ىنتىماقتاستىق جالعاسادى

قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ استاناعا رەسمي ساپارمەن كەلگەن قىرعىز رەسپۋبليكاسى جوگوركۋ كەنەشىنىڭ توراعاسى اسىلبەك جەەنبەكوۆپەن كەزدەستى, دەپ حابارلادى پالاتانىڭ ءباسپاسوز قىزمەتى. «مەملەكەت باسشىلارى نۇرسۇلتان نازارباەۆ پەن المازبەك اتامباەۆ جۇيەلى تۇردە كەزدەسىپ وتىرادى, ەكى ەل ۇكىمەتتەرى مەن پارلامەنتتەرى الدىنا باۋىرلاستىق بايلانىستار مەن ءوزارا ءتيىمدى ىنتىماقتاستىقتى نىعايتۋعا ارنالعان اۋقىمدى مەجەلەر قويىپ كەلەدى», – دەدى ق.توقاەۆ كەزدەسۋ بارىسىندا. سەنات توراعاسى قازاقستان مەن قىرعىزستاننىڭ جوعارى زاڭ شىعارۋشى ورگاندارى اراسىنداعى ىنتىماقتاستىق جونىندەگى پارلامەنتارالىق كەڭەس تۋرالى كەلىسىمنىڭ جاسالۋىن, سونداي-اق, ول كەڭەستىڭ العاشقى وتىرىسىنىڭ استانادا وتكىزىلۋىن ىقىلاسپەن اتاپ ءوتتى. ق.توقاەۆ قىرعىزستاننىڭ ەۋرازيالىق ەكونوميكالىق وداققا كىرۋى جونىندەگى حاتتاماعا قول قويىلۋىمەن جانە بۇل قۇجاتتىڭ قىرعىز پارلامەنتىندە راتيفيكاتسيالانۋىمەن ارىپتەسىن قۇتتىقتادى. ول, سونداي-اق, ەقىۇ پارلامەنتتىك اسسامبلەياسى, تمد پاا جانە ۇقشۇ پا اياسىندا ەكى ەل پارلامەنتشىلەرىنىڭ جەمىستى ىنتىماقتاستىعىن جالعاستىرۋ جايىندا ايتتى. «قازاقستانمەن وداقتاستىق جانە تاتۋ كورشىلەستىك قاتىناستاردى دامىتۋ قىرعىز رەسپۋبليكاسى ءۇشىن داۋسىز باسىمدىق بولىپ تابىلادى», دەپ اتاپ ءوتتى ءوز كەزەگىندە ا.جەەنبەكوۆ. ول قازاقستاندى دۇنيەجۇزىلىك ساۋدا ۇيىمىنا كىرۋ جونىندەگى كەلىسسوزدەردىڭ اياقتالۋىمەن, سونداي-اق, الەمدىك جانە ءداستۇرلى دىندەر ليدەرلەرىنىڭ سەزىن تابىستى وتكىزۋىمەن قۇتتىقتادى. مەيماننىڭ پىكىرىنشە, پرەزيدەنت ن.نازارباەۆتىڭ حالىقارالىق باستامالارىنىڭ ارقاسىندا قازاقستان ەلدىڭ ىشىندەگى عانا ەمەس, كۇللى الەمدەگى تۇراقتىلىققا جاردەمدەسىپ كەلەدى. ول, سونداي-اق, ەكسپو-2017 كورمەسى بۇكىل ايماقتىڭ تەحنولوگيالىق دامۋىنا كۇشتى سەرپىن بەرەتىنىنە سەنىم ءبىلدىردى. سول كۇنى ق.توقاەۆ سينگاپۋردىڭ لي كۋان يۋ اتىنداعى مەملەكەتتىك ساياسات مەكتەبىنىڭ دەكانى, پروفەسسور كيشور ماحبۋبانيمەن كەزدەستى. لي كۋان يۋ مەكتەبى نازارباەۆ ۋنيۆەرسيتەتتەگى جوعارى مەملەكەتتىك ساياسات مەكتەبىمەن ستراتەگيالىق ارىپتەس بولىپ تابىلادى. نازارباەۆ ۋنيۆەرسيتەتتىڭ تۇلەكتەرى بيىل العاش رەت قانات قاعىپ وتىر.