«جايلى مەكتەپ» ۇلتتىق جوباسىمەن سالىنعان ەلورداداعى №103 مەكتەپتە مينيستر ع.بەيسەمباەۆ ءبىلىم سالاسى قىزمەتكەرلەرىن, اتا-انالار مەن وقۋشىلاردى جاڭا وقۋ جىلىنىڭ باستالۋىمەن قۇتتىقتادى.
– قادىرلى ۇستازدار, اتا-انالار جانە وقۋشىلار! بۇگىن 2024-2025 وقۋ جىلىنىڭ جاڭا پاراعى اشىلدى. ەلىمىزدىڭ بارلىق وڭىرىندە ءبىلىم كۇنىن اسىعا كۇتكەن 3,9 ملن بالا سۇيىكتى مەكتەبىمەن, ۇستازدارىمەن قايتا قاۋىشتى. مەملەكەت وقۋشىلاردىڭ ساپالى ءبىلىم, سانالى تاربيە الۋى ءۇشىن بارلىق جاعدايدى جاساپ جاتىر. بۇگىن 90 مىڭعا جۋىق وقۋشى سۋ جاڭا مەكتەپتەردە وقۋ جىلىن باستايدى. ونىڭ ىشىندە «جايلى مەكتەپ» ۇلتتىق جوباسىمەن سالىنعانى دا بار. ال 200 مىڭنان اسا بالا كۇردەلى جوندەۋدەن ءوتىپ, قايتا جابدىقتالعان مەكتەپتەردە ءبىلىم الادى.
1 قىركۇيەك – العاش رەت مەكتەپ تابالدىرىعىن اتتاعان بالالار ءۇشىن ەرەكشە مەرەكە. قىمباتتى بالالار, وقۋ جىلى سەندەردى جاڭا جەتىستىكتەرگە جەتەلەپ شابىتتاندىراتىن قىزىقتى, تانىمدى ءارى تاعىلىمدى بولسىن دەپ تىلەيمىن! ءدال وسى كۇنى ۇستازداردىڭ وسكەلەڭ ۇرپاققا ءبىلىم مەن تاربيە بەرۋدەگى وراسان ەڭبەگىن دە اتاپ وتكىم كەلەدى. ۇلتىمىزدىڭ اعارتۋشى ۇلى تۇلعاسى احمەت بايتۇرسىن ۇلى «ۇستاز – ۇلت كەلبەتى» دەپ بەكەر ايتپاسا كەرەك. سوندىقتان اعارتۋشىلىق ميسسياسىن ادال اتقارىپ جۇرگەن ۇستازداردىڭ ەڭبەگى لايىقتى تۇردە جوعارى باعالانۋعا ءتيىس. قۇرمەتتى ارىپتەستەر, ءوز ماماندىقتارىڭىزعا ادالدىقتارىڭىز, ۇرپاق ىسىندەگى جانكەشتى ەڭبەكتەرىڭىز ءۇشىن العىسىمدى بىلدىرەمىن. سىزدەر بالالارعا ءبىلىم بەرىپ قانا قويماي, ولارعا حالقىمىزدىڭ باستى قۇندىلىقتارىن ءسىڭىرىپ كەلەسىزدەر. بيىلعى وقۋ جىلى جوعارى جەتىستىكتەر مەن تولاعاي تابىستارعا تولى بولسىن! – دەدى ع.بەيسەمباەۆ.
جالپى, جاڭا وقۋ جىلىندا ەلىمىزدە 90 مىڭعا جۋىق وقۋشى جاڭا 70 مەكتەپ ەسىگىن ايقارا اشتى. ونىڭ ىشىندە 16 وقۋ وشاعى – «جايلى مەكتەپ». وسى 16 «جايلى مەكتەپتىڭ» 9-ى استانادا ورنالاسقان. ال 200 مىڭنان اسا بالا كۇردەلى جوندەۋدەن ءوتىپ, قايتا جابدىقتالعان مەكتەپتەردە ءبىلىم الادى. ەسكە سالساق, 2023–2025 جىلدارعا ارنالعان «جايلى مەكتەپ» ۇلتتىق جوباسى اياسىندا 401 مەكتەپ سالۋ جوسپارلانعان. مينيسترلىكتىڭ تاراتقان اقپاراتىنا سۇيەنسەك, بۇل جوبا وقۋشى ورنىنىڭ جەتىسپەۋشىلىگىن شەشۋگە, قالا مەن اۋىل مەكتەپتەرى اراسىنداعى الشاقتىقتى ازايتۋعا باعىتتالعان. جوبادا فۋنكتسيونالدى جانە قاۋىپسىز ءبىلىم بەرۋ ورتاسىن قۇرۋعا ەرەكشە نازار اۋدارىلادى. باستاۋىش جانە جوعارعى سىنىپ وقۋشىلارى ءۇشىن بولەك بلوكتار قاراستىرىلعان. سونداي-اق تەحنيكالىق قۇرالداردى ەنگىزۋ ارقىلى قاۋىپسىزدىك شارالارىن ارتتىرۋ, ەرەكشە ءبىلىم بەرۋدى قاجەت ەتەتىن بالالار ءۇشىن كەدەرگىسىز ورتا قالىپتاستىرۋ, مەكتەپتى زاماناۋي پاندىك كابينەتتەرمەن جابدىقتاۋ تالاپ ەتىلەدى. 2024–2025 وقۋ جىلىندا بارلىعى 217 نىساننىڭ قۇرىلىسى ءجۇرىپ جاتىر.
جالپى وتاندىق مەكتەپتەردە 3,9 ملن وقۋشى ءبىلىم الادى. بيىل 352 مىڭ بالا العاش رەت مەكتەپ تابالدىرىعىن اتتادى, ال 219 مىڭ وقۋشى 11-سىنىپقا كوشتى.
