دۇنيە جۇزىنە تانىمال كومپانيالاردىڭ العاش شىعارعان اۆتوكولىكتەرىنەن باستاپ از دانامەن جاسالعان مودەلدەردى وسى جەردەن كورۋگە بولادى. مۇراجاي 2007 جىلى اشىلعان. مۇنداعى ەڭ قىمبات كولىك – 1955 جىلعى «Mercedes-Benz». ەكى كىسىلىك شاعىن ماشينانىڭ قۇنى 4,6 ميلليون دوللار. الەمدەگى ەڭ ۇزىن جەڭىل كولىك «Buick-ءتى» دە وسى جەردەن تاماشالاي الاسىز. بۇل جاقتا 150-گە جۋىق كونە قۇندى كولىك قويىلعان. ءاربىرىنىڭ وزىندىك تاريحى بار. مۋزەي ولاردىڭ كەيبىرىن اۋكتسيونداردا ساتىپ السا, ەندى ءبىرىن كوللەكتسيونەرلەر وزدەرى كەلىپ سىيعا تارتقان.
سۋ استىنداعى سۇلۋلىق
مەكسيكانىڭ «كانكۋن» اتتى دەمالىس ورتالىعىندا الىپ سۋ استى مۋزەيى بار.
2010 جىلدىڭ جەلتوقسان ايىندا اشىلعان مۋزەيدە ءتورت مىڭعا جۋىق ساۋلەت ەسكەرتكىشى ورنالاسقان. مۇسىندەردىڭ ارقايسىسى سۋ استىنداعى مارجاندى جارتاستارمەن تۇتاسىپ كەتۋ ءۇشىن تابيعي ماتەريالداردان جاسالعان. تۇنىق سۋدىڭ تەرەڭىندە ورنالاسقان ونەر مۋزەيىن ءتۇبى اينەكتەن جاسالعان كەمە ارقىلى دا تاماشالاۋعا بولادى. مۇنداعى ءار ءمۇسىننىڭ اتاۋى دا ەرەكشە. ماسەلەن, «جوعالعان ءۇمىت كوللەكتسياسى», «ادام وت ىشىندە», ء«ۇمىت باعى» سىندى ونەر تۋىندىلارى تامساندىرماي قويمايدى. ولاردىڭ كوپشىلىگى بريتاندىق ءمۇسىنشى دجەيسون دەكەيرس تەيلورعا, ال قالعاندارى جەرگىلىكتى مەكسيكالىق مۇسىنشىلەرگە تيەسىلى.
الىپ ادامنىڭ اعزاسى
نيدەرلاند مەملەكەتىنىڭ لەيدەن قالاسىندا ورنالاسقان «كورپۋس» مۋزەيى فيزيولوگيانى ەرەكشە جاقسى كورەتىن جاندار ءۇشىن تاپتىرماس مۇمكىندىك.
سەبەبى مۇندا ءبارى شىنايى. عيماراتتىڭ بەينەسىن ادامعا ۇقساتىپ جاساعان. ەكسكۋرسيا بارىسىندا ادامنىڭ بارلىق ىشكى مۇشەلەرىنىڭ قالاي جۇمىس ىستەيتىنىن بايقاۋعا بولادى. تۋريستەر ءوزىن الىپ ادامنىڭ ىشىنە كىرىپ كەتكەندەي سەزىنەدى. مۋزەيگە كەلۋشىلەر ادامنىڭ تۇشكىرگەندە اعزاسىندا نە بولاتىنىن باقىلاپ نەمەسە تاماق ىشكەننەن كەيىن ىشەكتە نە بولاتىنىن, ۇيقىنىڭ نە ءۇشىن قاجەت ەكەنىن تۇسىنەدى. 35 مەترلىك ەرەكشە عيماراتتىڭ جوباسىن جاساۋعا 12 جىل كەتىپتى, ال قۇرىلىسى 2 جىلعا سوزىلعان.
