سۋرەت: massaget.kz
ءباسپاسوز جيىنىندا ءسوز العان وقۋ-اعارتۋ مينيسترلىگى مەكتەپكە دەيىنگى ءبىلىم دەپارتامەنتىنىڭ ديرەكتورى مانار اداموۆا 2027 جىلعا دەيىن 300 مىڭعا جۋىق جاڭا ورىن اشۋ جوسپارلانعانىن جەتكىزدى.
«2 جاستان 6 جاسقا دەيىنگى بالالاردى مەكتەپكە دەيىنگى تاربيە جانە وقىتۋمەن قامتۋدى ۇلعايتۋ ماقساتىندا مينيسترلىك مەكتەپكە دەيىنگى ۇيىمدار جەلىسىن كوبەيتۋ جونىندە بىرقاتار شارا قابىلدادى. جەرگىلىكتى اتقارۋشى ورگاندار مينيسترلىكپەن كەلىسە وتىرىپ جاڭا مەكتەپكە دەيىنگى ۇيىمدار (مدۇ) جانە جاڭا ورىنداردى ەنگىزۋدىڭ قادامدىق جوسپارلارىن بەكىتتى. سوعان سايكەس 2023 جىلدان 2027 جىلعا دەيىن 300 مىڭعا جۋىق جاڭا ورىن اشۋ جوسپارلانعان. جىل باسىنان بەرى 35,7 مىڭ جاڭا ورىن اشىلدى. جاڭا ورىنداردى اشۋ جۇمىس ىستەپ تۇرعان مەكتەپكە دەيىنگى ۇيىمداردى قايتا قۇرىلىمداۋ, جاڭادان سالۋ, شاعىن ورتالىقتار جەلىسىن كەڭەيتۋ, سونداي-اق جەكەمەنشىك مەكتەپكە دەيىنگى ۇيىمداردا مەملەكەتتىك ءبىلىم بەرۋ تاپسىرىسىن ورنالاستىرۋ ەسەبىنەن جۇزەگە اسىرىلىپ جاتىر. بۇگىندە بالالاردى قامتۋدىڭ ەڭ جوعارى كورسەتكىشىنە پاۆلودار وبلىسى قول جەتكىزىپ وتىر», دەدى سپيكەر.
م.اداموۆانىڭ ايتۋىنشا, بيىل مەكتەپ جاسىنا دەيىنگى بالانىڭ جەكە دامۋ كارتاسى تسيفرلى فورماتقا كوشىرىلدى. بۇل بالالار داعدىلارىنىڭ دامۋى مەن قالىپتاسۋىن باقىلاۋعا مۇمكىندىك بەرەدى. كارتادا دامۋدىڭ بارلىق ماڭىزدى اسپەكتىلەرى كورسەتىلگەن: تيپتىك وقۋ باعدارلاماسىن يگەرۋ بارىسىندا قالىپتاساتىن فيزيكالىق جاعداي, كوممۋنيكاتيۆتى, تانىمدىق, ينتەللەكتۋالدى, شىعارماشىلىق, زەرتتەۋ جانە الەۋمەتتىك-ەموتسيونالدى داعدىلار. مۇنداي جۇيەلى ءتاسىل ساپالى ءبىلىمدى قامتاماسىز ەتەدى جانە بالالاردىڭ باستاۋىش مەكتەپتە تابىستى بەيىمدەلۋىنە ىقپال ەتەدى.
«بەسكە دەيىن ۇلگەرۋ» ءموبيلدى قوسىمشاسىمەن اتا-انالاردىڭ ەرتە جاستاعى بالالاردى دامىتۋ, سونداي-اق پراكتيكالىق ءبىلىمىن ارتتىرۋ بويىنشا 300 مىڭنان اسا اتا-انانى قامتۋ جوسپارلانىپ وتىر. «بەسكە دەيىن ۇلگەرۋ» ءموبيلدى قوسىمشاسى تولىعىمەن تەگىن ءارى مەسسەندجەرلەر, اتا-انالارعا ارنالعان كەڭەس بەرۋ پۋنكتتەرى, باسقا دا قولجەتىمدى تاسىلدەر ارقىلى تاراتىلادى. ناتيجەسىندە, اتا-انالار مەكتەپ جاسىنا دەيىنگى بالالاردى تاربيەلەۋ, دامىتۋ, ولارمەن ءوزارا ارەكەتتەسۋ ماسەلەلەرى بويىنشا ادىستەمەلىك جانە پسيحولوگيالىق سۇيەمەلدەۋ الادى. بيىل جازعى كەزەڭدە 115 مىڭ مەكتەپكە دەيىنگى جاستاعى بالالار 5,1 مىڭ پەداگوگتىڭ قاتىسۋىمەن 2900 مەكتەپ بازاسىندا «بالاقايلار مەكتەبى» قىسقامەرزىمدى كۋرسىمەن قامتىلدى. سينحرونداۋ جانە مەكتەپكە دەيىنگى ۇيىمدار مەن مەكتەپ اراسىنداعى ساباقتاستىقتى قامتاماسىز ەتۋ شەڭبەرىندە بالانىڭ جەكە دامۋ كارتاسى تسيفرلاندىرىلدى, بۇدان ءارى 1-سىنىپ مۇعالىمدەرىنە بەرىلەدى. بۇل ءبىزدىڭ تاربيەشىلەرگە ءار بالانىڭ دامۋىنىڭ ودان ءارى جەكە تراەكتورياسىن دۇرىس قۇرۋعا كومەكتەسەدى», دەدى م.اداموۆا.
سپيكەردىڭ سوزىنە سۇيەنسەك, مەكتەپكە دەيىنگى تاربيە جانە وقىتۋ ماماندىعى بويىنشا كادرلار دايارلاۋ 119 كوللەدجدە (ونىڭ ىشىندە 37-ءسى – مەملەكەتتىك), مەكتەپكە دەيىنگى تاربيە مەن وقىتۋ پەداگوگيكاسى باعىتى بويىنشا 39 جوو-دا جۇزەگە اسىرىلادى. بيىل وسى باعىت بويىنشا 1268 گرانت ءبولىندى. مينيسترلىك عىلىم جانە جوعارى ءبىلىم مينيسترلىگىمەن بىرلەسىپ «بولاشاق» حالىقارالىق ستيپەندياسىنىڭ باسىم باعىتتارىنىڭ تىزبەسىنە بالالاردى ەرتە دامىتۋ سالاسىنىڭ ماماندىعىن ەنگىزۋ ماسەلەسى پىسىقتالىپ جاتىر.
