مەڭدىقاراداعى مايدانگەردىڭ سانكت-پەتەربۋرگتەگى نەمەرەسى

اتاسى تۇرعان اۋىلعا قۇنى 13 ميلليون تەڭگەلىك بالالار قالاشىعىن سالىپ بەردى مەڭدىقارا اۋدانىندا ميحايلوۆكا دەگەن سەلو بار. مۇندا كەلگەن كىسىنىڭ كوزىنە انادايدان ەرتەگىدەي اسەم بالالار قالاشىعى تۇسەدى. اۋىلدىڭ بار بالاسى وسىندا. شاحمات فيگۋرالارىن ەلەستەتەتىن ايشىقتى كارۋسەلدەر, اتكەنشەكتەر, سپورتتىق جابدىقتار بالا تۇگىلى ەرەسەكتەردى ويىنعا شاقىرعانداي قىزىقتىرادى. قالاشىقتىڭ ءدال قاسىنا ۇلى وتان سوعىسىنىڭ ارداگەرى ان­د­رەي فيلاتوۆقا ەسكەرتكىش تاقتا قويىلعان. مۇنى, ارينە, ءبىر كەلگەن ادام تۇسىنە قويمايدى. سونى بىلگەندەي, اۋىلدىڭ كەز كەلگەن تۇرعىنى: «بۇل بالالار قالا­شىعىن وسى اندرەي اتايدىڭ نەمە­رەلەرى سالدى» دەپ اڭگىمەلەي جونەلەدى. وسى سەلودان 1941 جىلى اندرەي في­لاتوۆ دەگەن جىگىت سۇرا­نىپ سو­عىس­قا اتتاندى. مايداندا ءبىر­نە­شە رەت جارالانسا دا, ايتەۋىر قۇر ءسۇل­دەرىن سۇيرەتىپ, تۇگىن تارتسا مايى شى­عاتىن ميحايلوۆكاسىنا قايتا ورالدى. وتباسىن قۇردى, بالالى-شاعالى بولدى. اۋىلدا ازىق-ت ۇلىك قويماسىنىڭ مەڭگە­رۋشىسى بولىپ ىستەدى. وعاش مىنەزى جوق, قاراپايىم ادام بالالارىنا دا جاقسى تاربيە بەردى. بىراق مايداننان العان جاراقاتىنان ءومىرى ۇزاق بولمادى, 1987 جىلى قايتىس بولدى دا, وسى ميحايلوۆ سەلوسىندا جەرلەندى. ونىڭ ۆاسيلي دەگەن تۇڭ­عىشىنان تاراعان نەمەرە­لەرى سانكت-پەتەربۋرگ قالاسىندا تۇرادى ەكەن. ءوزىنىڭ قۇرمەتىنە اندرەي دەپ اتاعان نەمەرەسى بۇگىن­­دە «ن-ترانس» كولىك-ينفرا­قۇرى­لىم توبى ديرەكتورلار كەڭە­سى­نىڭ مۇشەسى, رەسەي شاحمات فەدە­را­تسياسىنىڭ پرەزيدەن­تى, حالىقارالىق شاحمات فەدەراتسيا­سىنىڭ ۆيتسە-پرەزيدەنتى ەكەن. عالام­تور­داعى مالىمەتتەر بويىنشا اندرەي فيلاتوۆ Globaltrans تەمىرجول توبىنىڭ ءبىر بولىگىنە يە جانە «ترانسويل» اكتسيونەرلەرىنىڭ ءبىرى. ال Forbes جۋرنالىنىڭ مالىمەتىنە ۇڭىلسەك, ول رەسەيدەگى ءىرى بيزنەسمەندەردىڭ جۇزدىگىنە كىرەدى جانە الەمدىك رينگتە 960- ورىندى يەلەنەدى ەكەن. قالتالى بايدىڭ دا ءتۇر-ءتۇرى بار. مايدانگەر اندرەي فيلاتوۆ قاريانىڭ نەمەرەلەرى تەك قالتاسىن ويلامايتىن, كوكىرەگىندە كوزى بار, رۋحاني جاعىنان باي ادامدار بولىپ شىقتى. ولار اكەسى ءۆاسيليدىڭ اسكەري ادام بولۋىنا بايلانىستى اتاسىنان بولەك ءوسىپتى, ونى كورىپ تە جارىتپاپتى. بىراق اكەسىنىڭ تاربيەسىمەن سىرتىنان اتاسىنا بالا