العاشىندا جەرگىلىكتى جۇرتتىڭ كۇزگى مەرەكەسى رەتىندە باستالعان فەستيۆال قازىر حالىقارالىق دەڭگەيگە ۇلاستى. ءبىر قىزىعى, اسقاباقتىڭ سالماعى قانشالىقتى اۋىر بولسا, جەڭىمپازدىڭ جۇلدەسى دە سونشالىقتى قوماقتى بولماق. بيىلعى باس بايگەنىڭ يەگەرى – ميننەسوتا شتاتىنان كەلگەن ترەۆيس گينگەر. ونىڭ كوكونىسى 1 121 كگ بولعان.
دروندار شەرۋى
قىتايدا «اسپان قالاسى» اتتى دروندار شوۋى گيننەسس رەكوردتار كىتابىنا ەندى. سەبەبى بۇل كەزدە 7 600 ۇشۋ اپپاراتى ءبىر ۋاقىتتا كوككە كوتەرىلگەن.
بۇل – راسىندا باس شايقاپ, تاڭداي قاعارلىق عالامات ونەر. قۇرىلعىلار تۇنگى اسپاندا ۇلى قىتاي قورعانى, ايداھار, جولبارىس سەكىلدى ءتۇرلى پىشىندەردى بەينەلەگەن. رەكورد ورناتۋ ءۇشىن دروندار ولاردى كەمى 20 سەكۋند ۇستاپ تۇرۋ كەرەك بولعان. بىراق جولبارىستىڭ اسپانداعى بەينەسى 37 سەكۋندقا دەيىن مىزعىماي تۇردى. ەڭ قىزىعى, شوۋ كەزىندە مىڭداعان اپپاراتتىڭ بارلىعى ءبىر عانا نوۋتبۋكتەن باسقارىلعان.
ەڭ كارى لاۋرەات
دجون گۋدەناف 2019 جىلى حيميا سالاسىنداعى نوبەل سىيلىعىن العان كەزدە 97 جاستا بولعان.
عالىمعا بۇل ماراپات ليتي-يوندى باتارەيالاردى ويلاپ تاپقانى ءۇشىن بەرىلدى. ونىڭ ەڭبەگى قازىرگى زاماناۋي تەحنولوگيالاردىڭ نەگىزىن قالادى. ويتكەنى سمارتفونداردان باستاپ ەلەكتروموبيلدەرگە دەيىن كوپتەگەن قۇرىلعى وسى باتارەيالارعا تاۋەلدى. وسىلايشا, دجون گۋدەناف ءجۇز جاسقا تاياعان شاعىندا دۇنيەنى ءدۇر سىلكىندىرگەن جاڭالىق اشىپ, عىلىم جولىندا تاباندى جاننىڭ عانا جەڭىسكە جەتەتىنىن دالەلدەدى.
