ولار جوعارى قان قىسىمىن دياگنوستيكالاۋعا جۇزدەگەن ۆوكالدى بيوماركەردى قولدانعان. تەحنولوگيانىڭ تيىمدىلىگىن بايقاۋ ماقساتىندا زەرتتەۋشىلەر 245 ەمدەلۋشىگە تاجىريبە جاساعان. ماماندار ەكى اپتا بويى قاتىسۋشىلاردىڭ داۋىسىن 6 مارتە جازىپ, باقىلاۋدا ۇستاعان. ناتيجەسىندە, نەيروجەلى ايەلدەردىڭ 84%-ى مەن ەرلەردىڭ 77%-ىندا جوعارى قان قىسىمىن ءدال انىقتاۋعا قابىلەتتى بولىپ شىقتى. جوبا اۆتورلارىنىڭ ايتۋىنشا, يننوۆاتسيا گيپەرتونيادان بولەك, قانت ديابەتى اۋرۋلارىن دا دياگنوستيكالاي الادى.
جاھاندىق جارمەڭكە
قىتايدىڭ فۋتسزيان پروۆينتسياسىندا 24-حالىقارالىق ينۆەستيتسيا جانە ساۋدا كورمەسى ءوتىپ جاتىر. 120 مىڭ شارشى مەتردى الىپ جاتقان تەحنولوگيالىق الاڭدى تاماشالاۋعا الەمنىڭ 119 ەلىنەن ىسكەر ازاماتتار مەن ساياحاتشىلار كەلگەن.
سيامىنداعى بۇل جارمەڭكە جاساندى ينتەللەكت, گۋمانويدتى روبوت, بۇلتتىق ەسەپتەۋ جانە ينتەرنەتتىك قۇرىلعىلار سالاسىنداعى سوڭعى تەحنولوگيالىق جەتىستىكتەرگە ارنالعان. وندا 80-نەن استام يننوۆاتسيا قويىلعان. اسىرەسە ادام ءتارىزدى قۇلتەمىرلەر كەلۋشىلەردى ءتۇرلى قيمىلىمەن تاڭعالدىردى. ماسەلەن, سەكۋندىنا 3,3 مەتر جىلدامدىقپەن قوزعالاتىن روبوت دەنساۋلىققا قاۋىپتى ورىنداردا ادامنىڭ ورنىنا قىزمەت ەتەدى. ال جاساندى ينتەللەكتىگە نەگىزدەلگەن روبوتتار شىنايى سويلەي الادى. ءتىپتى ەگدە كىسىلەردىڭ جانىنا سەرىك بولىپ, سىرلاساتىن قابىلەتكە يە.
قۇراق كورپە رەكوردى
استانادا ءوتىپ جاتقان دۇنيەجۇزىلىك كوشپەلىلەر ويىندارى قارساڭىندا ەلىمىزدىڭ قولونەرشىلەرى 450 قۇراق كورپە تىگىپ, گيننەسس رەكوردىن جاڭارتتى.
ۇيىمداستىرۋشىلاردىڭ ءبىرى نۇرگۇل ابايحاننىڭ ايتۋىنشا, 19 وبلىستان 450 قۇراقشى كەلگەن. ولاردىڭ اراسىندا 8 جاستان 85 جاسقا دەيىنگى شەبەرلەر بار. «بىلتىر 200 قۇراقشى گيننەسس كىتابىنا ەندىك. بيىل ءوز رەكوردىمىزدى جاڭارتىپ جاتىرمىز. دايىندىقتى 2024 جىلدىڭ قاڭتارىندا باستادىق. V دۇنيەجۇزىلىك كوشپەلىلەر ويىندارى وتەتىنىن ەستىپ, ءوز ۇلەسىمىزدى قوسقىمىز كەلدى. باستى ماقساتىمىز – قازاقتىڭ اۋىزبىرلىگىن كورسەتۋ. 450 كورپەشەنىڭ ءبارى بىردەي, ەگىز كورپەدەي. ءبىر تەحنيكا, ءبىر ولشەممەن تىگىلگەن. جايىلعان كەزدە ۇلكەن كىلەم ءتارىزدى بولادى», دەيدى ول.
