وقۋ-اعارتۋ مينيسترلىگىنىڭ تاراتقان اقپاراتىنا سۇيەنسەك, ەلىمىزدىڭ نامىسىن 30 قۇزىرەتتىلىك بويىنشا 32 قاتىسۋشى جانە 30 حالىقارالىق ساراپشى قورعادى. «ۇلت ۇزدىگى» اتالىمى جانە قۇزىرەتتىلىكتەر بويىنشا ۇزدىكتەر: ورال اقپاراتتىق تەحنولوگيالار كوللەدجى «ۆەب-تەحنولوگيالار» ماماندىعىنىڭ ستۋدەنتى رۋسلان يۋسۋپوۆ; شىمكەنت قالاسىنىڭ جەڭىل ونەركاسىپ جانە سەرۆيس كوللەدجى ء«سان تەحنولوگياسى» ماماندىعىنىڭ ستۋدەنتى ايگەرىم دوسوۆا; قوستاناي اۆتوموبيل كولىگى كوللەدجى «جەلىلىك جانە جۇيەلىك اكىمشىلەندىرۋ» ماماندىعىنىڭ ستۋدەنتى دانيار ابىكەنوۆ; الماتى قۇرىلىس-تەحنيكالىق كوللەدجى «قۇرعاق قۇرىلىس جانە سىلاق جۇمىستارى»ماماندىعىنىڭ ستۋدەنتى ميحايل پوپوۆ; سەمەي قالاسىنىڭ راديوتەحنيكا جانە بايلانىس كوللەدجى ء«موبيلدى روبوتتەحنيكا» ماماندىعىنىڭ ستۋدەنتتەرى تيمۋر بابەنكو مەن ەلنار جۋاسباەۆ; الماتى قالاسى «ادىلەت» كوللەدجى «قوناقۇي رەسەپشيونيسى» ماماندىعىنىڭ ستۋدەنتى جانەل ساعىندىق; پاۆلودار سەرۆيس جانە تاماقتانۋ كوللەدجى «مەيرامحانا سەرۆيسى» ماماندىعىنىڭ ستۋدەنتى ارتۋر لەيمان.
وقۋ-اعارتۋ ءمينيسترى عاني بەيسەمباەۆ جوعارىداعى جەڭىمپازداردى ارنايى قابىلداپ, قۇتتىقتاۋىن جەتكىزىپ, تولايىم تابىستار تىلەدى. ونىڭ ايتۋىنشا, ستۋدەنتتەردىڭ بۇل ناتيجەسى ەرەكشە اتاپ ايتۋعا تۇرارلىق قۋانىش.
«مەملەكەت باسشىسىنىڭ جولداۋىندا الداعى جىلدى «جۇمىسشى ماماندىقتارى جىلى» دەپ جاريالاۋى مۇنداي جەڭىستىڭ ماڭىزىن ارتتىرا تۇسەدى. ەڭبەك ادامىنىڭ بەدەلىن ارتتىرۋ ماقساتىندا بيىلعى قىركۇيەك ايىنان باستاپ 300 مىڭنان اسا كوللەدج ستۋدەنتىنىڭ شاكىرتاقىسى 50%-عا ارتتى, ال مەملەكەتتىك تاپسىرىس كولەمى 12 مىڭ ورىنعا ۇلعايدى. «WorldSkills» ستاندارتتارى ءبىلىم باعدارلامالارىنا ەنگىزىلدى. جەڭىمپاز ستۋدەنتتەردى, ولاردىڭ پەداگوگتەرى مەن اتا-انالارىن شىن جۇرەكتەن قۇتتىقتايمىن! سىزدەردىڭ جەتىستىكتەرىڭىز ەلىمىزدىڭ دامۋى جولىنداعى جاڭا كاسىبي بەلەستەرىڭىزدىڭ نەگىزىنە اينالاتىنىنا سەنىمدىمىن!», دەدى مينيستر.
