الدىمەن سارىبۇلاق اۋىلدىق وكرۋگىنىڭ قاراعاش اۋىلىنا باردىق. مۇندا باسپانالى بولۋ باقىتىنا اۋدانداعى جاعدايى تومەن, جالعىزىلىكتى, كوپبالالى, مۇمكىندىگى شەكتەۋلى, تۇرعىن ءۇي كەزەگىندە تۇرعان 5 وتباسى قول جەتكىزدى. قۋانىشقا جينالعان قاۋىم الدىندا جۇرەكجاردى تىلەگىن بىلدىرگەن اۋدان اكىمى قانات ەسبولاتوۆ تۇرعىن ۇيمەن قامتاماسىز ەتۋ حالىقتىڭ ءومىر ءسۇرۋ ساپاسىن كوتەرۋدەگى ەڭ باستى ماسەلەنىڭ ءبىرى ەكەنىن ايتتى.
«2023-2029 جىلدار ارالىعىندا تۇرعىن ءۇي-كوممۋنالدىق ينفراقۇرىلىمدى دامىتۋ تۇجىرىمداماسى» بويىنشا سالىنعان ۇيلەر ەل يگىلىگىنە بەرىلدى. اۋدانداعى ءار اۋىلدىق وكرۋگتەردە ءۇي كەزەگىندە تۇرعان تۇرعىندارعا 8-9 ۇيدەن سالىپ جاتىرمىز. جالپى جىل سوڭىنا دەيىن 100 ءۇي بەرىلەدى دەپ جوسپارلانىپ وتىر. ودان بولەك, اۋدان ورتالىعىندا 60 پاتەرلى ءۇي سالىندى. ونىڭ كىلتى قىركۇيەك ايىنىڭ 12-جۇلدىزىندا بەرىلەدى. سول كۇنى 250 ورىندىق ەمحانانىڭ اشىلۋى وتەدى. باسپانالى بولعان تۇرعىنداردى قونىستارىمەن قۇتتىقتايمىز», دەدى ق.ەسبولاتوۆ.
ءوز كەزەگىندە تۇرعىن ءۇيدىڭ ساپالى جانە ۋاقتىلى بەرىلۋىنە ۇلەس قوسقان مەردىگەر «Kazstroy Building» جشس قۇرىلتايشىسى باۋىرجان ورالعازين حالىقتىڭ باتاسىن الۋ ءۇشىن ءۇيدى ساپالى ءارى ۋاقتىلى اياقتاعانىن ايتىپ, قونىس يەلەرىنە اقجارما تىلەگىن ءبىلدىردى. وسىدان كەيىن اقجاۋلىقتى اجەلەر شاشۋ شاشىپ, سارىبۇلاق اۋىلدىق اقساقالدار القاسىنىڭ توراعاسى قاجىمۇقان ەسىمبەكوۆ اق باتاسىن بەردى.
كوپتەن كۇتكەن ءۇيدى يەلەنگەن جانداردىڭ قۋانىشىندا شەك جوق. قونىسقا يە بولعان جاقىندارىن قۇتتىقتاپ شاشۋ شاشىپ, تىلەك ايتۋشىلار قاتارى دا از بولمادى. كوپ جىلدان بەرى باسپاناسىز, تۋعان-تۋىسىن پانالاپ كەلگەن ىرىسجان ءجۇمادىلوۆا جاڭا قونىس يەسى اتاندى. ءىى-توپتاعى مۇمكىندىگى شەكتەۋلى جان پاتەر كىلتىن العاندا قۋانىشىن جاسىرا المادى.
«امالسىز انامنىڭ, تۋعان-تۋىستارىمنىڭ ۇيىندە تۇرىپ كەلدىم. ءىى-توپتاعى مۇگەدەكتىكتىڭ سالدارىنان ءوز بەتىمشە جۇمىس جاساپ, باسپانا الۋعا مۇلدە مۇمكىندىك بولمادى. وبلىس اكىمىنىڭ, اۋدان باسشىلىعىنىڭ ارقاسىندا ءۇيلى بولدىق. مۇنداي جاقسىلىقتىڭ شاراپاتىن قينالىپ جۇرگەن ءاربىر وتباسى كورسە دەپ تىلەيمىن. قولۇشىن سوزىپ, كومەكتەسكەن جاندارعا العىسىمدى بىلدىرەمىن», دەدى ول.
جولامان اۋىلىندا «2023-2029 جىلدار ارالىعىندا تۇرعىن ءۇي-كوممۋنالدىق ينفراقۇرىلىمدى دامىتۋ تۇجىرىمداماسى» بويىنشا سالىنعان 4 ءۇيدىڭ كىلتى تابىستالدى. مۇندا دا پاتەر كىلتىنە يە بولعاندار نەگىزىنەن ۇزاق جىلدان بەرى تۇرعىن ءۇي كەزەگىندە تۇرعان كوپبالالى جانە تۇرمىسىندا قيىنشىلىعى بار جالعىزباستى انالار مەن مۇمكىندىگى شەكتەۋلى جاندار.
تۇرعىن ءۇي كەزەگىندەگى ازاماتتار ءۇشىن بەرىلگەن ەكى اۋىلداعى ءۇيدى ينۆەستورلار ءوز قارجىلارىنا سالعان. جەرگىلىكتى اكىمدىك پەن قۇرىلىسقا جاۋاپتى «Kazstroy Building» جانە «ۋنيۆەرسالسترويسەرۆيس» جشس اراسىندا «تۇرعىن ءۇي سالۋ, ساتىپ الۋ» مەموراندۋمى جاسالىپتى. ياعني كاسىپكەر ءوز قارجىسىنا سالعان ءۇيدىڭ ساپاسىن اكىمدىك تەكسەرىپ, ءبىر شارشى مەترىن 294 200 تەڭگەدەن ساتىپ الادى. سوندا ءبىر ءۇيدىڭ قۇنى 22 ملن 652 مىڭ تەڭگەگە اينالادى.