كەزدەن قۇرمەتى كۇشتى بولسا كەرەك. سوڭعى جىلدارى اندرەي مەن قارىنداسى يرينا اتاسى اندرەي الەكسەەۆيچتىڭ مايدانداعى جولدارىن ىزدەستىرىپتى. ولارعا قوستانايلىق تاريحشى ارمان قوزىباەۆ كوپ كومەك بەرەدى. اتاسىنىڭ مايداندا كورسەتكەن كەرەمەت ەرلىكتەرىن دالەلدەيتىن قۇجاتتاردى تابادى. سونىمەن نەمەرەلەر اتاسى تۇرعان, ونىڭ بەيىتى جاتقان ميحايلوۆ سەلوسىنا كەلەدى عوي. – اندرەي مەن يرينانىڭ اجەسى مەنىڭ نەمەرە اپايىم بولىپ كەلەتىن. وسىنداعى تۋىسى ءبىز عانا. سوندىقتان اندرەي مەن يرينا اتاسىنا مەرەكەلى جىلى ءبىر ۇمىتىلماس ەسكەرتكىش قويعىسى كەلدى. ونىڭ ورتەنىپ كەتكەن ءۇيىنىڭ ورنىنا مەموريالدىق ەسكەرتكىش, اتاسىنىڭ, اجەسىنىڭ بەيىتىنە تاس قويدى. سوسىن بىزبەن اقىلداستى. «اتاڭنىڭ ءۇيىنىڭ ورنىنا بالالار وينايتىن ءبىر اۋلانى قورشاپ بەرسەڭدەرشى, اندرەي الەكسەەۆيچ ۇرپاعىنىڭ بەيبىت زامانى ءۇشىن سوعىسقان جوق پا؟» دەپ كەڭەس بەردىم, – دەيدى ميحايلوۆكا سەلو­سىنىڭ تۇرعىنى گالينا لۋگاۆايا. سونىمەن مايدانگەردىڭ رەسەيلىك نەمەرەلەرى ىسكە كىرىسىپ كەتىپتى. قورعان قالاسىنداعى مامان-ۇستالارعا سۇرانىس بەرىپ, شاحمات فيگۋرالارى بەينەلەنگەن ءتۇرلى سپورت جابدىقتارىن, بالالار وينايتىن كارۋسەلدەر, اتتراكتسيوندار جاساتىپتى. گالينانىڭ ايتۋىنشا, قورعاندىق ۇستالار مۇنداي قىمبات قالاشىق قورعان قالاسىندا دا جوق ەكەنىن ايتىپتى. – بۇل رەسەيلىك جىگىتكە 12 ميلليوننان اسا تەڭگەگە ءتۇستى. مەن ونىڭ سۇراۋىمەن جەر بەرۋگە, توپىراق تاسۋعا, باسقا دا ۇساق جۇمىستارىنا كومەكتەستىم. مەنەن شىققانى 1 ميلليون تەڭگەدەن اسادى, – دەيدى وسىنداعى «ۆوستوك-1» شارۋاشىلىعىنىڭ جەتەكشىسى جامبىل امانتاەۆ. مۇنىڭ سىرتىندا بالالار قالاشىعىنىڭ ءدال قاسىنا اندرەي مەن يرينا 70 ءتۇپ الما مەن المۇرت اعاشىنىڭ كوشەتىن وتىرعىزىپ كەتىپتى. جەرگىلىكتى تۇرعىنداردىڭ ايتۋىنشا, يرينا فيلاتوۆا 9 مامىر كۇنى سانكت-پەتەربۋرگتەن ارتىنىپ-تارتىنىپ كەلىپ, وسى بالالار قالاشىعىنىڭ تۇساۋكەسەرىن ءوزى جاساپتى, شىعىنىن دا ءوز موينىنا الىپتى. – ميحايلوۆكا سەلوسىندا تۇرعان بارلىق مايدانگەردىڭ سۋرە­تىن البوم ەتىپ اكەلگەن, بالالارعا 700 دانا شارى بار, تاتتىلەرى ءوز الدىنا, – دەيدى گالينا لۋگاۆايا. جاقسى تاربيەنىڭ تاعىلىمى وسىنداي-اق بولار. ءنازيرا جارىمبەتوۆا, «ەگەمەن قازاقستان». قوستاناي وبلىسى, مەڭدىقارا اۋدانى, ميحايلوۆكا سەلوسى. سۋرەتتى تۇسىرگەن كونستانتين ۆيشنيچەنكو.