راتان ناۆال تاتا 1937 جىلى مۋمباي قالاسىندا دۇنيەگە كەلگەن. ول تالاي جىل «Tata Group» كومپانياسىن باسقاردى. كاسىپكەردىڭ جاقىن دوسى سۋحەل سەتتىڭ ايتۋىنشا, ول اسپاز بەن كۇتۋشىگە ءاردايىم قۇرمەتپەن قاراپ, ءجيى قوناققا شاقىراتىن بولعان. 2018 جىلى ناۋقاس ءيتىنىڭ قاسىندا قالىپ, بۋكينگەم سارايىنا بارۋدان باس تارتىپتى. بۇل ارەكەت سول كەزدەگى حانزادا چارلزعا ەرەكشە اسەر ەتىپ, كاسىپكەردى «ناعىز ادام» دەپ اتاعان ەدى.
كۇزەتشى روبوت
بۇدان بىلاي قىتايدىڭ «كۋانجاي اللەياسىن» روبوتتار باقىلايدى.
ءتورت اياقتى قۇلتەمىر «لينگتونگ» دەپ اتالادى. قازاقشا – «دانا كوز». اتىنان اڭعارعانىمىزداي, بۇل روبوت قىلت ەتكەندى قالت جىبەرمەيدى. جىلت ەتكەندى ءجىتى باقىلايدى. نەگىزگى مىندەتى – تۇنگى قاۋىپسىزدىكتى قاداعالاپ, قوعامدىق ءتارتىپتى قامتاماسىز ەتۋ ءارى ءورتتىڭ الدىن الۋ. چەندۋ قالاسى 2026 جىلعا قاراي كۇندەلىكتى ومىردە قولدانۋعا بولاتىن وسىنداي روبوتتىڭ كەم دەگەندە 100 ءتۇرىن شىعارماقشى.
ۇشاتىن كولىك
قىتايدىڭ وڭتۇستىگىندەگى گۋانچجوۋ قالاسىندا ۇشاتىن اۆتوكولىك زاۋىتى سالىنىپ جاتىر.
قاناتى بار كولىكتەر جەكە قولدانىستان بولەك, قوعامدىق قىزمەت كورسەتىپ, اپاتتى جاعدايدا قۇتقارۋ جانە تۋريزم كەزىندە ەكسكۋرسيا جاساۋعا پايدالانۋعا بولاتىنداي ەتىپ جاسالماقشى. سونىمەن قاتار ءىرى مەگاپوليستەردەگى كولىك كەپتەلىسى مەن قالاارالىق قوزعالىستاعى ماسەلەلەردى شەشۋگە مۇمكىندىك بەرەدى. ۇشاتىن كولىكتەرگە جىلدىڭ اياعىنا قاراي الدىن الا تاپسىرىس قابىلداۋ باستالادى. كومپانيا جاريالاعان مالىمەتكە سايكەس, باستاپقى باعاسى 280 مىڭ اقش دوللارى دەپ باعالانعان.
