شىمكەنت قالاسى ادىلەت دەپارتامەنتىنىڭ قۇقىقتىق ءتۇسىندىرۋ جۇمىسى جانە زاڭگەرلىك قىزمەت كورسەتۋ ءبولىمىنىڭ باس مامانى سامال باحتىياردىڭ ايتۋىنشا, «قۇقىق كابينەتى» – كەز كەلگەن ازاماتتىڭ سۇراعىنا ءتيىستى جاۋاپ پەن قاجەتتى كەڭەس الۋىنا مۇمكىندىك بەرەتىن اشىق الاڭ. مۇندا كەلۋشىلەر زاڭگەرلىك كەڭەس الىپ قانا قويماي, زاماناۋي تسيفرلىق قىزمەتتى دە پايدالانا الادى. اتاپ ايتقاندا, كابينەتتە «ادىلەت» جانە «زاڭ» قۇقىقتىق دەرەكقورلارىنا قولجەتىمدىلىك قامتاماسىز ەتىلگەن. بۇل جۇيەلەر ارقىلى ازاماتتار قولدانىستاعى نورماتيۆتىك-قۇقىقتىق اكتىلەرمەن تانىسىپ, ءوز قۇقىقتارى مەن مىندەتتەرى تۋرالى ناقتى اقپارات الا الادى.
«سونىمەن قاتار «قۇقىق كابينەتىندە» eGov, e-Otinish, «اشىق نقا» سياقتى مەملەكەتتىك اقپاراتتىق جۇيەلەرمەن جۇمىس ىستەۋگە مۇمكىندىك بار. بۇل ازاماتتارعا مەملەكەتتىك ورگاندارعا ونلاين ءوتىنىش جولداۋعا, ءتۇرلى قىزمەتتى ەلەكتروندى تۇردە الۋعا جاعداي جاسايدى. اسىرەسە ۋاقىت ۇنەمدەۋ مەن راسىمدەردى جەڭىلدەتۋ تۇرعىسىنان مۇنداي قىزمەتتەردىڭ ماڭىزى زور. اتالعان كابينەتتە كورسەتىلەتىن قىزمەتتىڭ باس-تى ارتىقشىلىعى – ولاردىڭ تەگىن ءارى بارشاعا قولجەتىمدى بولۋى. كەز كەلگەن تۇرعىن ارنايى دايىندىقسىز-اق كەلىپ, قاجەتتى قۇقىقتىق اقپاراتتى تۇسىنىكتى ءارى ىڭعايلى تۇردە الا الادى. بۇل اسىرەسە قۇقىقتىق ءبىلىم دەڭگەيى ءارتۇرلى ازاماتتار ءۇشىن ماڭىزدى», دەدى س.باحتىيار.
بۇگىندە شىمكەنت قالاسىنىڭ بىرنەشە اۋدانىندا «قۇقىق كابينەتى» جۇمىس ىستەيدى. ولار اباي, ءال-فارابي, قاراتاۋ, تۇران اۋداندارى اكىمىنىڭ اپپاراتى جانىنان اشىلعان. بۇل كەڭسە جەلىسى قالا تۇرعىندارىنىڭ ارقايسىسىنا جاقىن ورنالاسىپ, قۇقىقتىق قىزمەتتەردى قولجەتىمدى ەتەدى.
ماماننىڭ ايتۋىنشا, وسى كۇندە قاراتاۋ اۋدانى اكىمدىگىنىڭ اپپاراتىنداعى «قۇقىق كابينەتى» بەلسەندى جۇمىسقا كىرىسكەن. مۇندا ازاماتتار قۇقىقتىق كەڭەس الىپ قانا قويماي, ەلەكتروندى جۇيەلەر ارقىلى ءتۇرلى ءوتىنىشىن جولداپ, قاجەتتى قۇجاتپەن تانىسا الادى. بۇل ءوز كەزەگىندە حالىق پەن مەملەكەتتىك ورگاندار اراسىنداعى بايلانىستى نىعايتىپ, اشىقتىق پەن تيىمدىلىكتى ارتتىرا تۇسەدى.
جالپى العاندا, «قۇقىق كابينەتى» ازاماتتاردىڭ قۇقىقتىق مادەنيەتىن كوتەرۋگە, مەملەكەتتىك قىزمەتتى وڭاي ءارى جىلدام الۋعا مۇمكىندىك بەرەتىن ماڭىزدى جوباعا اينالىپ وتىر. سوندىقتان ماماننىڭ پىكىرىنشە, وسىنداي باستاما ارقىلى قوعامدا زاڭعا دەگەن قۇرمەت ارتىپ, ءاربىر ازامات ءوز قۇقىعىن قورعاي الاتىن قابىلەتكە يە بولادى.
شىمكەنت
