وزاتتار قوماقتى سىياقى الادى

2022 جىلدان باستاپ بەدەلدى 7 وليمپيادادا جۇلدەلى ورىنداردى يەلەنگەن وقۋشىلارعا جانە ولار­دى دايىنداعان پەداگوگ­تەرگە مەم­لەكەت تاراپىنان بىرجولعى سىياقى تاعايىندالىپ كەلەدى. بۇل ءبىلىم بايگەلەرىنىڭ قاتارىندا IMO (ماتەماتيكادان), IPhO (فيزيكادان), IBO (بيولوگيادان), IChO (حيميادان), IOL (لينگۆيس­تي­كادان), IGeO (گەوگرافيادان) جانە IOI (ينفورماتيكادان) حالىق­ارالىق وليمپيادالارى بار.

وسى اتالعان جارىستاردان التىن مەدال جەڭىپ العان وقۋ­شى 1500 ايلىق ەسەپتىك كورسەتكىش (اەك) مولشەرىندە اقشالاي سىياقى الادى. 2024 جىلعى بەلگىلەن 1 اەك مولشەرى 3 692 تەڭگەگە تەڭ ەكەنىن ەسكەرسەك, التىن مەدال يەگەرلەرىنە 5 ملن 538 مىڭ تەڭگە سىياقى بەرىلەدى. كۇمىس مەدال ءۇشىن 1000 اەك (3 ملن 692 مىڭ تەڭگە), قولا مەدال ءۇشىن 500 اەك (1 ملن 846 مىڭ تەڭگە) مولشەرىندە قارجىلاي ىنتالاندىرۋ سىي­لىعى تاعايىندالادى.

2022 جىلدان بەرى بەلگىلەنگەن ءتارتىپ بويىنشا جوعارىدا اتال­عان ءبىلىم بايگەلەرىنە ۇزدىك­تەردى دايىنداعان پەداگوگتەر دە قار­جىلاي قولداۋدان قالىس قال­ماۋعا ءتيىس. تارقاتىپ ايتقاندا, التىن مەدال يەگەرىن دايىنداعان پەدا­گوگكە بازالىق لاۋازىمدىق ايلى­قاقىنىڭ 26,5 ەسەلەنگەن مول­شەرىندە قارجىلاي سىياقى بەرى­لەدى. ايتالىق, وليمپياداعا دا­يىن­داعان وقۋشىسى التىن مەدال العان مۇعالىمنىڭ بەلگىلەنگەن قىز­مەت­تىك جالاقىسى ورتا ەسەپپەن 250 مىڭ تەڭگە دەسەك, وندا ول وسى ەڭبەگى ءۇشىن ءبىر رەتتىك 6 ملن 625 مىڭ تەڭگە سىياقى الۋعا قۇقىلى. ال كۇمىس مەدال يەگە­رىن دايىنداعان پەداگوگكە بازا­لىق لاۋازىمدىق ايلىقاقى 17,5 ەسەلەنگەن مولشەرىندە, قولا مە­دال يە­گەرىن دايىنداعان پەدا­گوگكە با­زا­لىق لاۋازىمدىق ايلىق­اقى 8,5 ەسەلەنگەن مول­شە­رىندە بەرى­لە­دى.

وقۋ-اعارتۋ مينيسترلىگىنىڭ اقپاراتىنا سۇيەنسەك, بيىل الەم بويىنشا بەدەلدى 7 وليمپيادادا جۇلدەلى ورىن العان 26 وقۋشىمىز قارجىلاي سىياقى الادى. 2023-2024 وقۋ جىلىنىڭ قورىتىن­دىسى بويىنشا ەلىمىزدىڭ ۇلتتىق قۇراماسى ەڭ بەدەلدى الەمدىك پاندىك وليمپيادالاردا 2 التىن, 12 كۇمىس, 12 قولا مەدال جانە ءبىر ديپلوم يەلەندى. سونىمەن قاتار حالىق­ارالىق وليمپيادالاردىڭ جە­ڭىم­پازدارىنا وتاندىق جو­عا­رى وقۋ ورىندارىنىڭ كەز كەل­گە­نىنە وقۋعا تۇسۋگە گرانت بەرىلەدى.

ەستەرىڭىزگە سالا كەتەيىك, بىلتىر 23 وقۋشى 65,6 ملن تەڭگە, 20 پەداگوگ جالپى سوماسى 71,4 ملن تەڭگە بىرجولعى سىياقى الدى. جالپى 12 ءىرى حالىقارالىق جارىسقا قاتىسقان 1218 وقۋشىنىڭ 603-ءى مەدال يەگەرى اتاندى. ياعني الەمدىك دودالاردا ەلىمىزدىڭ نامىسىن قورعاعان ءاربىر ەكىنشى قاتىسۋشى جۇلدەلى ورىنعا يە بولدى.