سۋرەتتەردى تۇسىرگەن – يۋري بەككەر
قانداي تاقىرىپتى نىساناعا السا دا جانىمەن جازاتىن پاۆلودارلىق سۋرەتشى بۇل جولى مىڭبوياۋلى مەگاپوليستىڭ تىنىس-تىرشىلىگىن قىلقالامعا ارقاۋ ەتكەن. «U2 نەمەسە ءال-فارابي داڭعىلىنداعى سەرۋەن» دەپ اتالعان كورمەدە الماتى پەيزاجدارى الما-كەزەك الدىڭنان شىعادى. كەنەپتە الما شاھاردىڭ كۇندەلىكتى بەيمازا تىرشىلىگى بىلاي قالىپ, جانىڭدى شۋاققا بولەيتىن اسەم كورىنىستەر كوز الدىڭنان تىزبەكتەلىپ وتەدى.
كارتينالاردان الاتاۋ باۋىرىنداعى الىپ قالانىڭ ءبىر ساتتىك كۇيىن, ىشكى رۋحىن سەزىنگەندەي بولاسىز. اۆتور الماتىنى جان-تانىمەن تۇسىنەتىن, جۇرەگىمەن قابىلدايتىن سۋرەتكەر رەتىندە بەينەلەيدى. سوندىقتان دا بولار, كارتينالارداعى جارىق پەن كولەڭكە, قوزعالىس پەن تىنىشتىق ۇيلەسىمى كورەرمەندى بەيجاي قالدىرمايدى.
ءفريدليننىڭ جۇمىستارىندا ۋاقىتتىڭ ءوزى باياۋلاي تۇسكەندەي. ءبىر قاراعاندا قاراپايىم كوشە كورىنىسى – تەرەڭ ويعا جەتەلەيدى, ال كۇن ساۋلەسىنە مالىنعان اعاشتار مەن عيماراتتار اراسىنداعى ۇيلەسىم تىرشىلىكتىڭ اسەم ىرعاعىن اڭعارتادى. سۋرەتشى مەگاپوليستىڭ قاربالاسىنان گورى, ونىڭ ادام جانىنا جىلى تيەتىن جۇمساق قىرلارىن كوبىرەك اشۋعا ۇمتىلعان.
كورمەدەگى ءاربىر جۇمىس – ءبىر حيكايا. بىرىندە جاڭبىردان كەيىنگى دىمقىل اسفالتتان شاعىلىسقان شام جارىعى كورىنسە, ەندى بىرىندە كەشكى الماتىنىڭ مامىراجاي تىنىسى سەزىلەدى. قالا كورىنىستەرى ارقىلى سۋرەتشى كورەرمەندى ءوز ەستەلىكتەرىنە جەتەلەيدى, كەنەپ بەتىنەن اركىم ءوز الماتىسىن ىزدەيدى.
«وسىدان شيرەك عاسىر بۇرىن پاۆلودارلىق سۋرەتشىلەردىڭ قولتاڭباسىمەن تانىسۋدىڭ ءساتى ءتۇستى. ولاردىڭ ىشىندە سول كەزدەگى جاس سۋرەتشى ەۆگەني ءفريدليننىڭ مانەرى ەرەكشە نازار اۋدارتتى. ونىڭ كەسكىندەمەسى ءتانتى ەتكەنى سونشا, الماتىدا كورمەسىن ۇيىمداستىردىق. بۇل 2006 جىل بولاتىن. سودان بەرى جيىرما جىل ارتتا قالسا دا ءفريدليننىڭ شىعارماشىلىعى ءوز بيىگىندە. كەيىن وسى شىعارماشىلىق بايلانىس دوستىققا ۇلاستى. بۇل جولعى كورمە ەكسپوزيتسياسىنا الماتى قالاسى مەن ءال-فارابي داڭعىلىنا ارنالعان 40-تان استام تۋىندى قويىلدى. سۋرەتشىنىڭ شالقار شابىتىن قوزعالىس, ۋاقىت جانە قالانىڭ مادەني وزگەرىسىنىڭ ءرامىزى رەتىندە قاراستىرۋىمىزعا بولادى. كورمەدە اۆتوردىڭ بىرەگەي قولتاڭباسىن ۇسىنا وتىرىپ, قالامىزدىڭ دامۋىن, مۇندا پايدا بولعان جاڭا تۋريستىك نىسانداردى دا كورەرمەنمەن تانىستىرعىمىز كەلدى», دەيدى «ۇلار» گالەرەياسىنىڭ ديرەكتورى يۋري ماركوۆيچ.
الماتى
