مۇنداي ويعا ياكي بولجامعا كەلۋىمىزگە عىلىم جانە جوعارى ءبىلىم ءمينيسترى ساياسات نۇربەكتىڭ يتاليا رەسپۋبليكاسى ۋنيۆەرسيتەتتەر جانە زەرتتەۋلەر ءمينيسترى اننا ماريا بەرنينيمەن كەزدەسۋى سەبەپ بولعان-دى. مينيسترلىكتىڭ تاراتقان اقپاراتىنا سۇيەنسەك, كەزدەسۋدە ەكى ەلدىڭ جوعارى ءبىلىم مەن عىلىمي زەرتتەۋلەر سالاسىنداعى ىنتىماقتاستىقتىڭ باستى باعىتتارى تالقىلاندى. تاراپتار ستۋدەنتتەر مەن وقىتۋشىلار الماسۋ باعدارلامالارىن, سونداي-اق بىرلەسكەن زەرتتەۋ جوبالارىن ىسكە اسىرۋ كەلەشەگىن تالقىلادى. ەكىجاقتى ىنتىماقتاستىقتىڭ ماڭىزدىلىعى دا ءسوز بولدى. سونىمەن قاتار ورتاق زەرتتەۋلەردى ءوزارا قىزىعۋشىلىق تۋدىراتىن سالالاردا بىرلەسىپ قارجىلاندىرۋعا كەلىستى.
وتكەن جىلى ريمدە قول قويىلعان ءوزارا تۇسىنىستىك تۋرالى مەموراندۋمدى دامىتۋ ماقساتىندا باسىم باعىتتاردى انىقتايتىن, جاڭا ۇسىنىستار ازىرلەيتىن بىرلەسكەن باسقارۋ كوميتەتى قۇرىلاتىن بولدى. سونداي-اق ۋنيۆەرسيتەتتەر اراسىنداعى كەلىسىم وتاندىق جانە يتاليالىق ستۋدەنتتەرگە ارنالعان قوس ديپلوم باعدارلاماسىن ىسكە اسىرۋدى قاراستىرادى. جۇزدەسۋدەگى نەگىزگى ناتيجەلەردىڭ ءبىرى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ بازاسىندا ماركە پوليتەحنيكالىق ۋنيۆەرسيتەتىنىڭ فيليالىن اشۋ تۋرالى كەلىسىمگە قول قويۋ بولدى.
مينيستر ساياسات نۇربەك قازاقستان مەن يتاليانىڭ ءبىلىم بەرۋ ۇيىمدارى اراسىنداعى ىنتىماقتاستىقتىڭ ماڭىزىن اتاپ, جەتىسۋ ۋنيۆەرسيتەتىنىڭ عىلىمي زەرتتەۋ قىزمەتىن دامىتۋداعى ۇلەسىنە توقتالدى. «جەتىسۋ ۋنيۆەرسيتەتى زەرتتەۋ قىزمەتىن بەلسەندى دامىتىپ جاتىر. وقۋ ورنىنىڭ ماركە پوليتەحنيكالىق ۋنيۆەرسيتەتى سەكىلدى جەتەكشى شەتەلدىك ۋنيۆەرسيتەتتەرمەن تىعىز بايلانىس ورناتۋى ءوڭىردى بىلىكتى تەحنيكالىق ماماندارمەن قامتاماسىز ەتۋدىڭ نەگىزگى فاكتورىنا اينالادى. پرەزيدەنت قاسىم-جومارت توقاەۆ ەلىمىزدەگى ماماندار تاپشىلىعى ماسەلەسىن بىرنەشە رەت اتاپ ءوتتى. حالىقارالىق سەرىكتەستەرمەن ىنتىماقتاستىق تاجىريبە الماسۋعا, وقىتۋشىلار قۇرامىنىڭ بىلىكتىلىگىن ارتتىرۋعا, ءبىلىم ساپاسىن جاقسارتۋعا مۇمكىندىك بەرەدى», دەدى ساياسات نۇربەك.
وسى رەتتە يتاليا رەسپۋبليكاسىنىڭ ۋنيۆەرسيتەتتەر جانە زەرتتەۋلەر ءمينيسترى اننا ماريا بەرنيني: «ورتالىق ازيا – تۇراقتى جانە قاۋىپسىز ايماق ءارى ماڭىزدى گەوساياسي ورتالىق. بۇل ءوڭىر جوعارى ءبىلىم سالاسىندا عانا ەمەس, ەكونوميكالىق, كوممەرتسيالىق تۇرعىدان دا ۇلكەن مۇمكىندىك ۇسىنادى, سوندىقتان يتاليا ءۇشىن ستراتەگيالىق ماڭىزعا يە», دەدى. ونىڭ ويىنشا, ەلىمىزدىڭ ادامي كاپيتالدى دامىتۋداعى ساياساتى, ۋنيۆەرسيتەتارالىق ىنتىماقتاستىقتاعى بەلسەندىلىگى – ايرىقشا. يتاليا ۋنيۆەرسيتەتتەرى جىل سايىن قازاقستاننان جۇزدەگەن ستۋدەنتتى قابىلدايدى, ال بىرلەسكەن قارجىلاندىرۋمەن ىسكە اسىرىلاتىن عىلىمي جوبالار ەكىجاقتى ديالوگتىڭ ماڭىزدى ەلەمەنتى بولماق.
كەزدەسۋ سوڭىندا ساياسات نۇربەك پەن اننا ماريا بەرنيني ىنتىماقتاستىقتىڭ تابىستى داميتىنىنا سەنىم ءبىلدىرىپ, جوعارى ءبىلىم سالاسىنداعى ينتەگراتسيا جانە تاجىريبە الماسۋ جولدارىن جالعاستىرۋعا كەلىستى.
