سۋرەتتى تۇسىرگەن – ەرلان ومار, «EQ»
ساراپشى مۇرات تەمىرحانوۆتىڭ ايتۋىنشا, ۇلتتىق بانك زەينەتاقى قورىنان دوللار ساتىپ الۋدى توقتاتۋدىڭ ورنىنا, تەڭگەنى جوعارى باعامەن ساتىلىمعا شىعارعان. بۇل بجزق ينۆەستورلارىنىڭ مۇددەسىنە قايشى كەلەدى.
«ۇلتتىق بانكتىڭ باعامدىق ساياساتى دەر كەزىندە جاۋاپ بەرسە, تەڭگە وسىنشالىقتى السىرەمەس ەدى. بۇل حالىق پەن بيزنەستىڭ دەۆالۆاتسيالىق كۇتۋىنە كەرى اسەرىن تيگىزەدى. ءوز كەزەگىندە ۇلتتىق ۆاليۋتاعا دەگەن سەنىمسىزدىك ۇلعايىپ, تەڭگەنىڭ السىرەۋىنە اكەلەدى. باس بانك نارىقتا تەڭگەنىڭ كۇرت السىرەۋ سەبەبىن تۇسىندىرمەي وتىر. تەڭگەنىڭ نارىقتاعى وتىمدىلىگى تومەن, قاتىسۋشىلار سانى از, ەلىمىزدىڭ بيرجاسىندا ۆاليۋتاعا سۇرانىس پەن ۇسىنىس اراسىندا ءىرى تەڭگەرىمسىزدىك ورىن الىپ وتىر. بۇل نارىقتاعى تەڭگە باعامىنىڭ جوعارى قۇبىلمالىلىعىن تۋدىرادى. مۇنداي جاعدايدا ۇلتتىق بانك تەڭگەنى باسقارۋداعى وزگەرمەلى ءتارتىپتى قولدانىپ جاتقانىن رەسمي تۇردە مويىنداۋى كەرەك», دەپ ەسەپتەيدى تەمىرحانوۆ.
ەكونوميست عالىمجان ايتقازيننىڭ ايتۋىنشا, تەڭگەنىڭ قازىرگى جاعدايى ەلىمىزدىڭ ىشكى ەكونوميكالىق ماسەلەسىنىڭ كورىنىسى.
«گەوساياسي جاعدايلار, مۇناي باعاسىنىڭ قۇلدىراۋى نەمەسە 2020-2022 جىلدار ارالىعىندا بولعان پاندەميا سەكىلدى سىرتقى كۇيزەلىس بولعان جوق. ىشكى فاكتورلار رەتىندە بيۋدجەت كىرىسىنىڭ السىرەۋىن, ءبىرىنشى جارتىجىلدىقتا ۇكىمەت ۇلتتىق قوردان رەسپۋبليكالىق بيۋدجەتكە اۋدارعان ترانسفەرتىن ايتۋعا بولادى. ولاردىڭ كونۆەرسياسى ۇلتتىق بانكتىڭ KASE بيرجاسىندا ايىرباس باعامىنا قىسىم جاساپ, ونىڭ كۇشەيۋىنە اكەلگەن. بيۋدجەت كىرىسىن تولىقتىرۋ جانە ۇلتتىق قورداعى مۇناي دوللارلارىن ءتيىمدى باعامعا ايىرباستاۋ ءۇشىن بىزگە تەڭگەنىڭ قۇنسىزدانعانى قاجەت. وسى جىلدىڭ ترانسفەرتتەرى تاۋسىلدى. بىزدەگى بيۋدجەت كىرىسىندە كۇردەلى ماسەلە جەتەرلىك. ولاردىڭ ورنىن جابۋدا بارلىق قۇرالدى, سونىڭ ىشىندە ۆاليۋتا باعامىن السىرەتۋدى دە پايدالانعان», دەيدى ايتقازين.
