وسىنىڭ ءبىر ۇلگىسىن مەتاللۋرگيا جانە بايىتۋ ينستيتۋتىنىڭ عالىمدارى مەن «KazNewTech» كومپانياسىنىڭ بىرلەسىپ شىعارعان تەرراسا تاقتاسىنان بايقادىق. ول اعاش-پوليمەرلىك كومپوزيتتەن وندىرىلگەن. عىلىم جانە جوعارى ءبىلىم مينيسترلىگىنىڭ تاراتقان اقپاراتىنا سۇيەنسەك, جوبا ەلدىڭ قۇرىلىس نارىعىندا ەلەۋلى ورىن الادى. پاتەنتتەلگەن تەحنولوگيا بويىنشا جاسالاتىن تەرراسا تاقتالارى جەكە تۇرعىن ءۇي, كوممەرتسيالىق, اكىمشىلىك سەكتورلاردى سالۋدا, سونداي-اق ءۇي اۋماقتارىن اباتتاندىرۋدا كەڭىنەن قولدانىلادى. اشىق تەرراسالار, بالكوندار مەن شاتىرلار قۇرىلىسىنا دا پايدالانىلادى.
جوبا جەتەكشىسى, تەحنيكا عىلىمدارىنىڭ كانديداتى ەلنار كەنجاليەۆ تاقتالاردىڭ يننوۆاتسيالىق جاعى, جوعارى ساپادا جاسالۋى, سونىمەن قاتار ەكولوگيالىق تۇرعىدا قاۋىپسىز بولۋى ءونىمنىڭ باستى ارتىقشىلىعى ەكەنىن اتاپ ءوتتى. ء«بىز شيكىزاتقا بىرەگەي رەتسەپتۋرالار جاسايمىز, وسىعان قوسا اعاش-پوليمەرلىك كومپوزيت بۇيىمدارىنىڭ تەڭدەسسىز ساپاسىن الۋعا مۇمكىندىك بەرەتىن شەشىمدەردى ازىرلەيمىز. ءبىزدىڭ وندىرىستە تۇراقتى سيپاتتامالارى, بىرتەكتى قۇرامى, ساپاسى, بەلگىلى ءبىر ديسپەرسيالىعى, ىلعالدىلىعى بار پوليمەرلەر پايدالانىلادى. بۇل ساپا مەن گەومەتريانى ساقتاي وتىرىپ, پارامەترلەر, ەكسترۋزيا جىلدامدىعىنا اسەر ەتەدى. ماتەريالدىڭ بەرىكتىگىن, قاتتىلىعىن, ىلعالعا توزىمدىلىگىن ارتتىرۋ ءۇشىن انتيوكسيدانتتار, ادديتيۆتەر, انتيپيرەندەر جانە بوياعىشتار سياقتى ءارتۇرلى قوسپا قولدانىلادى. مۇنداي پارامەترلەرمەن جۇمىس ىستەۋ وندىرىستەگى اقاۋدى بارىنشا بولدىرمايدى», دەدى ە.كەنجاليەۆ.
عىلىم مەن بيزنەس ىنتىماقتاستىعىنىڭ ناتيجەسىندە دۇنيەگە كەلگەن ءونىمنىڭ ساپاسى قازىرگى تاڭدا ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ عىلىمي زەرتحانالارىندا سىنىقتان وتكىزىلىپ جاتىر. ءوندىرىس وتاندىق شيكىزاتپەن جۇمىس ىستەيدى, ونىڭ ىشىندە قايتالاما شيكىزات – قايتا وڭدەلگەن پلاستيكتەر, اعاشتار پايدالانىلادى. وندىرىستە ءونىمنىڭ ساپاسى, نورماتيۆتىك قۇجاتتارعا سايكەس جاسالۋى باقىلانادى. بارلىق بۇيىم سەرتيفيكاتتالعان, ءتيىستى سىناقتان وتكەن. وسى جۇمىس عىلىمي, عىلىمي-تەحنيكالىق قىزمەت ناتيجەلەرىن كوممەرتسيالاندىرۋ جوبالارىن گرانتتىق قارجىلاندىرۋ شەڭبەرىندە ىسكە اسىرىلىپ جاتىر.
