قازاق بالالار ادەبيەتىنىڭ كلاسسيگى بەردىبەك سوقپاقباەۆتىڭ 100 جىلدىق مەرەيتويى قارساڭىندا باكۋدە «مەنىڭ اتىم قوجا» كىتابىنىڭ تۇساۋكەسەر ءراسىمى ءوتتى. تۇركى مادەنيەتى مەن مۇراسى قورىنىڭ قاتىسۋىمەن وتكەن شارا X باكۋ كىتاپ جارمەڭكەسى اياسىندا ۇيىمداستىرىلىپ وتىر. ءىس-شاراعا ارنايى قاتىسقان پرەزيدەنت كەڭەسشىسى مالىك وتارباەۆ روماننىڭ ەكى ەل ءۇشىن دە ماڭىزدى ەكەنىن جەتكىزدى.
«بيىل قازاقتىڭ بەلگىلى قالامگەرى بەردىبەك سوقپاقباەۆتىڭ تۋعانىنا 100 جىل تولىپ وتىر. مەرەيتوي يۋنەسكو كولەمىندە اتالىپ وتىلەتىن بولىپ, ارنايى كەشەندى ءىس-شارالار باعدارلاماسى ازىرلەندى. X باكۋ كىتاپ جارمەڭكەسى قارساڭىندا «مەنىڭ اتىم قوجا» رومانى تۇڭعىش رەت ازەربايجان تىلىندە جارىق كورىپ وتىر. سوقپاقباەۆ شىعارمالارى ءوسىپ كەلە جاتقان جەتكىنشەكتەردىڭ اقىل-ويىن جەتىلدىرۋدە, ەكى ەلدىڭ قارىم-قاتىناسىن نىعايتۋدا باستى ءرول اتقارادى», دەدى ول.
تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا روماننىڭ 68 تىلگە اۋدارىلعانىن, ءوتىپ وتىرعان ەلەۋلى ءىس-شارا تۇركى الەمىنىڭ باي مۇراسىن ساقتاۋ مەن بولاشاق ۇرپاققا تابىستاۋعا باعىتتالعانىن تىلگە تيەك ەتتى.
جازۋشىنىڭ قىزى سامال سوقپاقباەۆا جينالعان كوپشىلىككە ريزاشىلىعىن ءبىلدىرىپ, مەملەكەت باسشىسىنا العىس ايتتى.
«اكەم بەردىبەك سوقپاقباەۆتىڭ مەرەيتويىن تەك ەلىمىزدە عانا ەمەس, وزگە دە مەملەكەتتەردە كەڭىنەن اتاپ ءوتۋ تۋرالى باستاماسى ءۇشىن پرەزيدەنتىمىز قاسىم-جومارت توقاەۆقا العىسىمدى بىلدىرەمىن. ازەربايجان تاراپىنا قوس حالىقتىڭ بىرلىگىن نىعايتاتىن ءىس-شارا ۇيىمداستىرعانى ءۇشىن ەرەكشە العىس ايتامىن», دەدى ول.
تۇساۋكەسەر راسىمىنە كەلۋشىلەر قالامگەردىڭ جەكە زاتتارىمەن, سونداي-اق ىدىس-اياقتارى جانە اكسەسسۋارلارىمەن تانىستى. مۇنان سوڭ ازەربايجان تەاترىنىڭ ارتىستەرى «مەنىڭ اتىم قوجا» رومانىنان ۇزىندىلەر وقىپ, كورەرمەندى ءتانتى ەتتى.
