استانا قالاسىنىڭ مەملەكەتتىك ءارحيۆى ۇيىمداستىرۋىمەن قازاقتىڭ كورنەكتى اقىنى, جازۋشى, مەملەكەتتىك قايراتكەرى, قازاق اكسر حالىق كوميسسارلارى كەڭەسىنىڭ العاشقى توراعاسى ساكەن سەيفۋلليننىڭ تۋعانىنا 130 جىل تولۋىنا ارنالعان «قازاق ادەبيەتىنىڭ اقسۇنقارى» اتتى دوڭگەلەك ۇستەل ءوتتى.
ءىس-شارادا العاشقى بولىپ ءسوز العان س.سەيفۋللين مۋزەيىنىڭ ديرەكتورى, بەلگىلى عالىم مارات ابسەمەتوۆ جيىننىڭ ماڭىزدىلىعىنا توقتالدى.
– بۇگىن ەرەكشە كۇن, ساكەن بابامىزدىڭ ون قۇجاتىن مەملەكەتتىك ارحيۆكە تاپسىرعالى وتىرمىز. سان قىرلى تۇلعا جونىندە جۇزدەگەن قۇجات بار, بۇگىن سولاردىڭ العاشقى لەگىن اكەلدىك. اقمولا ءوڭىرى ساكەننىڭ كوپ ءومىرى وتكەن جەر, وسىندا ول جاس كۇنىندە قازاق-ورىس تىلىندە ءبىلىم الدى, اساۋداي القىنعان جىلدارىن وتكىزدى. بۇگىن ساكەننىڭ سيرەك قۇجاتتارىمەن بىرگە ءبىزدىڭ مۋزەي شىعارعان ون تومدىعىن ۇسىنىپ وتىرمىز. ونىنشى توم تۇرىك تىلىندە, تۇركيانىڭ ەگەي ۋنيۆەرسيتەتى اقىننىڭ «اساۋ تۇلپارىن» زەرتتەپ, ونى قىزمەتكەرىمىز الۋا توقتارباەۆا مونوگرافيا قىلىپ جازىپ شىقتى. مىنە, وسى قۇندى جادىگەرلەردى سىزدەرگە قۇرمەتپەن ۇسىنامىز,–دەدى ول.
س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ تاريح كافەدراسىنىڭ مەڭگەرۋشىسى اينۇر الياكباروۆا مەرەيتوي قارساڭىندا جاڭا كىتاپ ازىرلەپ وتىرعاندارىن جەتكىزدى.
– بيىل ساكەن اتامىزدىڭ 130 جىلدىعىنا ءبىزدىڭ ۋنيۆەرسيتەتتە جىل بويى كوپتەگەن ءىس-شارا بولىپ ءوتتى. جاستارعا اقىننىڭ ەسىمىن تانىتۋ ماقساتىندا ۋنيۆەرسيتەتتەر اراسىندا ينتەللەكتۋالدىق ويىندار وتكىزىپ, جاس جەتكىنشەكتەردىڭ تۇلعاتانۋداعى اياق الىسىنا قۋاندىق. وسى ارقىلى ۇرپاقتى ۇلتقا قىزمەت ەتۋگە, زيالىلىققا تاربيەلەۋگە ۇندەپ وتىرمىز. بيىل مەرەيتوي قارساڭىندا ءۇش تىلدە «ساكەن جولى» اتتى كىتاپتى ازىرلەدىك. كىتاپقا ءارحيۆتىڭ ءھام مۇراجايدىڭ كوپ ەڭبەكتەرىن قولداندىق, الداعى ۋاقىتتا كوپشىلىككە كەڭىنەن تانىستىرامىز, – دەدى اينۇر پەرنەبەكقىزى.
اتالعان ءىس-شارا بارىسىندا ساكەن سەيفۋللين حاقىندا دەرەكتى فيلم كورسەتىلىپ, اقىننىڭ شىعارماشىلىق, قايراتكەرلىك قىرلارى كورىنىس تاپتى. استانا قالاسى مەملەكەتتىك ءارحيۆىنىڭ ديرەكتورى جانگەلدى بيمولدين تاريحي تۇلعا تۋرالى دەرەكتەردى جۇيەلەۋ جانە قولجەتىمدىلىگىن ارتتىرۋ ماقساتىندا ساكەن سەيفۋللينگە قاتىستى قۇجاتتاردى قابىلداۋعا دايىن ەكەنىن جەتكىزدى.
