فەستيۆالدا اس اتاسى ناننىڭ الۋان ءتۇرى دايىندالدى. سوندىقتان ءار اسپاز بىلگەنىن ورتاعا سالىپ, ءوزارا تاجىريبە الماستى. «الەمدىك رەكوردتى تىركەۋگە قوستاناي وبلىسىنا استانادان ارنايى كەلدىك. بۇعان دەيىنگى باۋىرساق رەكوردى ەكى توننا 47 كيلو بولعان. ال قامىستى اۋدانىنىڭ تۇرعىندارى ەكى توننا ءۇش ءجۇز كيلولىق مەجەگە جەتتى. بۇل – الەمدىك رەكورد», دەدى قازاقستان گيننەس رەكوردتار كىتابىنىڭ رەسمي وكىلى قۋاندىق قۇدايبەرگەنوۆ.
ۇشاتىن پاروم
شۆەتسيا استاناسى ستوكگولم سۋلارىندا ەلەكتر قۋاتىمەن جۇرەتىن پاروم قاتىناي باستادى.
«كاندەلا» كومپانياسى قۇراستىرعان ەلەكتر كەمە جىلدامدىعىن ساعاتىنا 55 شاقىرىمعا دەيىن ارتتىرا الادى. «جالپى العاندا جولاۋشىلار پارومدارى وتىندى كوپ تۇتىنادى. ال ءبىزدىڭ تەحنولوگيا ارقىلى ەنەرگيا شىعىنىن 75 پايىزعا ۇنەمدەۋگە بولادى. وسىلايشا, قالالار اراسىندا قاتىناۋ ۋاقىتى دا ەداۋىر ازايادى. ەڭ باستىسى, قورشاعان ورتاعا ەشقانداي ەكولوگيالىق زالال كەلمەيدى», دەيدى كومپانيا باسشىسى گۋستاۆ حاسسەلسكوگ.
ءباسى جوعارى بيتكوين
بيتكويننىڭ باعاسى شارىقتاپ بارادى. سوڭعى مالىمەتكە قاراعاندا, ونىڭ قۇنى 87 مىڭ دوللاردان اسىپ كەتكەن. بۇل – بۇرىن-سوڭدى بولماعان رەكوردتىق كورسەتكىش.
وسىناۋ قارقىندى وسىمگە اقش-تا دونالد ترامپتىڭ بيلىككە كەلۋى, سونداي-اق كونگرەسكە بيتكويندى قولدايتىن كانديداتتاردىڭ ءوتۋى سەبەپشى. ايتا كەتۋ كەرەك, د.ترامپ بۇعان دەيىن قۇراما شتاتتاردى «پلانەتانىڭ كريپتو استاناسى» ەتۋگە ۋادە بەردى. «رەيتەر» اگەنتتىگىنىڭ دەرەگىنشە, بيرجالاردا وسى ۆاليۋتامەن بايلانىستى اكتسيالار دا ايتارلىقتاي قىمباتتاپ جاتىر.
