بىلتىرعى بايقاۋ جەڭىمپازدارى بوتاگوز وماروۆا, يگور گنوەۆوي, حايدار مىرزاحمەتوۆتىڭ بەينەجازبالارى وقۋشىلاردىڭ ىقىلاسىنا يە بولعان ەدى.
«بۇل ماعان ءداستۇرلى وقىتۋ شەڭبەرىنەن شىعىپ, كۇردەلى تاقىرىپتاردى وقۋشىلارعا تۇسىنىكتى ءارى قىزىقتى ەتىپ جەتكىزۋدىڭ جولىن تابۋعا مۇمكىندىك بەردى. ماعان اسىرەسە وقۋشىلارىمنىڭ فيزيكانى تالقىلاپ, ءوز ويلارىمەن ءبولىسىپ, تاجىريبەلەرگە ارنالعان جاڭا يدەيالار ۇسىنعانىن كورۋ ەرەكشە قۋانىش بولدى», دەيدى حايدار مىرزاحمەتوۆ.
