فوتو: اقوردا
حالىقارالىق ازاماتتىق اۆياتسيا ۇيىمىنىڭ (ICAO) باسشىسىمەن كەزدەسۋ بارىسىندا اۆياتسيا سالاسىن دامىتۋ پەرسپەكتيۆاسى تالقىلاندى.
مەملەكەت باسشىسى ICAO-مەن ناتيجەلى ىنتىماقتاستىق ورناتقان 30 جىل ىشىندە قازاقستاننىڭ ۇيىم ستاندارتتارىنا سايكەستىگى 82 پايىزعا جەتكەنىن اتاپ ءوتتى. بۇل – دامىعان ەۋروپا ەلدەرىمەن تەڭ دەڭگەيدەگى كورسەتكىش.
قاسىم-جومارت توقاەۆتىڭ ايتۋىنشا, اۋەجايلاردى جاڭعىرتۋ, اۋە كەمەلەرى پاركىن ۇلعايتۋ جانە «اشىق اسپان» رەجيمىن ەنگىزۋ باعىتىنداعى دايەكتى شارالاردىڭ ناتيجەسىندە ۇشۋ گەوگرافياسى ايتارلىقتاي كەڭەيىپ, حالىقارالىق رەيستەردىڭ سانى ارتتى.
ءوز كەزەگىندە ICAO كەڭەسىنىڭ پرەزيدەنتى قازاقستانمەن اۋە تاسىمالىنىڭ قاۋىپسىزدىگى جانە تۇراقتىلىعىن قامتاماسىز ەتۋ ماقساتىنداعى سەرىكتەستىكتى ودان ءارى نىعايتۋعا قولداۋ كورسەتۋگە دايىن ەكەنىن مالىمدەدى. سونىمەن قاتار ەلىمىزدىڭ ازاماتتىق اۆياتسيا سالاسىنداعى تابىسىن جوعارى باعالادى.
سالۆاتورە شاككيتانو قازاقستاننىڭ ۇيىم جانىنان تۇراقتى وكىلدىگىن اشقانى ءۇشىن ريزاشىلىعىن ءبىلدىرىپ, كەلەسى جىلى استاناعا ساپارمەن كەلۋدى جوسپارلاپ وتىرعانىن جەتكىزدى.
