الەمگە داڭقى اسقان سالۆادور ءداليدىڭ 61 ەڭبەگى استاناداعى «حاس سانات» كورمە گالەرەياسىنا جەتكىزىلۋى ەلەۋلى وقيعا. ەكسپوزيتسيا قۇرامىنا «كارمەن», «اليسا عاجايىپتار ەلىندە», «دالينيان جىلقىلارى», «ماحاببات تريلوگياسى» سەريالارىنان بىرنەشە كوركەم سۋرەت ەنگەن. دالي قازاق ءۇشىن اسا قادىرلى, ءمانى بيىك جىلقى اتاۋلىنى ەرەكشە ۇناتسا كەرەك, سۋرەتتەرىندە كوبىرەك بەينەلەگەن ەكەن. سونىمەن بىرگە كەستەلى تۋىندىلار تابيعات سازىنا تولى. ءسىرا, كەز كەلگەن تالانتتى ونەرپاز جۇمباعىنىڭ كىلتى تابيعاتپەن تۇتاسا بىلۋىندە جاتسا كەرەك.
ءارالۋان سۋرەتتەرگە قاراپ, تەرەڭ ويعا شوماسىز. ءبىر قاراعاندا, كوزگە توسىن, كوڭىلگە وعاش كورىنگەنمەن, ءتۇيىنى تەرەڭ, ادام ويىنا ورالا بەرمەيتىن بەينەلەر مول. تاڭعاجايىپ ونەر تۋىندىلارىن تۇپنۇسقادان ءوز كوزىمىزبەن تاماشالاپ, تولاعاي اسەرگە بولەندىك.
– بيىل سيۋررەاليمز جانرىنىڭ پايدا بولعانىنا 100 جىل تولادى. وعان قوسا, الەم سالۆادور ءداليدىڭ 120 جىلدىق مەرەيتويىن تويلاپ جاتىر. وسى قوس ايتۋلى داتاعا ۇلەسىمىزدى قوسقىمىز كەلدى. بۇل كورمەنى وتكىزۋگە ءبىر جىل دايىندالدىق. مۇندا 61 ليتوگرافيا قويىلعان. ولاردىڭ بارلىعى تۇپنۇسقا. الەمنىڭ ءار ەلىندەگى كوللەكتسيونەرلەردىڭ جەكە قورىنان الىندى.
اتاقتى اعىلشىن جازۋشىسى ليۋيس كەررولدىڭ «تاڭعاجايىپتار الەمدىندەگى اليسا» شىعارماسى كوپشىلىككە تانىس. سول ەرتەگىنى سالۆادور دالي قىلقالامىنا ارقاۋ ەتكەن. 1969 جىلى وتە شەكتەۋلى سەريامەن 12 كورنەكتى سۋرەت سالىپ شىققان. سولاردىڭ بىرقاتارى وسى كورمەدە ۇسىنىلدى, – دەيدى ونەرتانۋشى سەرگەي تروششەنكوۆ.
ايگىلى مايتالمان مىڭعا تارتا سۋرەتتى دۇنيەگە اكەلگەنى ايتىلادى. ال كەيبىر ونەرتانۋشىلار اتپال ەردىڭ ەڭبەگى 2 مىڭنان اساتىنىن بايان ەتەدى. نە دەسەك تە, ونەرپازدىڭ بار ءومىرىن ءبىر ماقساتقا سارپ ەتىپ, ادامزات يگىلىگى ءۇشىن ەڭبەك ەتكەنى ايقىن.
– سالۆادوردىڭ ەرەكشەلىگى – ول ءوزى ءۇشىن جاڭالىق اشقان ادام. الەمدە ەڭ ۇلكەن جاڭالىق اشقان ادامنىڭ ءبىرى. لوگوتيپ دەيمىز عوي, سالۆادور سول لوگوتيپتى جاساۋدىڭ شەبەرى بولعان. ول فوتونى دا مەڭگەرگەن, ونىڭ اكتەرلىك تە شەبەرلىگى بار, سەگىز قىرلى ءبىر سىرلى دەپ ايتۋىمىزعا بولادى, – دەيدى قازاقستاننىڭ ەڭبەك سىڭىرگەن قايراتكەرى, سۋرەتشى جانۇزاق ءمۇساپىر.
ءبىز تاماشالاعان كورمە ەرەكشەلىككە تولى. ءار سۋرەت وزىنە جەكە قاراۋعا, وي كوزىمەن ۇڭىلۋگە ماجبۇرلەيدى. ماسەلەن, «ماحاببات تريلوگياسى» سۋرەتى ايەلى گالاعا ارنالعان. تالاي تالانتتىڭ شابىتىن شاقىرعان گالا سۇلۋ العاش كورگەننەن-اق سۋرەتشىنىڭ جۇرەگىن باۋرايدى. استرولوگيا, ميستيكانى ۇناتقان ەرەكشە ايەلدىڭ سۇلباسى تارو كارتالارىنىڭ بەينەسى ارقىلى سالىنعان. سۋرەتتە ەكى عاشىقتىڭ ارمان-تىلەگى, قۇپيا سىرلارى ءارتۇرلى بوياۋلار ارقىلى شەبەر بەرىلگەن.
سالۆادور دالي – قوعامدىق ويعا تۇرەن سالعان بىردەن-ءبىر ونەر يەسى. ول قالىپتاسقان تۇسىنىكتەردى بۇزىپ, بولمىس-بىتىمىمەن جاڭا باسپالداققا شىقتى, جاڭا قۇرلىق اشتى. قايدا جۇرسە دە سەنساتسيالىق ارەكەت جاساپ, ەرەكشەلىگىن ايقىن تاڭبالاپ ءجۇردى. ءيا, ەل اراسىندا تەنتەك تالانت اتانعان الىپتىڭ مۇراسى – ومىرشەڭ. بۇعان زامان مەن بۇقارا كۋاگەر. ەلوردامىزدا اي سوڭىنا دەيىن ۇزدىكسىز جالعاساتىن ونەر مەرەكەسىنە كەلۋشىلەردىڭ قاراسى ارتا بەرەرى داۋسىز.
