جول-كولىك وقيعالارىن ازايتۋ ماقساتىندا قۇزىرلى ورگان وكىلدەرى جاقىندا تاعى ءبىر جوبانى جۇزەگە اسىردى. ولار تاراز قالاسىنىڭ كوشەلەرىنە جول اپاتى كەزىندە جارامسىز كۇيگە تۇسكەن كولىكتەر مەن موپەدتەردىڭ قاڭقاسىن ءتىزىپ قويدى. وبلىستىق پوليتسيا دەپارتامەنتىنىڭ باسشىلىعى وسىنداي اۋىر كورىنىس ارقىلى اپات سانىن ازايتۋعا بەل بۋىپ وتىر. پوليتسەيلەر بۇل جوبا الداعى ۋاقىتتا ءوز ناتيجەسىن بەرەتىنىنە سەنىمدى.
«وڭىردە كولىك اپاتىنىڭ سانىن ازايتۋ ماقساتىندا جوسپارعا ساي جۇمىس ىستەپ جاتىرمىز. بيىل ءۇش ايدا وڭىردە 377 جول-كولىك وقيعاسى تىركەلگەنى انىقتالىپ وتىر. سالدارىنان 32 ادام ومىرىمەن قوش ايتىسسا, 564 ادام ءتۇرلى دارەجەدەگى دەنە جاراقاتىن العان. ارينە, اسىعىستىق سالدارىنان ادامداردىڭ جان تاپسىرعانى, دەنە جاراقاتىن العانى ءبارىمىزدى ويلانتادى. قوعامنىڭ باستى قۇندىلىعى ادام ەكەنىن ەشكىم قاپەردەن شىعارماعانى ءجون. قولعا الىنعان ناقتى جۇمىستىڭ ناتيجەسىندە ءۇش ايدا جول-كولىك اپاتىنىڭ سانىن – 0,3, قازا بولعاندار سانىن – 3, زارداپ شەككەن ازاماتتار سانىن 5 پايىزعا تومەندەتتىك. ارينە, الدىن الۋ شارالارى الداعى ۋاقىتتا دا جالعاسادى. بۇل باعىتتاعى جۇمىس جىل بويى تولاستامايدى», دەيدى وبلىستىق پوليتسيا دەپارتامەنتى اكىمشىلىك پوليتسيا باسقارماسى باسشىسىنىڭ ورىنباسارى ەرجان مانانباەۆ.
قالا تۇرعىندارىنىڭ ايتۋىن-شا, پوليتسيا دەپارتامەنتى ىسكە اسىرىپ جاتقان جاڭا باستاما كولىك تىزگىندەگەن ازاماتتارعا وي سالادى. جالپى, وسى باعىتتا قولعا الىنعان ءىس-شارالار ارقىلى جول اپاتىن ازايتۋعا مۇمكىندىك مول. ويتكەنى قۇزىرلى ورگان قىزمەتكەرلەرى شاھار حالقىمەن تىعىز بايلانىستا جۇمىس ىستەپ وتىر.
«كۇرە جولدا تىركەلگەن كەز كەلگەن جول اپاتى جان تۇرشىكتىرەدى. كولىكتەردىڭ قيراعان قاڭقاسىن بىلاي دا كورىپ ءجۇرمىز. ءار ازاماتتىڭ وتباسى, ۇيىندە كۇتىپ وتىرعان بالالارى مەن باۋىرلارى بار ەكەنىن جۇرگىزۋشىلەر ۇمىتپاسا دەگەن تىلەك كوكەيدە اتويلاپ تۇرادى. قالانىڭ ءار تۇرعىنى وسىنى تۇسىنسە يگى. كوشەگە قويىلعان كولىك قاڭقالارى «جامان ايتپاي, جاقسى جوق» دەگەن ءسوزدى ەرىكسىز ەسكە تۇسىرەدى. قالاي الىپ قاراساق تا, كوشەدەگى كورىنىس جۇرگىزۋشىلەردىڭ جاۋاپكەرشىلىگىن ارتتىراتىنىنا سەنىم مول. ەڭ باستىسى, ءاربىر ازامات قوعام الدىنداعى جاۋاپكەرشىلىك جۇگىن سەزىنسە, جول اپاتى دا ازايادى. سوندىقتان دا كولىك جۇرگىزۋشىلەرى بارىنشا جول ەرەجەلەرىن ساقتاعانى دۇرىس», دەيدى قالا تۇرعىنى قايسار قايرات ۇلى.
تاس-تالقانى شىققان كولىكتەر شەرۋى كىمدى دە بولسىن ويلانتپاي قويمايتىنى انىق. ال پوليتسيا قىزمەتكەرلەرى وسىنداي قادامعا بارۋ ارقىلى جولدا جۇرگەن جۇرگىزۋشىلەردىڭ جاۋاپكەرشىلىگىن كۇشەيتەمىز دەگەندى العا تارتىپ وتىر.
اكتسياعا جاس جول ينسپەكتورلارى دا بەلسەندى قاتىستى. مەكتەپ وقۋشىلارى قالا كوشەلەرىنە قاتەلىككە جول بەرمەۋ, قاۋىپسىزدىكتى ساقتاۋ تۋرالى جازىلعان ارنايى اقپاراتتىق باننەرلەردى ۇستاپ شىققان. وسىلايشا, جەتكىنشەكتەر جولداعى بالالار قاۋىپسىزدىگىنە باسا ءمان بەرۋ كەرەكتىگىن بارىنشا تۇسىندىرگىسى كەلدى.
تاراز