مەموراندۋمعا سايكەس, كاسىپكەرلەر كەربۇلاق اۋدانىنىڭ 17 ەلدى مەكەنىندە 100 تۇرعىن ءۇي قۇرىلىسىن جۇرگىزەدى. قازىرگى تاڭدا 17 ءۇيدىڭ قۇرىلىسى اياقتالىپتى. بۇگىن 9 ءۇيدىڭ كىلتى تابىستالدى. جوسپار بويىنشا قازان ايىندا 50, قاراشا ايىندا 33 ءۇيدىڭ قۇرىلىسى اياقتالادى. 3 بولمەلى ءۇي 77 شارشى مەتردى قۇرايدى. اۋماعى – 10 سوتىق. زامان تالابىنا ساي سالىنعان باسپانادا اۋىزسۋ, جارىق, كارىز جەلىلەرى تولىعىمەن تارتىلعان. قابىرعاسى گازابلوكپەن قالانعان. سونداي-اق ينۆەستورلار كومەك رەتىندە ءوز قارجىسىنا ءۇيدىڭ سىرتىن قورشاپ, وتىن جانە كومىر قورا سالىپ بەرىپتى. اشىق كونكۋرس ءراسىمى اياقتالسا, قاراشوقى اۋىلىنداعى 8 وتباسى باسپانالى بولماق.
ودان كەيىن سول ەلدى مەكەندە «قۋانىش-7» بالاباقشاسىنىڭ اشىلۋ سالتاناتى ءوتتى. شارادا بالاباقشا سالىپ, اتا-انانى دا, بالانى دا, جالپى اۋىل جۇرتشىلىعىن قۋانتقان كاسىپكەر نۇرجان مۇسابەكوۆ ءسوز سويلەپ, كوپشىلىكتى مەرەكەسىمەن قۇتتىقتادى. جاڭا اشىلىپ جاتقان بالاباقشادا بالدىرعانداردىڭ تاعىلىمدى تاربيە الۋىنا تىلەكتەستىگىن ءبىلدىردى.
«30 جىل بوس تۇرعان عيماراتتى كۇردەلى جوندەۋدەن وتكىزىپ, بالدىرعانداردى قۋانتايىق دەپ, بالاباقشا اشتىق. بىزدە بۇدان بولەك, الماتىدا دا سالعان بالاباقشامىز بار. سوندىقتان بۇل سالادا تاجىريبەمىز جەتكىلىكتى. الداعى ۋاقىتتا بالپاڭ باسقان بالدىرعاندارىمىز قازاقى تاربيەنى بويىنا ءسىڭىرىپ, مەكتەپكە ساقاداي ساي بولىپ بارادى دەگەن سەنىمىمىز مول», دەپ بالاباقشانىڭ اشىلۋىنا كومەكتەسكەن اۋدان اكىمىنە العىس ايتتى.
وسىدان كەيىن شاراعا جينالعان قاۋىم بالاباقشانىڭ ءىشىن ارالاپ, جۇمىسىمەن تانىستى. بىلتىر 16 قاراشادا كاسىپكەر نۇرجان مۇسابەكوۆ پەن جارى جولامان اۋىلىنىڭ تۋماسى اينۇر اقانقىزى مەملەكەتتىك ساتىپ الۋ ارقىلى 1960 جىلى ىرگەسى قالانىپ, كەيىن بوس قالعان بۇرىنعى كەڭسە عيماراتىن ساتىپ العان. تۋعان جەرگە تۋىن تىگۋدى ماقسات تۇتقان كاسىپكەرلەر 120 ملن تەڭگەگە كۇردەلى جوندەۋ جۇرگىزىپ, ارنايى بالاباقشا اشۋدى ويلايدى. مىنە, بالدىرعانداردىڭ ءۇيى 1 تامىزدان باستاپ 75 بالاعا ارنالعان 3 توپپەن جۇمىس ىستەپ كەلەدى.
اتالعان نىساندا بالالاردىڭ تاربيەسى مەن دامۋىنا جاۋاپتى 14 ءتۇرلى مامان ءوز قىزمەتىن اتقارادى. ءار مامان بالانىڭ جاس ەرەكشەلىكتەرىنە سايكەس كاسىبي ءبىلىم مەن داعدىلاردى قولدانا وتىرىپ, تاربيەلەنۋشىلەردىڭ جان-جاقتى دامۋىنا ۇلكەن ۇلەس قوسادى. بالالاردىڭ وقۋ, ويىن, جاتىن بولمەلەرى, مۋزىكالىق زالى اسەم بەزەندىرىلگەن. ءبارى دە تالاپقا ساي. بالدىرعانداردىڭ قاۋىپسىزدىگىن قامتاماسىز ەتۋ ماقساتىندا بەينەباقىلاۋ ورناتىلعان. مۇندا 2-دەن 6 جاسقا دەيىنگى بالالار قابىلدانادى. بۇل قالاعا قاتىناپ جۇمىس ىستەيتىن اتا-انالار ءۇشىن دە وتە ىڭعايلى.
جەتىسۋ وبلىسى
