فوتو: اتامەكەن بيزنەس پورتالى
رەسەي تاراپىنىڭ مالىمەتىنشە, تجار – تاۋار جەتكىزىلىمىن الدىن الا راستاۋعا جانە ءوزارا ساۋدانىڭ اشىقتىعىن ارتتىرۋعا, تاۋار اينالىمىنىڭ زاڭدىلىعىن باقىلاۋعا, سونداي-اق جاناما سالىقتاردى اكىمشىلەندىرۋگە باعىتتالعان مەحانيزم.
جۇيە قالاي جۇمىس ىستەيدى؟
تجار اياسىندا رەسەيلىك يمپورتتاۋشى تاۋاردىڭ الداعى جەتكىزىلىمى تۋرالى قۇجاتتى الدىن الا راسىمدەۋى, كەپىلدىك تولەم ەنگىزۋى جانە جەتكىزىلىمنىڭ زاڭدىلىعىن راستايتىن QR-كود الۋى ءتيىس.
قۇجات رەسەي فەدەراتسياسىنىڭ اۋماعىنا تاۋار كىرگىزىلگەنگە دەيىن كەمىندە ەكى كۇن بۇرىن راسىمدەلۋى قاجەت. بارلىق قاجەتتى راسىمدەردەن كەيىن QR-كود قالىپتاستىرىلادى, ونى باقىلاۋشى ورگاندار تەكسەرەدى.
جۇيە كىمگە قاتىستى قولدانىلادى:
- يمپورتتاۋشىلارعا;
- تاسىمالداۋشىلارعا;
- ەكسپەديتورلارعا;
- دەلدالدارعا;
- جۇك تاسىمالىن اۆتوموبيلمەن جۇزەگە اسىراتىن جۇرگىزۋشىلەرگە.
سونىمەن قاتار تجار جەكەلەگەن تاۋار ساناتتارىنا قولدانىلمايدى, ولاردىڭ ىشىندە مۇناي جانە مۇناي ونىمدەرى, ەلەكتر ەنەرگياسى, جەكە پايدالانۋعا ارنالعان تاۋارلار جانە ترانزيتتىك جۇكتەر بار.
بيزنەس نەنى ەسكەرۋى كەرەك؟
قازاقستاندىق ەكسپورتتاۋشىلار مەن سىرتقى ەكونوميكالىق قىزمەتكە قاتىسۋشىلارعا جاڭا تالاپتارمەن الدىن الا تانىسىپ, رەسەي فەدەراتسياسىنا جەتكىزىلىمدەردى جوسپارلاۋ كەزىندە ولاردى ەسكەرۋ ۇسىنىلادى.
اسىرەسە مىنا ماسەلەلەرگە نازار اۋدارۋ قاجەت:
- قۇجاتتاردى ۋاقىتىلى راسىمدەۋگە;
- رەسەيلىك سەرىكتەستەرمەن جانە يمپورتتاۋشىلارمەن ءوزارا ءىس-قيمىلعا;
- جاڭا راسىمدەردى ەسكەرە وتىرىپ لوگيستيكالىق پروتسەستەردى دايىنداۋعا;
- نورماتيۆتىك تالاپتارداعى وزگەرىستەردى تۇراقتى باقىلاۋعا.
سونداي-اق الدىن الا راسىمدەلگەن QR-كودتىڭ بولماۋى شەكارادان ءوتۋ مەرزىمىنە جانە لوگيستيكالىق پروتسەستەرگە اسەر ەتۋى مۇمكىن ەكەنىن ەسكەرۋ ماڭىزدى.
«اتامەكەن» تجار ماسەلەسىن بيزنەس وكىلدەرىمەن تالقىلاپ جاتىر
تجار جۇيەسىن ەنگىزۋ ماسەلەسى «اتامەكەن» ۇكپ الاڭىندا مەملەكەتتىك ورگاندار مەن بيزنەس وكىلدەرىنىڭ قاتىسۋىمەن تالقىلانۋدا.
ۇلتتىق پالاتا جاڭا جۇيەنىڭ بيزنەس-پروتسەستەر مەن ەاەو اياسىنداعى ءوزارا ساۋداعا ىقپالىن زەردەلەۋ جۇمىستارىن جالعاستىرىپ, كاسىپكەرلەر قاۋىمداستىعىنان ۇسىنىستار مەن كەرى بايلانىس قالىپتاستىرىپ جاتىر.
بيزنەس پەن مەملەكەتتىك ورگاندار تجار جۇيەسىن قولدانۋ ءتارتىبىن تالقىلادى