«WorldSkills International» – 25 جاسقا دەيىنگى جاس مامانداردىڭ كاسىبي داعدىلارىن انىقتاۋعا, دامىتۋعا باعىتتالعان ءىرى حالىقارالىق جارىس. چەمپيونات حالىقارالىق ىنتىماقتاستىقتى نىعايتۋعا جانە تسيفرلىق ترانسفورماتسيا جاعدايىندا جۇمىسشى ماماندىقتارى مەن زاماناۋي تەحنيكالىق ءبىلىمنىڭ ماڭىزىن ارتتىرۋعا, سونىمەن قاتار بۇكىل الەم بويىنشا تەحنيكالىق ماماندىقتار بويىنشا كاسىبي دايارلىقتىڭ مارتەبەسىن, ستاندارتتارىن ناسيحاتتاۋعا باعىتتالعان. ال چەمپيوناتقا قاتىسۋ وقۋ باعدارلامالارىن جاقسارتۋعا, زاماناۋي ستاندارتتاردى ەنگىزۋگە, تەحنيكالىق جانە كاسىپتىك ماماندىقتارعا جاستاردى تارتۋعا ىقپال ەتەدى. بۇگىنگى تاڭدا اتالعان حالىقارالىق قوزعالىس 85 ەلدە كاسىبي دايارلىق ستاندارتتارىن ارتتىرىپ, ونىڭ قولداۋىمەن وڭىرلىك, ۇلتتىق جانە الەمدىك چەمپيوناتتار, كونتينەنتتىك بىرىنشىلىكتەر وتكىزىلىپ كەلەدى. قازاقستان 2014 جىلدان باستاپ «WorldSkills»-ءتىڭ تولىققاندى مۇشەسى سانالادى, بۇل جاڭا تالاپتارعا سايكەس تەحنيكالىق جانە كاسىپتىك ءبىلىم بەرۋ كادرلارىن دايارلاۋدىڭ ۇلتتىق جۇيەسىن قايتا قاراۋعا نەگىز بولدى.
«WorldSkills-2024» چەمپيوناتىنىڭ قاتىسۋشىسى, قازاقستان قۇراما كومانداسىنىڭ مۇشەسى ءارى «ۇلت ۇزدىگى» اتالىمىنىڭ يەگەرى ارتۋر لەيمان حالىقارالىق جارىس ۇلكەن تاجىريبە جيناۋعا مۇمكىندىك بەرگەنىن ايتادى. ء«بىز جارىس الدىندا وزگە دە ەلدەردەن كەلگەن قاتىسۋشىلارمەن تانىسىپ, ارالاسىپ, تاجىريبە الماسۋعا مۇمكىندىك الدىق. مىسالى, مەن سايىسقا تۇسكەن «مەيرامحانا سەرۆيسى» باعىتى بويىنشا 6 ەلدەن كەلگەن قارسىلاستارىم بولدى. ولاردىڭ دا قارىم-قابىلەتىن كوردىك. جاڭا نارسە ۇيرەندىك. ۇيىمداستىرۋشىلار وتە جوعارى دەڭگەيدە دايىندالعان. جارىستى ۇيىمداستىرۋ تاراپى تۇسىندىرگەندەي, مەن جارىس ناتيجەسىندە ەڭ جوعارى بالل جيناعان كوماندا مۇشەسى بولدىم. سوندىقتان مەنى «ۇلت ۇزدىگى» اتالىمى بويىنشا جەڭىمپاز دەپ تانىدى», دەيدى.
ال «قوناقۇي رەسەپشيونيسى» قۇزىرەتتىلىگى بويىنشا ەل نامىسىن حالىقارالىق جارىستا قورعاعان جانەل ساعىندىق: ء«وز باعىتىمدا جەڭىمپاز اتانىپ, فرانتسيا ەلىنەن مەدالونمەن ورالدىم. بۇل – مەنىڭ الەمدىك ارەناداعى العاشقى تاجىريبەم. بۇعان دەيىن ەل كولەمىندەگى رەسپۋبليكالىق بايقاۋلاردا ونەر كورسەتىپ كەلدىم. «WorldSkills» چەمپيوناتى ماعان كاسىبي دامۋىما ۇلكەن سەرپىلىس بەردى. فرانتسيا, شۆەتسيا ەلدەرىندە قوناقۇي شارۋاشىلىعى وتە جاقسى دامىعان. شەتەلدىك ارىپتەستەرمەن, ونەر كورسەتۋشىلەرمەن تاجىريبە الماسىپ, كوپ جاڭا دۇنيە ءبىلدىم. وعان قوسا جاڭا دوستار تاپتىم. بارىنەن دە چەمپيونات فرانتسياعا بارسام دەگەن ارمانىمنىڭ ورىندالۋىنا سەبەپكەر بولعانىنا, ەلىمدى حالىقارالىق دەڭگەيدە كورسەتە العانىما, جۇلدەمەن ورالعانىما باقىتتىمىن!», دەپ قۋانىشىن ءبولىستى.
